ချင်းပြည်နယ်၊ ထန်တလန်မြို့ နဲ့ ငါးမိုင်ခန့်အကွာ ခွါဖိုကျေးရွာကို စစ်ကောင်စီတပ်က ဩဂုတ်လ ၁၄ ရက် ဒီနေ့ မနက်ပိုင်းမှာ လေယာဉ်နဲ့ ဗုံးကြဲတိုက်ခိုက်ခဲ့တယ်လို့ ဒေသခံတွေက RFA ကို ပြောပါတယ်။
ဒီတိုက်ခိုက်မှုအတွင်း လူထိခိုက်ဒဏ်ရာရတာ မရှိပေမယ့် ခွါဖို နှစ်ခြင်းဘုရားကျောင်း အဆောက်အအုံ အပါအဝင် လူနေအိမ် လေးလုံး ပျက်စီးခဲ့တယ်လို့ ဒေသခံတစ်ဦးက ပြောပါတယ်။
“ခွါဖိုမှာ တိုက်ပွဲမရှိဘူး။ မြို့ပေါ်မှာပဲ ဖြစ်တာ။ အဲဒါ လေကြောင်းလာပစ်တော့ ဘုရားကျောင်း၊ နေအိမ်တွေ ပျက်စီးတာပေါ့။ ခွါဖိုရွာသားတွေက ထပ်လာမှာစိုးလို့ ရှောင်နေကြတယ်”
ခွါဖိုရွာအနီး တိုက်ပွဲဖြစ်ပွားတာမရှိဘဲ လေကြောင်းကနေ တိုက်ခိုက်ခဲ့တာလို့ သူက ပြောပါတယ်။
ဒါပေမဲ့ ထန်တလန်မြို့ပေါ်မှာတော့ ဒီကနေ့ မနက်ပိုင်းမှာ စစ်ကောင်စီတပ်နဲ့ ချင်းအမျိုးသားတပ်မတော် (CNA)၊ ချင်းအမျိုးသားကာကွယ်ရေးတပ် (CDF) ပူးပေါင်းတပ်တွေအကြား တိုက်ပွဲဖြစ်ပွားခဲ့ပါတယ်။
ခွါဖိုရွာကို လေယာဉ်နဲ့ ဗုံးကြဲတဲ့ကိစ္စနဲ့ပတ်သက်လို့ စစ်ကောင်စီရဲ့ ချင်းပြည်နယ် ပြောခွင့်ရသူ ဦးသန့်ဇင်ကို RFAက ဒီကနေ့ ဖုန်းနဲ့ဆက်သွယ်ခဲ့ပေမယ့် လက်ခံဖြေဆိုတာ မရှိပါဘူး။
၂၀၂၃ခုနှစ် မတ်လ ၃၀ ရက်တုန်းကလည်း ခွါဖိုရွာကို စစ်ကောင်စီတပ်က လေကြောင်းနဲ့ ဗုံးကြဲတိုက်ခိုက်ခဲ့လို့ ကလေးငယ် နှစ်ဦး အပါအဝင် ဒေသခံ ကိုးဦး သေဆုံးခဲ့ပါတယ်။
အရေးပေါ်ကာလ သက်တမ်းတိုးပြီး နယ်မြေရှင်းလင်းရေး အရှိန်မြှင့်နေတဲ့ စစ်ကောင်စီတပ်ဟာ လက်နက်ကိုင်ခုခံမှုတွေရှိနေတဲ့ ဒေသတွေမှာ လေကြောင်းနဲ့ရော လက်နက်ကြီးတွေနဲ့ပါ ဆက်တိုက်တိုက်ခိုက် ပစ်ခတ်နေပါတယ်။
စစ်ကောင်စီဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က စစ်ကိုင်းတိုင်း၊ မကွေးတိုင်း၊ ပဲခူးတိုင်း၊ တနင်္သာရီတိုင်း၊ ကရင်ပြည်နယ်၊ ကယားပြည်နယ်၊ ချင်းပြည်နယ်၊ မွန်ပြည်နယ်တွေမှာ အတိုက်အခိုက်တွေရှိနေတဲ့အတွက် အရေးပေါ်ကာလအတွင်း တည်ငြိမ်အောင်လုပ်မယ်လို့ ဇူလိုင်လ ၃၁ ရက်က ပြောဆိုခဲ့ပါတယ်။
