စစ်ကိုင်းတိုင်းက ဒေသခံတွေနဲ့ ကာကွယ်ရေးတပ်တွေ (PDF) တွေကို ရက်ရက်စက်စက်သတ်ဖြတ်ခဲ့တဲ့ စစ်ကောင်စီ လက်အောက်ခံ ဘီလူးစစ်ကြောင်းက စစ်ကြောင်းမှူးအပါအင် ငါးဦး ဖမ်းမိထားပြီး စစ်ဆေးမေးမြန်းနေတယ်လို့ ပြည်သူ့လွတ်မြောက်ရေးတပ်မတော် (PLA) က RFA ကိုပြောပါတယ်။
သူတို့ကို သြဂုတ်လ ၁၄ ရက်နေ့က မိုးကုတ်-သပိတ်ကျင်းလမ်းပေါ်က ဖော့တော့တိုက်ပွဲအတွင်းမှာ ဖမ်းဆီးရမိခဲ့တာလို့ PLA ပြောရေးဆိုခွင့်ရှိသူက RFA ကို ပြောပါတယ်။
“ဘီးလူးစစ်ကြောင်းမှူးနဲ့ သူအပါအဝင် ငါးယောက်ကို အရှင်ဖမ်းမိပါတယ်၊ မိုးကုတ်နဲ့ သပိတ်ကျင်း လမ်းပိုင်းမှာပေါ့နော်၊ ၁၄ ရက်နေ့က ဖမ်းမိတယ်ဆိုတာ သတင်းဝင်လာပါတယ်၊ စစ်ရသလောက် ဘီးလူးစစ်ကြောင်းမှူး နာမည်က ဂျက်ဖိုက်တာပေါ့၊ အဲလိုနာမည်ပေးထားတယ်၊ တပ်မ ၉၉ လက်မောင်းတံဆိပ်ကို တပ်ထားတယ်၊ သူတို့စစ်ကြောင်းက ၁၅၀ နဲ့ ၂၀၀ ကြားမှာရှိတယ်၊ လေးဆယ်ကျော်လောက်တော့ ကျန်သေးတယ်ပြောတယ်၊ သပိတ်ကျင်း ခုနစ်မိုင်ဘက်မှာ ပုန်းခိုနေတယ်၊ ကျွန်မတို့ ရဲဘော်တွေနဲ့ တိုက်ပွဲတွေ ဖြစ်နေကြတယ်”
စစ်ဆေးချက်အရ အဲဒီ ဘီးလူးစစ်ကြောင်းဟာ စစ်တပ်ထဲ ပြစ်ဒဏ်ချခံရသူတွေ၊ ဆိုးသွမ်းရမ်းကားသူတွေနဲ့ အရပ်သားတွေထဲက လူသတ်မှု၊ မုဒိန်းမှုတွေနဲ့ ထောင်ကျခဲ့သူတွေ၊ လက်မရွံ့လူသတ်သမားတွေနဲ့ စုစည်း ဖွဲ့စည်းထားတယ်လို့ ဆိုပါတယ်။
သူတို့ဟာ မိုးမိတ်နဲ့ မိုးကုတ်မြို့နယ်တွေဘက်ကို စစ်ကြောင်းထိုးပြီး လူသတ်၊ မီးရှို့၊ မုဒိန်းကျင့်တာတွေ လုပ်ခဲ့တယ်လို့လည်း ဆိုပါတယ်။
မိုးကုတ်ဘက်မှာ မြို့သိမ်းတိုက်ပွဲတွေဖြစ်လာပြီးနောက် သပိတ်ကျင်းမြို့နယ်ဘက်အဆုတ်မှာ ဖမ်းမိတာလို့လို့ ဆိုပါတယ်။
ဘီးလူးစစ်ကြောင်းဟာ ပြီးခဲ့တဲ့ ၂၀၂၂ နဲ့ ၂၀၂၃ ခုနှစ်အတွင်း စစ်ကိုင်းတိုင်းထဲက ရွာတွေကို စီးနင်းတိုက်ခိုက်ပြီး ဒေသခံ အရပ်သားတွေနဲ့ ပြည်သူ့ကာကွယ်ရေးတပ် (PDF)တွေကို ခေါင်းနဲ့ ခြေလက်အင်္ဂါတွေဖြတ် သတ်ဖြတ်မှုတွေ နာမည်ကြီးတဲ့ စစ်ကြောင်းပါ။
ဒီပဲယင်း၊ ရေဦး၊ ယင်းမာပင်၊ ဆားလင်းကြီးနဲ့ ပုလဲမြို့နယ်မှာ လူတွေကိုသတ်ဖြတ်ပြီးတဲ့ အခါ “ဘီလူးစစ်ကြောင်း”၊ “ကျားဘီလူးစစ်ကြောင်း” ဆိုတဲ့နာမည်တွေကို အိမ်နံရံတွေ၊ ရွာခြံစည်းရိုးတွေမှာ ရေးခဲ့ကြတယ်လို့ ဒေသခံတွေက ပြောပါတယ်။
စစ်ကိုင်းတိုင်းအတွင်းစစ်ကြောင်းထိုးတဲ့ ဒီ “ဘီလူးစစ်ကြောင်း” မှာ အောင်လံမြို့အခြေစိုက် အမှတ် ၇၁ ခြေလျင်တပ်ရင်းနဲ့ ပျုစောထီးတွေပါဝင်သလို ရေဦးမြို့နယ်မှာ တပ်စွဲထားတဲ့ အမှတ် ၇၀၁ နဲ့ စစ်ကောင်စီတပ်မ ၉၉ လက်အောက်ခံ အမှတ် ၇၀၈ ခြေမြန်တပ်ရင်းတွေလည်း ပါဝင်တယ်လို့ ဒေသခံတွေက ပြောပါတယ်။
ဒီပြောဆိုချက်တွေနဲ့ပတ်သက်ပြီး စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းကို RFA က ဖုန်းနဲ့ ဆက်သွယ်ခဲ့ပေမဲ့ လက်ခံဖြေဆိုတာ မရှိပါဘူး။
