ကယားပြည်နယ် အတွင်း ဒီဇင်ဘာလ ၂၄ ရက်နေ့က လူသားချင်း စာနာမှုဝန်ထမ်း ၂ ဦးအပါအဝင် အရပ်သား ၃၅ ဦးထက်မနည်း အသတ်ခံခဲ့ရတဲ့ပေါ် ရှုတ်ချကြောင်းနဲ့ ကုလသမဂ္ဂ လုံခြုံရေးကောင်စီနဲ့ အရှေ့တောင်အာရှ နိုင်ငံများ အသင်း ASEAN တို့ အနေနဲ့ ချက်ချင်း အရေးယူ ဆောင်ရွက်မှုတွေ လုပ်ဖို့ မြန်မာနိုင်ငံတွင်းက လူသားချင်း စာနာမှုဆိုင်ရာ အဖွဲ့အစည်း ၁၄ ဖွဲ့က ဒီဇင်ဘာလ ၃၁ ရက်နေ့မှာ လက်မှတ်ရေးထိုး တောင်းဆိုလိုက်ပါတယ်။
အခုလိုအရပ်သားတွေနဲ့ လူမှု ကူညီရေး လုပ်သားတွေကို ကမ်းကုန်လောက်အောင် ဆိုးရွားတဲ့ တိုက်ခိုက်မှု အတွက် အလွန်ကိုဘဲ မခံမရပ်နိုင် ဖြစ်ရကြောင်းနဲ့ ဒီကိစ္စ အတွက် တာဝန်ရှိသူတွေကို အရေးယူရမယ်လို့ ကြေညာချက်မှာ ဖော်ပြပါတယ်။
အရပ်သားတွေနဲ့ လူသားချင်း စာနာမှု ဆိုင်ရာ ဝန်ထမ်းတွေကို မတိုက်ခိုက်ဖို့ နိုင်ငံတကာ လူသားချင်း စာနာမှု ဆိုင်ရာ ဥပဒေတွေက တင်းတင်းကြပ်ကြပ် တားမြစ်ထားကြောင်းနဲ့ လူသားချင်း စာနာမှု ဆိုင်ရာ အကူအညီတွေ ပိုမို လိုအပ်နေချိန်မှာ အခုလို တိုက်ခိုက်မှုတွေကြောင့် ကူညီထောက်ပံ့ရေး ဝန်ထမ်းတွေ အတွက် ကြီးမားတဲ့ အန္တရာယ် ဖြစ်ပြီး အကူအညီ လိုသူတွေထံ ရောက်ရှိဖို့ အကန့်အသတ်တွေ ဖြစ်စေတယ်လို့လည်း ဖော်ပြပါတယ်။
ဝန်ထမ်း ၂ ဦးအသတ်ခံရတဲ့ Save the Children အဖွဲ့နဲ့ အတူရှိကြောင်းနဲ့ လူသားချင်း စာနာမှုဆိုင်ရာ ဝန်ထမ်းတဦး တိုက်ခိုက်ခံရတာဟာ အားလုံးတိုက်ခိုက် ခံရတာဘဲဖြစ် တယ်လို့ ၁၄ ဖွဲ့က ဖော်ပြထားပါတယ်။
ASEAN အနေနဲ့ ဒီကိစ္စနဲ့ ပတ်သက်ပြီး အရေးပေါ် အစည်းအဝေး ခေါ်ယူပြီး အကြမ်းဖက်မှုတွေ ရပ်တန့်ဖို့ တောင်းဆိုထားတဲ့ အချက် ၅ ချက်ကို အကောင်အထည်ဖော် လုပ်ဆောင်ဖို့ တိုက်တွန်းကြောင်း၊ ဒါ့အပြင် ကုလသမဂ္ဂ လုံခြုံရေး ကောင်စီနဲ့ အဖွဲ့ဝင် နိုင်ငံတွေ အနေနဲ့လည်း အရပ်သားတွေနဲ့ ကူညီထောက်ပံ့ရေး လုပ်သားတွေကို နောက်ထပ် တိုက်ခိုက် မခံရအောင် အရေးယူ ဆောင်ရွက်မှုတွေ လုပ်ဖို့ တိုက်တွန်းပါကြောင်း အဖွဲ့ ၁၄ ဖွဲ့က တောင်းဆိုထားပါတယ်။
အဲဒီ အဖွဲ့ ၁၄ ဖွဲ့ထဲမှာ Christina Aid, IRC, Norwegian Aid, Danish Refugee Council တို့လို အဖွဲ့တွေလည်း ပါဝင်ပါတယ်။
