စစ်ကိုင်းတိုင်း ကနီ၊ ဒီပဲယင်း၊ ကျွန်းလှ၊ ခင်ဦး စတဲ့ မြို့နယ်တွေက ရွာပေါင်း ခုနစ်ရွာ မှာ မတ်လ ၅ ရက်နဲ့ ၆ ရက်နေ့တွေမှာ စစ်ကောင်စီတပ်သားတွေ ဝင်ရောက် စီးနင်းပြီးနောက် နေအိမ် ၁၃၀ ကျော် မီးရှို့ဖျက်ဆီးခံခဲ့ ရတယ်လို့ ဒေသခံတွေက RFA ကို ဒီနေ့ ပြောပါတယ်။
ကနီမြို့နယ် ချောင်းမ အရှေ့ရွာမှာ နေအိမ် ငါးလုံး၊ ချောင်းမ အနောက်ရွာမှာ နေအိမ် ၁၃ လုံးနဲ့ ကျေးလက် ကျန်းမာရေးဌာနခွဲတစ်ခု၊ ခင်ဦးမြို့နယ် ကျွန်းလယ်ရွာမှာ နေအိမ် နှစ်လုံး၊ မှန်တောရွာမှာ နေအိမ် ၂၅ လုံးနဲ့ ဒါန်းကုန်းရွာမှာ နေအိမ် ၃၅ လုံး၊ ကျွန်းလှမြို့နယ် ဝေလမူရွာမှာ နေအိမ်သုံးလုံးနဲ့ ဒီပဲယင်းမြို့နယ် ဝေဘာရွာမှာ နေအိမ် အလုံး ၅၀၊ စုစုပေါင်း ၁၃၄ လုံး ဖြစ်တယ်လို့ ဆိုပါတယ်။
အိမ်တွေအပြင် လယ်ယာသုံးပစ္စည်းတွေနဲ့ ကား၊ ဆိုင်ကယ်၊ စက်ဘီး၊ ထွန်စက် စတဲ့ သယ်ယူပို့ဆောင်ရေး ယာဉ်တွေကို မီးရှို့ဖျက်ဆီးတာ၊ တချို့ နေအိမ်တွေကိုတော့ မီးမရှို့ ပေမယ့် နေအိမ်တွေကို ဖောက်ထွင်းတာ၊ ပရိဘောဂတွေကို ရိုက်ချိုး ဖျက်ဆီးတာ တွေလည်း ရှိခဲ့တယ်လို့ ပြောကြပါတယ်။
ခင်ဦးမြို့နယ်မှာတော့ စစ်ကောင်စီတပ်တွေရဲ့ ဝင်ရောက် စီးနင်းမှုကြောင့် ရွာပေါင်း ၁၃ ရွာက ဒေသခံတစ်သောင်း ခွဲလောက် ဘေးလွတ်ရာကို တိမ်းရှောင် နေကြရတယ်လို့ ခင်ဦးမြို့နယ် ဒေသခံတစ်ဦးက ပြောပါတယ်။
စစ်ကိုင်းတိုင်းထဲမှာ နေအိမ် ၁၃၀ ကျော် ဆက်လက်မီးရှို့ခံခဲ့ရတဲ့ကိစ္စနဲ့ ပတ်သက်လို့ စစ်ကောင်စီ ပြောခွင့်ရသူ ပြန်ကြားရေး ဒုဝန်ကြီး ဗိုလ်ချုပ်ဇော်မင်းထွန်းကို RFA က ဆက်သွယ် မေးမြန်းဖို့ ကြိုစားနေဆဲ ဖြစ်ပါတယ်။
ယခင်ကတော့ အရပ်သားတွေရဲ့ နေအိမ်တွေကို မီးရှို့တာဟာ သူတို့ လက်ချက် မဟုတ်ဘူးလို့ ဗိုလ်ချုပ် ဇော်မင်းထွန်းက ငြင်းဆိုထားပါတယ်။
စစ်ရေးနဲ့ နောက်ဆက်တွဲ အကျိုးဆက်တွေကို သုတေသနပြုလုပ်နေတဲ့ Data For Myanmar အဖွဲ့ရဲ့ မတ်လ ၂ ရက်နေ့ ထုတ်ပြန်ချက်အရ စစ်တပ်က အာဏာသိမ်း လိုက်တဲ့ ၂၀၂၁ ခုနှစ် ဖေဖော်ဝါရီလ ၁ ရက်နေ့ကနေ ၂၀၂၂ ခုနှစ် မတ်လ ၁ ရက်နေ့အထိ နိုင်ငံ တစ်ဝန်းမှာ နေအိမ်အလုံးပေါင်း ၆၁၅၈ လုံး မီးရှို့ခံခဲ့ရပြီး အဲဒီအထဲမှာ စစ်ကိုင်းတိုင်းက နေအိမ် ၃၆၈၉ လုံးနဲ့ အများဆုံးဖြစ်ပါတယ်။
