မြောက်ဦးဆေးရုံ ဗုံးကြဲတိုက်ခိုက်မှု စုံစမ်းစစ်ဆေးရန် ကုလတောင်းဆို

မြန်မာစစ်ကော်မရှင်က အာရက္ခတပ်တော် (AA) ထိန်းချုပ်ထားသည့် ရခိုင်ပြည်နယ်၊ မြောက်ဦးမြို့ရှိ ဆေးရုံအား ဒီဇင်ဘာလ ၁၀ရက်နေ့ညက လေယာဉ်ဖြင့် ဗုံးကြဲ တိုက်ခိုက်မှုသည် စစ်ရာဇဝတ်မှု မြောက်နိုင်ကြောင်းနှင့် စုံစမ်းစစ်ဆေးရန် ကုလသမဂ္ဂက ဒီဇင်ဘာ ၁၁ ရက်တွင် တောင်းဆိုလိုက်သည်။

ကုလသမဂ္ဂ လူ့အခွင့်အရေးဆိုင်ရာ အကြီးအကဲ ဗော်လ်ကာ တာ့ခ်က “ရခိုင်ဆေးရုံကို တိုက်ခိုက်မှုကြောင့် အရပ်သား ဒါဇင်များစွာ သေဆုံးဒဏ်ရာရခဲ့တဲ့အတွက် ကျွန်တော် အထူးတုန်လှုပ်မိပြီး ပြင်းထန်ဆုံး စကားလုံးတွေနဲ့ ရှုတ်ချပါတယ်” ဟု X (ယခင် Twitter) တွင် ရေးသားသည်။

“ဒီလိုတိုက်ခိုက်မှုမျိုးတွေဟာ စစ်ရာဇဝတ်မှု မြောက်နိုင်ပါတယ်။ စုံစမ်းစစ်ဆေးမှုတွေ လုပ်ဆောင်ဖို့နဲ့ တာဝန်ရှိသူတွေကို အရေးယူဖို့ ကျွန်တော် တောင်းဆိုပါတယ်။ တိုက်ပွဲတွေကို အခုချက်ချင်း ရပ်တန့်ရပါမယ်” ဟု ၎င်းက ပြောသည်။

ကုလသမဂ္ဂ လူ့အခွင့်အရေးဆိုင်ရာ ရုံး၏ ပြောရေးဆိုခွင့်ရှိသူအရာရှိက မြန်မာနိုင်ငံအတွင်း ယခုကဲ့သို့ ကျူးလွန်နေသည့် ပြစ်ဒဏ်မှ ကင်းလွတ်ခွင့်ရရှိနေသည့် အခြေအနေများကြောင့် ပြစ်မှုကျူးလွန်သူများကို အရေးယူနိုင်သည့် နိုင်ငံတကာတရားရုံးများနှင့် ကမ္ဘာ့အဖွဲ့များ၏ စီရင်ပိုင်ခွင့်အပါအဝင် အရေးယူနိုင်သည့်အခြားနည်းလမ်းများလည်း ရှိကြောင်းဆိုသည်။

ကမ္ဘာ့ကျန်းမာရေးအဖွဲ့ (WHO) အကြီးအကဲ တက်ဒရိုစ် အက်ဟာနွန် ဂက်ဘရီယေဆပ်လည်း အရေးပေါ်ဝန်ဆောင်မှု၊ သားဖွားနှင့် ခွဲစိတ်ကုသမှုများ ပေးနေသည့် ဒေသ၏ အဓိက ကျန်းမာရေးစောင့်ရှောက်မှုဌာနဖြစ်သော ဆေးရုံကို တိုက်ခိုက်မှုအတွက် “တုန်လှုပ်မိကြောင်း” ပြောသည်။

“ကျန်းမာရေးဝန်ထမ်းတွေ၊ လူနာတွေနဲ့ မိသားစုဝင်တွေ အပါအဝင် သေဆုံးသူ ၃၃ ဦး ထက်မနည်းရှိခဲ့ပြီး ၂၀ ဦး ဒဏ်ရာရရှိခဲ့ပါတယ်။ ဆေးရုံအဆောက်အအုံများ ဆိုးရွားစွာ ပျက်စီးခဲ့ပြီး ခွဲစိတ်ခန်းတွေနဲ့ အဓိက လူနာဆောင်တွေ လုံးဝပျက်စီးသွားခဲ့ပါတယ်” ဟု WHO အကြီးအကဲက X တွင် ရေးသားသည်။

“ဒါဟာ ဒီနှစ်အတွင်း WHO မြန်မာရုံးက အတည်ပြုခဲ့တဲ့ ကျန်းမာရေးစောင့်ရှောက်မှုနေရာတွေ အပေါ် တိုက်ခိုက်မှု ၆၇ ကြိမ်မြောက် ဖြစ်ပါတယ်။ ဒါလိုလုပ်တာဟာ လူသားမျိုးနွယ်အပေါ် တိုက်ခိုက်မှုပဲ ဖြစ်ပါတယ်” ဟု လည်းဆိုသည်။

ဥရောပသမဂ္ဂ (EU) ကလည်း မြောက်ဦးမြို့ဆေးရုံကို မြန်မာစစ်တပ်က လေကြောင်းမှ တိုက်ခိုက်ခဲ့ခြင်းသည် နိုင်ငံတကာ လူသားချင်း စာနာထောက်ထားမှု ဥပဒေကို ချိုးဖောက်ခြင်းဖြစ်ကြောင်း ဒီဇင်ဘာ ၁၁ ရက်တွင် ထုတ်ပြန်ခဲ့သည်။

ဥရောပကော်မရှင် ပြောရေးဆိုခွင့်ရှိသူ အနီတာ ဟစ်ပါကလည်း “မြန်မာစစ်အစိုးရက ရခိုင်ဆေးရုံကို တိုက်ခိုက်ခြင်းဟာ နိုင်ငံတကာ လူသားချင်းစာနာထောက်ထားမှု ဥပဒေကို ချိုးဖောက်တာ ဖြစ်ပါတယ်။ အရပ်သားတွေ၊ ဒဏ်ရာရသူတွေနဲ့ ဆေးဘက်ဆိုင်ရာဝန်ထမ်းတွေကို အခြေအနေအားလုံးမှာ ကာကွယ်ပေးရပါမယ်” ဟု ပြောသည်။

“ဥရောပသမဂ္ဂ အနေနဲ့ ကာယကံရှင်တွေနဲ့ သူတို့ရဲ့ မိသားစုတွေနဲ့အတူ ဝမ်းနည်းကြောင်း ဖော်ပြပါတယ်” ဟုလည်းဟစ်ပါက လူမှုကွန်ရက် X တွင် ရေးသားထားသည်။
Myanmar Now