မြန်မာစစ်ကောင်စီရဲ့ အကြမ်းဖက်မှုတွေကို ချက်ချင်းရပ်တန့်ဖို့ တောင်းဆိုကြောင်း အမေရိကန်နိုင်ငံခြားရေးဝန်ကြီး အန်တိုနီ ဂျေ ဘလင်ကန်က တိုက်တွန်းလိုက်ပါတယ်။
ဇန်နဝါရီလ ၄ ရက်နေ့မှာ ကျရောက်တဲ့ မြန်မာနိုင်ငံရဲ့ ၇၄ နှစ်မြောက် လွတ်လပ်ရေးနေ့အတွက် အမေရိကန်ပြည်ထောင်စုကိုယ်စား ပေးပို့တဲ့ သဝဏ်လွှာမှာ တိုက်တွန်းပြောကြားလိုက်တာပါ။
အမေရိကန်ပြည်ထောင်စုအနေနဲ့ မြန်မာနိုင်ငံ ဒီမိုကရေစီလမ်းကြောင်းပေါ်ပြန်လည်ရောက်ရှိရေး၊ လူ့အခွင့်အရေးကို လေးစားလိုက်နာရေးနဲ့ နိုင်ငံအတွင်း တရားဥပဒေ စိုးမိုးရေးတို့အတွက် ကြိုးပမ်းအားထုတ်နေကြတဲ့ မြန်မာပြည်သူတွေကို ဂုဏ်ပြုပါကြောင်း၊ စစ်အာဏာရှင်ရဲ့ နှိပ်စက်မှုတွေ ခံစားနေရကြရပေမဲ့ ပိုပြီးကောင်းမယ့် အနာဂတ်ရဖို့ မျှော်လင့်ချက်ကို မစွန့်လွှတ်ကြတဲ့ မြန်မာပြည်သူတွေအတွက် အမေရိကန်ပြည်ထောင်စုရဲ့ ရပ်တည်ချက်က ပြောင်းလဲမသွားပါကြောင်းလည်း ထုတ်ပြန်ချက်မှာ ပြောကြားထားပါတယ်။
ဒါ့အပြင် မတရားထိန်းသိမ်းထားသူ အားလုံးကို လွှတ်ပေးဖို့၊ စစ်မှန်ပြီး အားလုံးပါဝင်နိုင်တဲ့ ဒီမိုကရေစီ လမ်းကြောင်းပေါ် မြန်မာနိုင်ငံကို ပြန်လည် ပို့ဆောင်ပေးဖို့ စစ်အာဏာရှင်ကို ထပ်မံတောင်းဆိုကြောင်းလည်း ရေးသားထားပါတယ်။
