၂၀၂၄ ခုနှစ် ဇူလိုင်လကနေ စက်တင်ဘာလအထိ သုံးလအတွင်း နိုင်ငံတစ်ဝန်းမှာ အနည်းဆုံး အရပ်သားတစ်ထောင်ကျော် (၁,၀၄၄) သေဆုံးပြီး တစ်ထောင်သုံးရာကျော် (၁,၃၈၃ ဦး) ထိခိုက်ဒဏ်ရာရခဲ့တယ်လို့ လွတ်လပ်တဲ့ သုတေသနအဖွဲ့တစ်ခုဖြစ်တဲ့ ဉာဏ်လင်းသစ်သုတေသနအဖွဲ့က အောက်တိုဘာ ၂၂ ရက်နေ့မှာ ထုတ်ပြန်ပါတယ်။
သေဆုံးမှုတွေမှာ အရပ်သားတွေကို ပစ်မှတ်ထားတိုက်ခိုက်လို့ သေဆုံးတာနဲ့ တိုက်ပွဲတွေအတွင်း သေဆုံးခဲ့တာဖြစ်တယ်လို့ ဆိုပါတယ်။ ရှမ်းပြည်နယ်မြောက်ပိုင်းမှာ သေဆုံးသူ ၃၆၀ ကျော်နဲ့ အများဆုံးဖြစ်ပြီး မန္တလေးတိုင်းမှာ နှစ်ရာကျော်၊ စစ်ကိုင်းတိုင်းမှာ ၁၈၀ ကျော်၊ မကွေးတိုင်းမှာ သုံးဆယ်ကျော် အသီးသီးသေဆုံးခဲ့တယ်လို့ ဆိုပါတယ်။ ဘယ်အဖွဲ့အစည်းတွေကြောင့် ထိခိုက်သေဆုံးခဲ့တယ်ဆိုတာကိုတော့ ထည့်သွင်းဖော်ပြတာ မရှိပါဘူး။
ဒီသုံးလအတွင်း စစ်ဆင်ရေးတွေနဲ့ တိုက်ပွဲပေါင်း နှစ်ထောင်ကျော် (၂,၁၂၆) ရှိခဲ့ပြီး တော်လှန်ရေးတပ်ဖွဲ့တွေက စစ်ကောင်စီတပ်တွေကို ပစ်မှတ်ထားတိုက်ခိုက်ခဲ့တာ အကြိမ် နှစ်ထောင်ကျော် (၂,ဝဝ၆) ရှိခဲ့တယ်လို့လည်း ဖော်ပြထားပါတယ်။
ဒီတိုက်ပွဲတွေအတွင်း တော်လှန်ရေးအင်အားစုတွေဘက်က ကချင်၊ ရှမ်းပြည်နယ် မြောက်ပိုင်း၊ မန္တလေးနဲ့ ရခိုင်ပြည်နယ်တွေက မြို့ပေါင်း (၁၂) မြို့ကို သိမ်းယူနိုင်ခဲ့တယ်လို့လည်း ရေးသားထားပါတယ်။ အဲဒီအထဲမှာ လားရှိုး၊ ကျောက်မဲ၊ နောင်ချို၊ မိုးမိတ်၊ မိုးကုတ်၊ သပိတ်ကျင်း၊ စဉ့်ကူး၊ တကောင်း၊ မိုးမောက်၊ ချီဖွေ၊ သံတွဲနဲ့ ကျိန္တလီ စတဲ့မြို့တွေပါဝင်တယ်လို့ ဆိုပါတယ်။
ရှမ်းပြည်နယ်မြောက်ပိုင်း၊ မန္တလေး၊ စစ်ကိုင်းနဲ့ မကွေး ဒေသတွေမှာ တိုက်ပွဲတွေအများဆုံးဖြစ်ခဲ့ပြီး ၁၀ ၂၇ စစ်ဆင်ရေး ဒုတိယပိုင်းကြောင့် လားရှိုးမြို့အခြေစိုက် စစ်ကောင်စီရဲ့အရှေ့မြောက်တိုင်း စစ်ဌာနချုပ် (ရမခ) ကို ကိုးကန့်တပ်ဖွဲ့ (MNDAA) က သိမ်းယူပြီးနောက် တိုက်ပွဲဖြစ်ပွားမှုနှုန်း အမြင့်ဆုံးဖြစ်ခဲ့တယ်လို့လည်း ဉာဏ်လင်းသစ်အဖွဲ့က ဆိုပါတယ်။
လက်လွှတ်လိုက်ရတဲ့ မြို့တွေ၊ တိုက်ပွဲအခြေအနေတွေနဲ့ ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းနဲ့ ဆက်သွယ်မေးမြန်းပေမဲ့ လက်ခံဖြေဆိုတာ မရှိပါဘူး။
