မြန်မာနိုင်ငံတွင် ယမန်နေ့ (မတ်လ ၂၈ရက်) က ဖြစ်ပွားခဲ့သည့် ငလျင်ကြောင့် ထိခိုက်မှုများအတွက် အရေးပေါ်အကူအညီ ယူရို ၂.၅ သန်း ကနဦးပေးအပ်သွားမည်ဟု ဥရောပသမဂ္ဂ (EU) က ထုတ်ပြန်ကြေညာလိုက်သည်။
ယခုပေးအပ်မည့် လူသားချင်းစာနာထောက်ထားမှုဆိုင်ရာ အကူအညီသည် မြန်မာနိုင်ငံအတွင်း ဖြစ်ပွားနေသည့် တိုက်ပွဲများကြောင့် နေရပ်စွန့်ခွာနေရသူများကို အဓိကထားကာ ထိခိုက်မှုအများဆုံး ကြုံတွေ့နေရသည့် မြန်မာနိုင်ငံမှ ပြည်သူများ၏ အသက်ကို ကယ်တင်ရန်နှင့် အရေးကြီး လိုအပ်ချက်များကို ကူညီဖြည့်ဆည်းပေးရန် ရည်ရွယ်ကြောင်း ထုတ်ပြန်ချက်တွင် ဖော်ပြထားသည်။
ဥရောပသမဂ္ဂသည် Copernicus ဂြိုလ်တုဝန်ဆောင်မှုကို အသုံးပြုကာ ထိခိုက်မှုများကို အကဲဖြတ် လေ့လာလျက်ရှိသည်။
“ယခုဖြစ်ပွားခဲ့သည့် အင်အားပြင်း ငလျင်၏ နောက်ဆက်တွဲအကျိုးဆက်များကို ခံစားနေရသော မြန်မာနိုင်ငံနှင့် ဒေသတွင်းရှိ ပြည်သူများနှင့်အတူ ဥရောပသမဂ္ဂက စည်းလုံးညီညွတ်စွာ ရပ်တည်နေပါသည်။ ယခင်ဘေးအန္တရာယ်များကဲ့သို့ပင် လိုအပ်နေသူများကို ကူညီရန် ဥရောပသမဂ္ဂအနေဖြင့် အသင့်ရှိသည်။ ယခုပေးအပ်သည့် အရေးပေါ်အကူအညီသည် ငလျင်ဒဏ်ခံစားရသော ပြည်သူများအတွက် အလျင်အမြန်သက်သာရာရစေပြီး အရေးပေါ်လိုအပ်ချက်များကို ဖြည့်ဆည်းပေးရာတွင်လည်း အထောက်အကူဖြစ်စေပါလိမ့်မည်” ဟု ဥရောပသမဂ္ဂ၏ ‘တန်းတူညီမျှမှု၊ ကြိုတင်ပြင်ဆင်မှုနှင့် အကျပ်အတည်းစီမံခန့်ခွဲမှုဆိုင်ရာ’ကော်မရှင် အကြီးအကဲ ဟက်ဂျာ လာဘစ်က ပြောဆိုကြောင်း ထုတ်ပြန်ချက်တွင် ဖော်ပြထားသည်။
ကော်မရှင်က လူသားချင်းစာနာထောက်ထားမှုဆိုင်ရာ မိတ်ဖက်များနှင့်အတူ မြေပြင်ရှိ အခြေအနေနှင့် လိုအပ်ချက်များကို အကဲဖြတ်လျက်ရှိပြီး EU ၏ နောက်ထပ်အကူအညီများကို စုဆောင်းပေးသွားမည်ဖြစ်သည်။
ယခုကူညီမှုကြောင့် ၂၀၂၅ ခုနှစ်တွင် မြန်မာနိုင်ငံအတွက် EU ၏ လူသားချင်း စာနာထောက်ထားမှုဆိုင်ရာ အကူအညီရန်ပုံငွေ စုစုပေါင်းမှာ ယူရို ၃၅ သန်းကျော်အထိ ရှိလာပြီဖြစ်သည်။
EU သည် ၁၉၉၄ ခုနှစ်မှစတင်၍ မြန်မာနိုင်ငံတွင် လူသားချင်းစာနာထောက်ထားမှုဆိုင်ရာ အကူအညီများကို စုစုပေါင်း ယူရို ၄၄၆ သန်းကျော်အထိ ပေးထားပြီး ဖြစ်သည်။
ဂျာမနီနိုင်ငံမှ NGO အဖွဲ့ဖြစ်သည့် Welthungerhilfe (WHH) ကလည်း ငလျင်ဒဏ်ကို ဆိုးရွားစွာခံစားခဲ့ရသည့် မန္တလေးမြို့ဝန်းကျင်အတွက် အရေးပေါ်အကူအညီ ဒေါ်လာ ၁၀၈,၀၀၀ (ယူရို ၁၀၀,၀၀၀) ကူညီမည်ဖြစ်ကြောင်း ထုတ်ပြန်ထားသည်။
“ပျက်စီးဆုံးရှုံးမှုပမာဏကို တဖြည်းဖြည်းနဲ့ တွေ့လာရတယ်။ ငလျင်ကြောင့် အိမ်များ၊ လမ်းများ၊ တံတားများ ပျက်စီးခဲ့သလို မန္တလေးရှိ မိမိတို့၏အဖွဲ့ရုံးလည်း ပျက်စီးခဲ့ပါတယ်” ဟု ရန်ကုန်ရှိ WHH ၏ မြန်မာနိုင်ငံဆိုင်ရာ ညွှန်ကြားရေးမှူးဒါရိုက်တာ ဟင်နရီဘရောင်းက ပြောကြားခဲ့သည်။
ကုလသမဂ္ဂအကြီးအကဲ အန်တိုနီယို ဂူတာရက်စ်က ငလျင်ဒဏ်ကြုံတွေ့ ခံစားရသော ဒေသအတွင်းရှိ ပြည်သူများအားလုံးအတွက် ဝမ်းနည်းကြောင်း သဝဏ်လွှာပေးပို့ခဲ့ပြီး ကုလသမဂ္ဂက အထောက်အပံ့ပေးရန် တတ်နိုင်သမျှ အမြန်ဆုံး စုစည်းဆောင်ရွက်နေကြောင်း ပြောကြားခဲ့သည်။
ကုလသမဂ္ဂလူသားချင်းစာနာမှုဆိုင်ရာညှိနှိုင်းရေးရုံး အကြီးအကဲ ဖလက်ချာက ကူညီကယ်ဆယ်ရေးအတွက် ဗဟိုအရေးပေါ်တုံ့ပြန်မှု ရန်ပုံငွေထဲမှ ဒေါ်လာ ၅ သန်းကို ကနဦးခွဲဝေ သတ်မှတ်ပေးထားသည်။
Myanmar Now
