မဇ္ဈိမ။ ။အင်းစိန်အကျဉ်းထောင်ရှိ ထောင်ဆေးရုံတွင် နိုင်ငံရေးအကျဉ်းသားတဦးကို အဓမ္မပြုကျင့်ခဲ့သည့် အကျဉ်းခန်းလူကြီးအား ထောင်အာဏာပိုင်များက ထိရောက်စွာ အပြစ်ပေးအရေးယူခြင်းမရှိကြောင်း မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်(PPNM)၏ သတင်းထုတ်ပြန်ချက်အရ သိရ သည်။
သြဂုတ်လ ၂၀ ရက်နေ့ နံနက် ၃ နာရီက မုဒိမ်းမှုဖြင့် ထောင်ကျနေသည့် အကျဉ်းခန်းလူကြီး ဇင်မျိုးကို(ခ) မျိုးကြီးက ပုဒ်မ ၅၀(ည)ဖြင့် ထောင်ဒဏ် ၁၁ နှစ်ချမှတ်ခံထားရသည့် အသက် ၂၅ နှစ်အရွယ် နိုင်ငံရေး အကျဉ်းသားကို ထိုးကြိတ်၍အဓမ္မပြုကျင့်ခဲ့သည်။ ဖြစ်စဉ်ဖြစ်ပွားရာနေရာမှာ အင်းစိန်ထောင်ဝင်းအတွင်း ရှိ ထောင်ဆေးရုံ၊ တီဘီရောဂါသမားများအားထားသည့် အခန်းတွင်ဖြစ်ပြီး ကျူးလွန်သူမှာ အဆိုပါအခန်း ၏ အခန်းလူကြီးအဖြစ် တာဝန်ပေးခံထားရသူဖြစ်ကြောင်း သိရသည်။
ယင်းသို့ အဓမ္မပြုကျင့်မှုနှင့်ပတ်သက်၍ ဇင်မျိုးကိုအား ထောင်အာဏာပိုင်များက တစုံတရာ အရေးယူမှု မရှိကြောင်း PPNM ဦးဆောင်ကော်မတီဝင် ဦးသိုက်ထွန်းဦးက ပြောသည်။
“အဲဒီအခန်းလူကြီးကို သူတို့နေရာရွှေ့လိုက်တယ်၊ တိုက်ဘက်ကို ရွှေ့လိုက်တယ်လို့တော့ ပြောတယ်။ ဒါ ပေမယ့် ဒီကိစ္စက အခန်းလူကြီးဆိုတဲ့ရာထူးကိုအသုံးချပြီးမှ အကျဉ်းသားအချင်းချင်း လူ့အခွင့်အရေး ချိုး ဖောက်တာဖြစ်သလို မုဒိမ်းမှုကျူးလွန်တာဖြစ်တယ်။ ဒါဟာ ရာဇဝတ်မှုလည်း ဖြစ်တယ်။ ဒီလို ရာဇဝတ်မှု ကျူးလွန်သူတယောက်ကို ထိရောက်တဲ့ ထောင်တွင်းတရားရုံးကသော်လည်းကောင်း၊ ပြင်ပတရားရုံး ကနေသော်လည်းကောင်း အရေးယူဆောင်ရွက်မှု ပြစ်ဒဏ်မပေးဘဲနဲ့ပေါ့နော် ဒီလိုမျိုးထားထားခြင်းဟာ ထောင်အာဏာပိုင်တွေက ဒီလိုလူ့အခွင့်အရေး ချိုးဖောက်ရာမှာ အားပေးအားမြှောက်ပြုနေခြင်းဖြစ်တယ် လို့ ပြောချင်တယ်” ဟု ၎င်းက ပြောသည်။
ထို့ပြင် အင်းစိန်ထောင်ပိုင် ဇော်လင်းအောင်၏တပည့်ဖြစ်သူ အဆောင်မှူးအောင်ကျော်ဆင့်က အဓမ္မပြု ကျင့်ခံရသည့်ဖြစ်စဉ်အား ဖုံးကွယ်ထားပြီး အကျဉ်းထောင်ပြင်ပနှင့် ထောင်အတွင်း သတင်းပေါက်ကြားပါ က အဓမ္မပြုကျင့်ခံရသည့် နိုင်ငံရေးအကျဉ်းသားအပါအဝင် သတင်းဖြန့်သူကိုပါ တိုက်ပိတ်အရေးယူမည် ဟု ခြိမ်းခြောက်ထားကြောင်း PPNM ၏ ထုတ်ပြန်ချက်တွင် ဖော်ပြထားသည်။
အဓမ္မပြုကျင့်ခံရသည့် နိုင်ငံရေးအကျဉ်းသားမှာ ပွန်းပဲ့ဒဏ်ရာများရခဲ့ပြီး ရောဂါအခံဖြစ်သည့် တီဘီရောဂါ အပြင် စိတ်ပိုင်းဆိုင်ရာဝေဒနာနှင့် အသက်အန္တရာယ်ပါ ခြိမ်းခြောက်ခံထားရကြောင်း PPNM ဦးဆောင် ကော်မတီဝင် ဦးသိုက်ထွန်းဦးက ပြောသည်။ အဆိုပါနိုင်ငံရေးအကျဉ်းသားသည် ကျိုက်မရောထောင်မှ ထောင်ပြောင်းဖြင့် အင်းစိန်ထောင်သို့ ရောက်ရှိလာသူဖြစ်သည်။
“ကျူးလွန်ခံရတဲ့ နိုင်ငံရေးအကျဉ်းသားက ပွန်းပဲ့ဒဏ်ရာတွေ ရထားတယ်။ ကျန်းမာရေးကလည်း တီဘီ ရောဂါ ဆိုးဆိုးဝါးဝါး ခံစားနေရလို့ ဆေးဝါးကုသမှု ခံယူနေရဆဲဖြစ်ပါတယ်။ စိတ်ပိုင်းဆိုင်ရာအပြင် လက်ရှိ ကျွန်တော်တို့စုံစမ်းရရှိရသလောက် အသက်အန္တရာယ်ပါ စိုးရိမ်ရပါတယ်၊ ဒီကိစ္စကျွန်တော်တို့ ထုတ်ပြန် လိုက်တာ သူ့အတွက် အသက်အန္တရာယ် များစွာထိခိုက်နိုင်တယ်။ ဒါပေမယ့်လည်း ဒါက လုပ်သင့်လုပ် ထိုက်တဲ့ကိစ္စတခုဖြစ်တယ်၊ သူ့ရဲ့ ဂုဏ်သိက္ခာအရ နာမည်တွေ ချန်လှပ်ထားတယ်။
ဒီလိုကျူးလွန်မှုကို ကျွန်တော်တို့ အဖွဲ့အနေနဲ့ ထိရောက်တဲ့ အပြစ်ပေးအရေးယူမှုတွေ ဖြစ်စေချင်တယ်။ ကျူးလွန်ခံရတဲ့သူရဲ့ နစ်နာမှုတွေ ကိုယ်တိုင် အဓမ္မပြုကျင့်ခံရတဲ့အပြင် နှုတ်ပိတ်ခံရတဲ့ ခံစားမှု၊ ထောင်ထဲမှာ ဘယ်သူ့မှ မပြော ဘဲ တယောက်တည်းကြိတ်ခံစားနေရတဲ့ စိတ်ပိုင်းဆိုင်ရာခံစားမှုက အင်မတန်ဆိုးဝါးတဲ့ ခံစားမှုတွေ ဖြစ် စေပါတယ်။ အဲ့ဒီခံစားမှုတွေကို သူလက်ရှိ ရင်ဆိုင်ခံစားနေရတယ်ဆိုတာကို အချက်အလက်တွေနဲ့တော့ ရရှိထားပါတယ်” ဟု ဦးသိုက်ထွန်းဦးက ဆက်ပြောသည်။
PPNM ၏ထုတ်ပြန်ချက်တွင် ဖြစ်စဉ်အား ဖုံးကွယ်ထားရန်စေခိုင်းသည့် အဆောင်မှူး အောင်ကျော်ဆင့် သည် ၎င်းတာဝန်ယူအုပ်ချုပ်သည့် အဆောင်အတွင်း ငွေကြေးရယူ၍ အကျဉ်းသားအချင်းချင်း အုပ်ချုပ် ရသည့် ရာထူးအာဏာများကို ရာဇဝတ်အကျဉ်းသားများကို ပေးနေသလို နိုင်ငံရေးအကျဉ်းသားများကို အုပ်ချုပ်သူအကျဉ်းသားတို့၏ ရိုက်နှက်၊ နှိပ်စက် ခြိမ်းခြောက်ငွေညှစ်မှုများ၊ ယခုကဲ့သို့ အဓမ္မပြုကျင့်မှုဖြစ် စဉ်များအား ဖုံးကွယ်ပေးခြင်းတို့ဖြင့် ထောင်တွင်းစီးပွားရှာနေသူဖြစ်ကြောင်း ဆိုသည်။
ယခုဖြစ်စဉ်အား မှတ်တမ်းရယူပြီး လူ့အခွင့်အရေးအဖွဲ့အစည်းများထံ ပေးပို့ထားကြောင်းနှင့် အသွင်းကူး ပြောင်းရေးကာလ၊ တရားမျှတမှုဖော်ဆောင်သည့်အချိန်တွင် ပြစ်ဒဏ်နှင့်ညီမျှသည့် အပြစ်ပေးအရေးယူ မှု ပြုလုပ်နိုင်ရေးပြင်ဆင်နေကြောင်း ဦးသိုက်ထွန်းဦးက ဆိုသည်။
စာတည်း။ ။စောဖေ
