တန့်ဆည်မြို့နယ်မှာ တိုက်ပွဲဖြစ်ပြီးနောက် အရပ်သား ငါးဦး သေဆုံး

စစ်ကိုင်းတိုင်း၊ တန့်ဆည်မြို့နယ်မှာ စစ်ကောင်စီတပ်နဲ့ ဒေသခံကာကွယ်ရေးတပ်ဖွဲ့တွေကြားမှာ ပြီးခဲ့တဲ့ မတ်လ ၁၂ ရက်နေ့က တိုက်ပွဲဖြစ်ပွားခဲ့ပြီးနောက် အရပ်သား ငါးဦး သေဆုံးခဲ့ရတယ်လို့ တန့်ဆည်မြို့နယ် ပြည်သူ့ ကာကွယ်ရေးတပ်ဖွဲ့ရဲ့ ပြောရေးဆိုခွင့်ရှိသူတစ်ဦးက RFA ကို ဒီနေ့ ပြောပါတယ်။

မတ်လ ၁၂ ရက်နေ့ မနက်ပိုင်းမှာ တန့်ဆည်မြို့နယ် စိမ်းစားရွာက ပျူစောထီးတစ်ယောက် အသတ်ခံရပြီးနောက် စိမ်းစားရွာနဲ့ ၉ မိုင်လောက်ဝေးတဲ့ ရေဦးမြို့နယ်ထဲမှာ အခြေစိုက်ထားတဲ့ စစ်တပ်က တန့်ဆည်ဘက်ကို ချက်ချင်းရောက်လာရာကနေ တိုက်ပွဲဖြစ်ပွားခဲ့တာလို့ သူက ပြောပါတယ်။

စိမ်းစားရွာကို စစ်တပ်က ဆက်လက်ဝင်ရောက်လာပြီးနောက် နေအိမ် ငါးလုံး မီးရှို့ခံခဲ့ရသလို စိမ်းစားရွာနဲ့ ကပ်လျက် ချောင်းရိုးရွာကိုလည်း အလားတူဝင်ရောက်လာပြီးနောက် နေအိမ် ခုနစ်လုံးနဲ့ ကြက်ခြံတွေ မီးရှို့ခံခဲ့ရတယ်လို့ ဆိုပါတယ်။

စိမ်းစားရွာမှာတော့ ထွက်မပြေးနိုင်ဘဲ အိမ်မှာကျန်နေခဲ့တဲ့ အသက် ၇၀ ကျော် အဘွားအိုတစ်ဦး မီးရှို့ခံရတဲ့အိမ်ထဲ ပါသွားသလို ချောင်းရိုးရွာမှာလည်း နေအိမ်တွေ မီးရှို့ခံရလို့ ထွက်ပြေးလာတဲ့ ဦးသန်းစစ်နဲ့ သားဖြစ်သူ ကိုကျော်မင်းခိုင်တို့မှာလည်း ခေါင်းနဲ့ ရင်အုံတွေမှာ သေနတ်ထိမှန် ပြီးတော့ သေဆုံးသွားခဲ့တယ်လို့ ပြောတယ်။

ကျန်တစ်ယောက်ကတော့ ဦးခင်မောင်သိန်းလို့ ခေါ်တဲ့ အသက် ၇၀ ခန့်အရွယ် အဘိုးအိုတစ်ဦး ဖြစ်ပြီး သူဟာလည်း ချောင်းရိုးရွာမှာ ထွက်မပြေးနိုင်ဘဲ ကျန်ခဲ့ရာမှာ သေဆုံးခဲ့ရတာလို့ ဒေသခံတွေက ပြောပါတယ်။

တန့်ဆည်ဖြစ်စဉ်နဲ့ ပတ်သက်ပြီး မေးမြန်းနိုင်ဖို့ စစ်ကောင်စီ ပြောခွင့်ရသူ ဗိုလ်ချုပ် ဇော်မင်းထွန်း ကို RFA က ဒီနေ့ညနေ ၅ နာရီအထိ ဖုန်းနဲ့ ဆက်သွယ်ခဲ့ပေမဲ့ အကြောင်းမပြန်ပါဘူး။

ဒေသခံတွေကတော့ ဒီနေ့အချိန်အထိ ရွာတွေဆီကို မပြန်ရဲသေးသလို စစ်တပ်ကလည်း PDF တွေကို အဲဒီရွာ ပတ်ဝန်းကျင်တွေမှာ လိုက်လံ ရှာဖွေနေဆဲ ဖြစ်တယ်လို့ ဆိုကြပါတယ်။

စစ်တပ်က အာဏာသိမ်းပြီးနောက်ပိုင်းမှာ တန့်ဆည်မြို့နယ်မှာ အနည်းဆုံး ကျေးရွာ ၁၅ ရွာနဲ့ အိမ်ခြေ ၃၀၀ ဝန်းကျင် မီးရှို့ဖျက်ဆီးခံခဲ့ရတယ်လို့ ဒေသခံတွေက ပြောပါတယ်။

အာဏာသိမ်းပြီးနောက်ပိုင်း အခုနှစ် မတ်လ ၉ ရက်နေ့အထိ စစ်ကောင်စီတပ်တွေနဲ့ သူ့ လက် အောက်ခံ အဖွဲ့အစည်းတွေက မီးရှို့လို့ ပျက်စီးသွားတဲ့ လူနေအိမ်ပေါင်း ၆,၇၁၉ လုံးခန့်ရှိတယ်လို့ လွတ်လပ်တဲ့ သုတေသန အဖွဲ့တစ်ခုဖြစ်တဲ့ Data for Myanmar က သတင်းထုတ်ပြန်ထား ပါတယ်။