စစ်ကိုင်းတိုင်း ပုလဲမြို့နယ်မှာ စစ်တပ်ရဲ့ နယ်မြေရှင်လင်းမှုတွေကြောင့် မနေ့ကစပြီး မြို့ပေါ်နဲ့ အနီးနားမှာရှိတဲ့ ကျေးရွာ ၁၀ ရွာက ဒေသခံ တစ်သောင်းခန့် ထွက်ပြေး တိမ်းရှောင်နေကြရတယ်လို့ ဒေသခံတွေက RFA ကို ဒီနေ့ ပြောပါတယ်။
ဖေဖော်ဝါရီလ ၅ ရက်နေ့ည ၈ နာရီလောက်က ပုလဲမြို့မရဲစခန်းကို ဒေသကာကွယ်ရေး တပ်ဖွဲ့တွေ ပူးပေါင်းတိုက်ခိုက်ခဲ့ကြတာပါ။
“လှော်ကားတို့၊ ကိုင်းကျွန်းတို့က ဒေသခံတွေက သူတို့ရွာနဲ့ အဝေးမှာပဲ ပုန်းနေရတယ်”
နောက်နေ့မနက်မှာပဲ မသင်္ကာတဲ့နေရာတွေကို စစ်တပ်က လက်နက်ကြီးတွေနဲ့ လှမ်းပစ် တာကြောင့် ပုလဲမြို့ပေါ်နဲ့ အနီးနားမှာရှိတဲ့ ညောင်ကုန်း၊ ကန်ကြီး၊ ဖိုကုန်း၊ ညောင်ကန်၊ ရွာသာ၊ လိပ်ကုန်း၊ ရထင်၊ အေးကုန်း၊ မြကုန်း၊ ရိုး စတဲ့ ရွာပေါင်း ၁၀ ရွာက ဒေသခံတွေ ထွက်ပြေးတိမ်းရှောင်နေကြရတာလို့ ပုလဲမြို့ခံတစ်ဦးက ပြောပါတယ်။
“မြို့အဝင်၊ အထွက်တွေကို ပိတ်လိုက်တယ်။ ဘုန်းကြီးကျောင်းတွေမှာ မီးလောင်တယ်၊ ရှို့တာမဟုတ်ဘူး။ စစ်ကောင်စီက ထုလိုက်တဲ့ လက်နက်ကြီးက မြတ်လေးအိမ် တဲပေါ် ကျပြီး လောင်သွားတယ်။ မီးလောင်တော့ မြို့ပေါ်ရှိတဲ့ ပြည်သူတွေက မနေရဲကြတော့ ဘူး။ ရှိတာလေးတွေထုတ်ပြီး ဘုန်းကြီးကျောင်းတွေကို ရွှေ့နေလိုက်တယ်။ နေ့လယ်ကျ ကိုယ်နဲ့မဆိုင်ရင် ကိုယ်အိမ်ကိုပြန်ဆိုပြီး ဆက်သွယ်မရအောင် ဖုန်းဆင်းကဒ် နှုတ်လိုက် တယ်။ အဲဒါတော့ အတိအကျ မသိရဘူး။ ရွှေတို၊ ငွေစတွေ ပါတာတွေတော့ ယူသွား တယ်”
ဒေသခံတွေဟာ ဘုန်းကြီးကျောင်းတွေနဲ့ နီးစပ်ရာကျေးရွာတွေကို ထွက်ပြေးတိမ်းရှောင် နေကြရတာလို့လည်း ဒေသခံတွေက ပြောပါတယ်။
ဖေဖော်ဝါရီလ ၅ ရက်နေ့ည မြို့ပေါ်တိုက်ပွဲအပြီးမှာပဲ အင်အား ၃၀ ဝန်းကျင်ရှိတဲ့ စစ် ကောင်စီ တပ်သားတွေဟာ မြို့နဲ့အနီးဝန်းကျင်ကျေးရွာတွေဘက်ကို ရောက်ရှိလာတာလို့ ဒေသခံတွေက ပြောပါတယ်။
အဲဒီစစ်ကြောင်းက ဒေသခံတွေကို ဖမ်းဆီးစစ်ဆေးတာတွေရှိခဲ့တယ်လို့ စစ်ကောင်စီတပ် ဖွဲ့ကို တိုက်ခိုက်နေတဲ့ ကျားသစ်နက် အဖွဲ့က ကိုဖိုးသားက ပြောပါတယ်။
“မနေ့ကတော့ ဒီကောင်တွေ မြို့ပေါ်မှာ စစ်တပ်အင်အား အလုံးအရင်းနဲ့ ဝင်ရောက် လာပါတယ်။ ဝင်ရောက်လာပြီး မြို့ရဲ့ နှစ်မိုင်အကွာ ရွာတွေမှာ စစ်ကြောင်းထိုးပါတယ်။ စစ်ကြောင်းထိုးတဲ့အခါမှာ တာဝေးပစ်တွေနဲ့ပစ်ပြီး ဝင်ရောက်ပြီး လူငယ်၊ လူကြီးတွေကို ရိုက်တယ်၊ ဖုန်းတွေသိမ်းတယ်လို့ သတင်းကြားပါတယ်။ ဖမ်းဆီးခံရတာတော့ ခဏ တဖြုတ်ပဲ ပြီးတော့ ပြန်လွှတ်တယ်လို့ ကြားပါတယ်ခင်ဗျ။ ဝင်ရောက်တဲ့ လမ်းကြောင်း တွေ အားလုံးကို တပ်တွေဖြန့်ပြီး ဆင်းတဲ့အခါမှာ ပုလဲမြို့နယ်နဲ့နီးတဲ့ ရွာတော်တော် များများက ရှောင်တိမ်းသွားကြပြီ ရွာလုံးကျွတ် တချို့ရွာတွေဆို ပြေးနေကြရပြီခင်ဗျ”
အင်အားမမျှပေမယ့် စစ်ကောင်စီတပ်ကို အတတ်နိုင်ဆုံး ခုခံသွားမယ်လို့ ကျားသစ်နက် အဖွဲ့က ပြောပါတယ်။
ကျေးရွာ ၁၀ ရွာက ဒေသခံတွေ ထွက်ပြေးတိမ်းရှောင်နေကြရတဲ့ ကိစ္စနဲ့ပတ်သက်လို့ မေးမြန်းနိုင်ဖို့ စစ်ကောင်စီ ပြောခွင့်ရသူ ဗိုလ်ချုပ် ဇော်မင်းထွန်းကို RFA က ဖုန်းနဲ့ ဆက်သွယ်မေးမြန်းဖို့ ကြိုးစားခဲ့ပေမယ့် ဒီနေ့ညနေ ၃ နာရီခွဲလောက်အထိ အကြောင်း မပြန်သေးပါဘူး။
စစ်ကောင်စီရဲ့ မနေ့ကထုတ်ပြန်ချက်မှာတော့ ပုလဲမြို့မရဲစခန်း တိုက်ခိုက်ခံရတဲ့ကိစ္စ နဲ့ဆက်နွယ်ပြီး လုံခြုံရေး တပ်ဖွဲ့ဝင်တွေနဲ့ နယ်မြေခံစစ်ကြောင်းတွေ ပူးပေါင်းပြီးတော့ လုံခြုံရေးဆောင်ရွက်နေတယ်လို့ ပါရှိပါတယ်။
စစ်ကိုင်းတိုင်း၊ ပုလဲမြို့နယ်ထဲမှာ ပြီးခဲ့တဲ့ ဇန်နဝါရီ ၃၁ ရက်နေ့ကနေ လက်ရှိ ဖေဖော်ဝါရီ ၇ ရက်အတွင်း မွေ့တုံရွာ၊ ပန်းရွာ၊ ကိုင်းကြီး၊ လှော်ကား စတဲ့ရွာလေးရွာက နေအိမ် တစ် ထောင်ကျော် မီးရှို့ခံခဲ့ရပါတယ်။
ဖေဖော်ဝါရီလ ၅ ရက်နေ့ မြို့ပေါ်တိုက်ပွဲအပြီး စစ်ကေင်စီဘက်က စစ်ကြောင်းလှုပ်ရှားမှု တွေကြောင့် အဲဒီရွာတွေက ဒေသခံတွေပါ ဆက်လက်တိမ်းရှောင်နေကြရဆဲဖြစ်တယ်လို့ မွေ့တုံရွာက ဒေသခံတစ်ဦးက ပြောပါတယ်။
“ရွာကို မပြန်နိုင်ကြသေးဘူးခင်ဗျ။ မွေ့တုံရွာရော၊ ပန်းရွာရော၊ လှော်ကားရွာရော အဲဒီ နားလေးကလူတွေ ရွာကို မပြန်ရဲကြသေးဘူး။ ဘာကြောင့်မပြန်ရဲကြသေးလဲဆိုတော့ ဒီစစ်ခွေးတွေက ပုလဲပတ်ဝန်းကျင်မှာလည်းရှိတယ်။ လှော်ကား ပတ်ဝန်းကျင် ဥပမာဆို အင်ကြင်းစုမှာလည်းရှိတယ်။ အဲဒီအခါကျတော့ လှော်ကားတို့၊ ကိုင်းကျွန်းတို့က ဒေသခံ တွေက သူတို့ရွာနဲ့ အဝေးမှာပဲ ပုန်းနေရတယ်။ အဲဒီတော့ ပုလဲပတ်ဝန်းကျင်ဆိုရင် အခု အချိန်အထိ ရှောင်နေကြရတုန်းပဲ”
ဒီနေ့ ဖေဖော်ဝါရီ ၇ ရက်နေ့ မနက်ပိုင်းမှာတော့ အခြေအနေ ငြိမ်သက်နေတယ်လို့ မွေ့တုံ ဒေသခံက ပြောပါတယ်။
ဒါပေမဲ့ ပုလဲမြို့နယ်အတွင်းမှာ စစ်ကောင်စီတပ်နဲ့ ဒေသကာကွယ်ရေးတပ်ဖွဲ့တို့အကြား အခြေအနေတွေ တင်းမာနေဆဲဖြစ်တယ်လို့ ဒေသခံတွေက ပြောပါတယ်။
