ရက်စွဲ။ ။ ဒီဇင်ဘာလ ၁၀ ရက်၊ ၂၀၁၈ ခုနှစ်
၁) နိုဝင်ဘာလ ၃၀ ရက်နေ့၊၂၀၁၈ ခုနှစ်တွင် မြန်မာနိုင်ငံလုံးဆိုင်ရာ ဒီမိုကရက်တစ်တပ်ဦး၊ မြောက်ပိုင်း (ABSDF-NB) ဒုတိယ ဥက္ကဌ ဦးအောင်ဆွေဦး၊ ဗိုလ်မောင်ဦးနှင့် အရပ်သား ယာဉ်မောင်း ဦးသန်းထိုက်အောင် တို့အား မိုးညှင်းမြို့ ရွာသစ်ကုန်း ကျေးရွာရှိ နေအိမ်တအိမ်တွင် ဝင်ရောက်ဖမ်းဆီးခဲ့ည်။ ထို့နောက် မိုးညှင်းမြို့ အခြေစိုက် ခြေလျှင်တပ်ရင်း ခလရ ၁၅၊ ဗိုလ်ကြီး သီဟစိုး မှ မိုးညှင်းမြို့မ ရဲစခန်း စခန်းမှုးထံသို့ မြောက်ပိုင်း တိုင်းစစ်ဌာနချုပ်နယ်မြေ၊ KIA နယ်မြေအတွင်း ခွင့်ပြုချက်မရရှိဘဲ ဝင်ရောက်နေထိုင်ခဲ့သဖြင့် မတရားသင်း အက်ဥပဒေ ၁၇(၁) ဖြင့် တရားစွဲဆိုခဲ့ပါသည်။
၂) ၂၀၁၈ ခု၊ ဒီဇင်ဘာလ ၇ ရက်နေ့တွင် ပြီးခဲ့သည့် ၂၀ဝ၈ မေလက ကချင်ပြည်နယ်၊မြစ်ကြီးနားမြို့ ၌ စစ်ပွဲ အတွင်း ပိတ်မိနေသူများကို ကယ်ဆယ်ပေးရန် ဆန္ဒထုတ်ဖေါ်ပွဲပြုလုပ်ခဲ့ရာတွင် ဦးဆောင်သူများဖြစ်သည့် ဦးဇော်ဂျတ်၊ ဦးလွမ်းဇောင်း နှင့် ဒေါ်နန်ပူတို့ (၃) ဦးအား မြစ်ကြီးနားမြို့နယ်တရားရုံးက ထောင်ဒဏ် ၆ လနှင့် ဒဏ်ငွေ ၅ သိန်းကျပ် ပေးဆောင်ရန် အမိန့်ချမှတ်ခဲ့သည်။ ထို ၃ ဦးအား မြောက်ပိုင်းတိုင်း စစ်ဌာနချုပ်မှ ဒုတိယ ဗိုလ်မှုကြီးမျိုးမင်းဦးက တပ်မတော်အား အသရေပျက်စေသည့် ပုဒ်မ ၅၀ဝ ဖြင့် မြစ်ကြီးနားတရားရုံးတွင် အမှုဖွင့် ခဲ့ပြီး စက်တင်ဘာ ၃ရက်နေ့တွင် အသရေဖျက်မှု စွဲချက်တင်ခဲ့ခြင်းဖြစ်သည်။
၃) ဒီဇင်ဘာလ ၇ ရက်နေ့တွင် ထိုနေ့တွင် ကချင်တက်ကြွလှုပ်ရှားသူ (၃) ဦးအား စီရင်ချက်ချမှတ်လိုက်သည့် အပေါ် ကန့်ကွက် ဆန္ဒပြခဲ့သည့် နောက်ထပ် ကချင်လူငယ် ၃ ဦးဖြစ်သည့် မဆွတ်ဆိုင်းထွယ်၊ ဘရန်မိုင်၊ မဆိုင်းခွမ်အောင် တို့ (၃) အား ထပ်မံဖမ်းဆီး၍ ပုဒ်မ ၁၉ ဖြင့် အမှုဖွင့်ခဲ့သည်။ ထို၃ ဦးကို စစ်ပွဲအတွင်း ပိတ်မိ ပြည်သူများကို ကယ်ဆယ်ပေးရန် ဆန္ဒထုတ်ဖော်ရာတွင် ဦးဆောင်ခဲ့သည့်ကချင်တိုင်းရင်းသား (၃) အား ထောင်ဒဏ် အမိန့်ချမှတ်ခြင်းအပေါ် တရားမျှတမှု မရှိသည့် စီရင်ချက်ဖြစ်ကြောင်း ကန့်ကွက်ဆန္ဒခြင်းကြောင့် နယ်မြေရဲများမှ ဖမ်းဆီး၍ ငြိမ်း၊စု၊စီ ပုဒ်မ ၁၉ ဖြင့် မြစ်ကြီးနားမြို့နယ် မြို့မရဲစခန်းမှ အမှုဖွင့် အရေးယူခဲ့ခြင်း ဖြစ်သည်။
၄) ယနေ့ကာလသည် အမျိုးသားရင်ကြားစေ့ရေးနှင့် ငြိမ်းချမ်းရေးအတွက် သက်ဆိုင်သူအားလုံးမှ ဝိုင်းဝန်း ကြိုးပမ်း ဆောင်ရွက်နေချိန်ဖြစ်ပါသည်။ ABSDF မြောက်ပိုင်းအဖွဲ့ သည် တပ်မတော်နှင့်ပစ်ခတ်တိုက်ခိုက်မှု ရပ်စဲရေး သဘောတူစာချုပ် မချုပ်ဆိုခင်ကာလနှင့် ချုပ်ဆိုပြီးသည့်အချိန်မှ ယနေ့အချိန်အထိ ကချင်ဒေသတွင် အခြေစိုက်နေခြင်းဖြစ်ပါသည်။ ယခုကဲ့သို့ ဖမ်းဆီး တရားစွဲဆိုခြင်းလိုက်သည် တည်ဆောက်ရရှိထားပြီးသော ယုံကြည်မှု၊ အပတ်တကုတ် ကြိုးစားဆောင်ရွက်နေသော ငြိမ်းချမ်းရေး ဖြစ်စဉ်များကို ထိခိုက်မှုများရှိလာနိုင်ရုံ သာမက NCA လက်မှတ်ထိုးရန် စိုင်းပြင်းနေသည့် ကျန်ရှိ တိုင်းရင်းသားလက်နက်ကိုင်အဖွဲ့အစည်းများကိုပါ တုန့်ဆိုင်းသွားစေနိုင်ပါသည်။ ထို့ကြောင့် အစိုးရအနေဖြင့် ယခုဖမ်းဆီးထားသော ABSDF-NB မှ ၃ ဦးအား အမြန်ဆုံးပြန်လွှတ်ခြင်းဖြင့် အမျိုးသားရင်ကြားစေ့ရေးနှင့် ငြိမ်းချမ်းရေးလုပ်ငန်းစဉ်များကို နှစ်နှစ်ကာကာ တန်ဖိုးထား ဆောင်ရွက်နေကြောင်း သက်သေပြပါရန် အလေးအနက်တိုက်တွန်းလိုက်ပါသည်။
၅) ယနေ့သည် မြန်မာနိုင်ငံအပါအဝင် ကမ္ဘာအဝှမ်း အနှစ် (၇၀) ပြည့် အပြည်ပြည်ဆိုင်ရာ လူ့အခွင့်အရေးနေ့ ကျင်းပနေကြပါသည်။ ထိုသို့ကျင်းပရခြင်း၏ ရည်ရွယ်ချက်မှာ လူသားတိုင်းမွေးရာပါ အခွင့်အရေးများကို လေးစားလိုက်နာရန်နှင့် ကာကွယ်စောင့်ရှောက်ရန်တို့အတွက် ရည်ရွယ်ခြင်းပင်ဖြစ်ပါသည်။ အဆိုပါ လူတိုင်း လိုက်နာရမည့် လူ့အခွင့်အရေးများထဲတွင် အခြေခံလွတ်လပ်ခွင့်အား မည်သူတဦးတယောက်ကမျှ လာရောက် ထိပါးနှောင့်ယှက်ခွင့်မရှိပေ။ အပြည်ပြည်ဆိုင်ရာလူ့အခွင့်အရေးကြေညာစာတမ်း အပိုဒ်(၁၉) တွင် “လူတိုင်း လွတ်လပ်စွာ ထုတ်ဖော်ပြောဆိုခွင့်ရှိရမည်”ဟု ဖေါ်ပြထားပေသည်။ ထို့အတူ လက်ရှိပြဌာန်းထားသော ဖွဲ့စည်းပုံ အခြေခံဥပဒေ ပုဒ်မ ၃၅၄ (က) တွင်လည်း “နိုင်ငံသားတိုင်း မိမိ၏ယုံကြည်ချက်၊ထင်မြင်ယူဆချက်များကို လွတ်လပ်စွာထုတ်ဖော်ပြောဆိုခွင့်၊ရေးသားခွင့်” နှင့် အပိုဒ်(ခ)တွင် “လက်နက်မပါဘဲငြိမ်းချမ်းစွာ စုဝေးခွင့်၊စီတန်းလှည့်လည်ခွင့်ရှိသည်” ဟု ပြဌာန်းထားပါသည်။ အခြေခံလူ့အခွင့်အရေးများကို လေးစားလိုက်နာရန် နှင့် ကာကွယ်စောင့်ရှောက်ရန်မှာ အစိုးရတွင် တာဝန်အရှိဆုံးဖြစ်ပါသည်။ ယခုကဲ့သို့ လွတ်လပ်စွာ ဆန္ဒထုတ်ဖော်မှု များကိုခြိမ်းခြောက်ခြင်း၊ မတရာဖမ်းဆီးအရေးယူခြင်း များပြုလုပ်နေမှုများကို မိမိတို့အေအေပီပီအနေဖြင့် ပြင်းထန်စွာကန့်ကွက်လိုက်ပါသည်။ ထို့အတူ လက်ရှိဖမ်းဆီးထားသော တိုင်းရင်းသားများအပါဝင် လွတ်လပ်စွာဆန္ဒထုတ်ဖေါ်ခြင်း၊ သတင်းယူခြင်း၊ ရေးသားဖော်ပြခြင်းကြောင့် ဖမ်းဆီး ထိန်းသိမ်း ထောင်ချထားသူများ အားလုံးကို အမြန်ဆုံး ပြန်လွှတ်ပေးပါရန် အလေးအနက် တိုက်တွန်းလိုက် ပါသည်။
နိုင်ငံရေးအကျဉ်းသားများကူညီစောင့်ရှောက်ရေးအသင်း
