မြန်မာပြည်တွင်းက စစ်ဘေးဒဏ်ခံနေရတဲ့ ကလေးငယ်တွေကို နိုင်ငံတကာအနေနဲ့ ထိရောက်တဲ့အကူအညီတွေပေးဖို့ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက စက်တင်ဘာ ၃ ရက်နေ့မှာ တောင်းဆိုလိုက်ပါတယ်။
အမေရိကန်ပြည်ထောင်စု၊ နယူးယောက်မြို့၊ ကုသသမဂ္ဂ ဌာနချုပ်မှာလုပ်တဲ့ ကုလသမဂ္ဂကလေးများ ရန်ပုံငွေအဖွဲ့ (UNICEF) ရဲ့ ၂၀၂၄ ခုနှစ်၊ ဒုတိယအကြိမ် ပုံမှန်အစည်းအဝေးမှာ အခုလို ပြောလိုက်တာပါ။
စစ်ကောင်စီဟာ ၂၀၂၁ ခုနှစ်၊ ဖေဖော်ဝါရီ ၁ ရက် အာဏာစသိမ်းတဲ့အချိန်ကစပြီး ကလေးငယ်တွေအပါအဝင် မြန်မာပြည်သူအားလုံးအပေါ် ရက်စက်မှု ကျူးလွန်ခဲ့တာကြောင့် လူသားချင်းစာနာမှုအရ ဖြေရှင်းပေးဖို့ လိုအပ်နေတဲ့ ပြဿနာတွေ အခုအချိန်အထိ မရှင်းနိုင်ဘဲ အလှမ်းဝေးနေသေးတယ်လို့ ဦးကျော်မိုးထွန်းက ပြောပါတယ်။
“စစ်ကောင်စီတပ်ဟာ ရက်စက်ကြမ်းကြုတ်သလောက် မြေပြင်တိုက်ပွဲတွေမှာလည်း ဆက်တိုက် ရှုံးနိမ့်နေတယ်။ ဒါကြောင့် စစ်သားစုဆောင်းမှုတွေ ပြုလုပ်နေတဲ့အကျိုးဆက်က နေရပ်စွန့်ခွာပြီး စစ်ရှောင်နေကြရတဲ့ ကလေးတွေ၊ ပြည်သူတွေအတွက် အကျပ်အတည်းပေါ် ဒုက္ခဆင့်ကဲ တိုးလာသလိုမျိုး ဖြစ်နေပါတယ်”
ပြိုလဲလုနီးပါးဖြစ်နေတဲ့ ကျန်းမာရေးနဲ့ ပညာရေး စနစ်ဒဏ်ကို မြန်မာပြည်က ကလေးငယ်တွေ အများဆုံး ခါးစည်းခံနေရတဲ့ ပြဿနာကလည်း စစ်ကောင်စီရဲ့ ရက်စက်ကြမ်းကြုတ်မှုတွေကြောင့် ဖြစ်တယ်လို့ သူက ပြောပါတယ်။
ကုလသမဂ္ဂ ကလေးများရန်ပုံငွေအဖွဲ့ (UNICEF) ရဲ့ ထုတ်ပြန်ချက်အရ လူသားချင်း စာနာထောက်ထားမှု အကူအညီ လိုအပ်နေတဲ့ဒုက္ခသည် ၁၈ ဒသမ ၆ သန်းထဲမှာ ၆ သန်းက ကလေးငယ်တွေဖြစ်ပြီး အဲဒီကလေးငယ်တွေထံ လိုအပ်တဲ့အကူအညီတွေ ရောက်အောင် ကြိုးပမ်းနေတဲ့ UNICEF ကိုလည်း ကျေးဇူးတင်တယ်လို့ သံအမတ်ကြီးက ပြောပါတယ်။
မြန်မာနိုင်ငံမှာ အကူအညီ လိုအပ်နေသူတွေကို ထိရောက်တဲ့ ကူညီမှုတွေပေးဖို့ အမျိုးသားညီညွတ်ရေးအစိုးရ (NUG)နဲ့ တိုင်းရင်းသား လက်နက်ကိုင် အဖွဲ့အစည်းများအပါအဝင် သက်ဆိုင်သူအားလုံးနဲ့ ချိတ်ဆက်ဆောင်ရွက်ဖို့လည်း သံအမတ်ကြီးက တိုက်တွန်းပါတယ်။
နိုင်ငံရေးအကျဥ်းသားများ ကူညီစောင့်ရှောက်ရေးအသင်း (AAPP) ရဲ့ စက်တင်ဘာ ၂ ရက်နေ့ ထုတ်ပြန်ချက်ရ အာဏာသိမ်း သုံးနှစ်ကျော်အတွင်း ကလေးခြောက်ရာကျော် (၆၁၄) ဦး သေဆုံးတယ်လို့ ဖော်ပြပါတယ်။
