လျှပ်စစ်မီးပုံမှန်မပေးနိုင်တဲ့ စစ်ကောင်စီကို ဖေ့ဘွတ်စ်စာမျက်နှာကနေ ပြင်းပြင်းထန်ထန် ဝေဖန်ခဲ့တဲ့ ဟစ်ဟော့ အဆိုတော် ဗျူဟာကို စစ်ကောင်စီက ထောင်ဒဏ် အနှစ် နှစ်ဆယ် ချမှတ်လိုက်ပါတယ်။
ဩဂုတ် ၂၃ ရက်နေ့ မနက်ပိုင်းက နိုင်ငံတော်ပုန်ကန်မှု ပုဒ်မ ၁၂၄ နဲ့ ထပ်တိုးစွဲပြီး အင်းစိန်အကျဉ်းထောင်တရားရုံးက ထောင်ဒဏ်အနှစ် နှစ်ဆယ် ချလိုက်တဲ့အကြောင်း ထောင်အာဏာပိုင်တွေက မိသားစုကိုအကြောင်းကြားတယ်လို့ အဆိုတော် ဗျူဟာရဲ့ ဇနီးဖြစ်သူက RFA ကိုပြောပါတယ်။
“ကျန်းမာရေးတော့ ကောင်းပါတယ်၊ ပုဒ်မက အစကတော့ ၅၀၅ (က) စွဲထားတာပေါ့နော် ဒီနေ့ကတော့ ပုဒ်မ ၁၂၄ ထပ်တိုးတာပေါ့၊ ထောင်ဒဏ်အနှစ် နှစ်ဆယ် ချလိုက်တယ်”
နိုင်ငံကျော် အဆိုတော်နဲ့ တေးရေးဆရာ နိုင်မြန်မာရဲ့ သားဖြစ်သူ အဆိုတော် ဗျူဟာ ဟာ မေလ ၂၃ ရက်နေ့က လျှပ်စစ်မီးတွေ မှန်အောင်မပေးနိုင်လို့ဆိုပြီး စစ်ကောင်စီခေါင်းဆောင်နဲ့ လျှပ်စစ်ဝန်ကြီးကို သူ့ရဲ့ ဖေ့စ်ဘွတ်စာမျက်နှာကနေ တိုက်ရိုက်ရုပ်သံလွှင့်ကာ ပြင်းပြင်းထန်ထန် ပြစ်တင်ဝေဖန်ပြောဆိုခဲ့ပြီးနောက် အဖမ်းခံလိုက်ရတာပါ။
သူက အမျိုးသားဒီမိုကရေစီအဖွဲ့ချုပ် NLD အစိုးရလက်ထက် နဲ့ စစ်ကောင်စီခေါင်းဆောင်တွေကို နှိုင်းယှဉ်ဝေဖန်ခဲ့တာဖြစ်ပါတယ်။
သူ အဖမ်းမခံရခင်က အသက် ၃၁ နှစ်အရွယ် ဇနီးသည် မခင်ချစ်ကြည်၊ အသက် ၁ဝ နှစ်အရွယ် သမီးငယ် မဓာတုမြန်မာနဲ့ အသက် ရှစ်နှစ် အရွယ် သားငယ် မောင်ဂုဏ်ရောင်မြန်မာတို့နဲ့အတူ မြောက်ဒဂုံမြို့နယ်မှာ နေထိုင်တာ ဖြစ်ပါတယ်။
နိုင်ငံရေးအကျဉ်းသားများကူညီစောင့်ရှောက်ရေးအသင်း AAPP ရဲ့ ဩဂုတ် ၂၃ ရက်နေ့အထိ ထုတ်ပြန်ချက်အရ စစ်ကောင်စီအာဏာသိမ်းပြီးချိန်ကစလို့ လူပေါင်း (၂၄,၄၁၀) ဦး အဖမ်းခံခဲ့ရပြီး အဲဒီထဲက (၇,၁၇၅) ဦး ထောင်ဒဏ်ချမှတ်ခံထားရပါတယ်။
