စစ်ကိုင်းတိုင်း ကလေးမြို့ပြင်ကို လေတပ်နှင့် ကြည်းတပ် ဝင်တိုက်စဉ် တိုက်ပွဲအတွင်း ပိတ်မိသူတို့သေဆုံးသည်ဟု ဒေသခံများက ပြောသည်၊ စစ်ကောင်စီကမူ PDF တို့ သေဆုံးခြင်းဖြစ်သည် ဆိုသည်။
စစ်ကိုင်းတိုင်း၊ ကလေးမြို့တောင်ပိုင်းတွင် စစ်ကောင်စီ၏ လေတပ်နှင့် ကြည်းတပ် လက်ချက်ကြောင့် သက်ကြီးရွယ်အိုများအပါအဝင် အရပ်သား ၂၀ သေဆုံးပြီး အိမ် ၅၇ လုံး မီးလောင်သွားကြောင်း ဒေသခံများနှင့် ပြည်သူ့ကာကွယ်ရေးအဖွဲ့ (ပ.က.ဖ) က ပြောသည်။
ချင်းပြည်နယ်နှင့် စစ်ကိုင်းတိုင်းနယ်စပ် နတ်ချောင်း၊ နတ်မြောင်း၊ ချောင်းခွ၊ ဟားခါးလေး စသည့် ရွာများတွင် တိုက်ပွဲပြင်းထန်စဉ် သေဆုံးမှုနှင့် ပတ်သက်ပြီး စာရင်းပြုစုထားသည်ဟု ပကဖအဖွဲ့က ပြောသည်။
လေကြောင်းမှ တိုက်ခိုက်ခံရသော နတ်ချောင်းရွာမှ သေဆုံးသူ အရပ်သားများထဲတွင် ၆ ဦးကို အမည်၊ အသက် မသိရှိရသေးပေ။
စာရင်းတွင် ၇၂ နှစ် အရွယ် ဦးထူးအောင်၊ ၆၂ နှစ်အရွယ် ဦးမင်းဒင်၊ ၆၀ အရွယ်များဖြစ်ကြသော ဒေါ်ဝင်းမြင့်ရီနှင့် ဦးအေးကို၊ ၅၈ နှစ်အရွယ် ဦးမောင်ကြည်၊ ၅၇ နှစ်အရွယ် ဦးဌေးမောင်တို့ ပါဝင်ပြီး ကျန်သေဆုံးသူတို့မှာ အသက် ၂၀ ၀န်းကျင်နှင့် ၄၀ ဝန်းကျင်ကြား ဖြစ်ကြသည်ဟု သိရသည်။
တိုက်ပွဲကာလ ချက်ချင်းတိမ်းရှောင်နိုင်သူတို့သာ ဘေးလွတ်ရာသို့ ရောက်သွားကြသည်ဟု လုံခြုံရေးအရ အမည်မဖော်လိုသော နတ်ချောင်းဒေသခံတစ်ဦးက ရှင်းပြသည်။
အပြစ်ရှိသူတို့သာ ထွက်ပြေးကြောင်း၊ အပြစ်မရှိသူတို့ကို ထိခိုက်အောင် ပြုလုပ်မည် မဟုတ်ကြောင်း ရွာသို့ အကြိမ်ကြိမ်ဝင်ရောက်ဖူးခဲ့သော စစ်ကောင်စီတပ်သားတို့က သတင်းဖြန့်ခဲ့ကြောင်း၊ အဆိုပါဝါဒဖြန့်ချက်ကြောင့် ရွာသားတချို့ တွေဝေသွားကြကြောင်း အဆိုပါ အသက် ၄၀ အရွယ် အမျိုးသားက ပြောသည်။
“ရွာထဲကို သူတို့ ဖြတ်တိုင်းဖြတ်တိုင်း အဲလိုစကားတွေ ပြောတယ်။ ဒီလိုအနေအထားမှာ လေပေါ်ကနေ ပစ်တော့ လက်နက်ကြီးတွေ ပစ်တာမျိုးတွေ၊ ရွာထဲမှာ လှည့်ပြီးတော့ စစ်ဆေးမေးမြန်းပြီး ပစ်သတ်တာမျိုးတွေ လုပ်တယ်” ဟု ၎င်းက ဆိုသည်။
စစ်ကောင်စီတပ်သားတို့ ရွာမှ ထွက်ခွာသွားမှန်း သေချာမှ ရွာထဲ ဝင်ပြီး ကူညီကယ်ဆယ်ရေးလုပ်ငန်း ပြန်လုပ်နိုင်ခြင်းဖြစ်သည်ဟု သိရကြောင်း တိုင်းဒေသကြီးလွှတ်တော် ကလေးမဲဆန္ဒနယ် ၁ မှ ရွေးကောက်ခံထားရသူ ဒေါ်သန့်ဝေကျော်က ပြောသည်။
“တချို့အလောင်းတွေက လမ်းပေါ်မှာ။ အခု ဝင်တဲ့အချိန်မှာ ကောက်လို့ မရတော့လို့ကို လမ်းပေါ်တင် မီးရှို့လိုက်ရတယ်။ ရက်ကြာလို့” ဟု ထိုရွာနှင့် အဆက်အသွယ်ရှိသော ဒေါ်သန့်ဝေကျော်က Myanmar Now ကို ပြောသည်။
နတ်ချောင်းရွာ လမ်းမပေါ်၌ ရက်အတန်ကြာကပင် ပစ်သတ်ခံရထားရသူတချို့၏ ရုပ်ကလာပ်များကို ကောက်ယူရန် အခြေအနေမပေးသဖြင့် သေဆုံးရာနေရာ၌ပင် ပြည်သူ့ကာကွယ်ရေးအဖွဲ့က မီးသင်္ဂြိုဟ်ပေးခဲ့သည်။ ( ဓာတ်ပုံ − ပေးပို့)
စစ်ကောင်စီတပ်က ထိုဒေသတွင် ဆက်ရှိနေပြီး သေဆုံးသူတို့၏ မိသားစုဝင်များ ရှောင်တိမ်းနေရသည်။ ၎င်းတို့ကို ဆက်သွယ်မေးမြန်းနိုင်ခြင်း မရှိသေးပေ။
တိုက်ပွဲကာလ စစ်ကောင်စီတပ် မီးရှို့သွားသည့် နေအိမ်အရေအတွက်မှာ နတ်ချောင်းတွင် အိမ်ခြေ ၃၈ လုံး၊ ချောင်းခွတွင် ၁၈ လုံး၊ ဟားခါးလေးတွင် ၁ လုံး ဖြစ်သည်ဟု သိရသည်။
ကျေးရွာ ၃ ရွာခန့်၏ သေဆုံးပျက်စီးမှုကို မသိရသေးကြောင်း ပကဖအဖွဲ့ တာဝန်ရှိသူတစ်ဦးက ပြောသည်။
နတ်ချောင်း၊ နတ်မြောင်းဒေသရှိ အနည်းဆုံး ကျေးရွာ ၆ ရွာမှ ရွာလုံးကျွတ်မှ လူဦးရေ သောင်းဂဏန်းကျော် ရွာလုံးကျွတ်ထွက်ပြေးတိမ်းရှောင်နေရပြီး အများအပြားမှာ ချင်းပြည်နယ်၊ ဝေဘူလမြို့ဘက်တွင် ရှိနေကြောင်း၊ အနွေးထည်၊ စောင်၊ စားနပ်ရိက္ခာ အဓိကလိုအပ်နေကြောင်း ဒေသခံတစ်ဦးထံမှ သိရသည်။
“ရက်ရှည်လာရင် စားနပ်ရိက္ခာ လိုလာမယ်။ ခက်တာက စားနပ်ရိက္ခာပို့မယ်ဆိုရင်တောင် ဘယ်က ပို့မလဲဆိုတဲ့ ပြဿနာရှိတယ်။ ဝေဘူလဘက် ရှောင်နေတဲ့ စစ်ရှောင်တွေအတွက် ခုအနေအထားဆို ဘာမှ ပို့လို့ မရဘူး။ မြေပြန့်ကနေ သူတို့က လမ်းကြောင်းမှာ ထိုင်ထားတာကိုး” ဟု ၎င်း ကဆိုသည်။
စစ်ကောင်စီတပ်သည် ဒီဇင်ဘာ ၂၂ မှ စ၍ နတ်ချောင်းရွာအထက်တန်းကျောင်းတွင် တပ်စွဲခဲ့သည်။
နောက်တစ်နေ့တွင် ဒေသခံ ပြည်သူ့ကာကွယ်ရေးတပ်ဖွဲ့များဖြစ်သော ကလေး(PDF)၊ ချင်းအမျိုးသားကာကွယ်ရေးတပ် (CNDF)၊ ပြည်သူ့ကာကွယ်ရေးအဖွဲ့ (ပ.က.ဖ) တို့ ပူးပေါင်းကာ ထိုနေရာကို ပိတ်ဆို့တိုက်ခိုက်ခဲ့သည်။
ထိုတိုက်ပွဲတွင် စစ်ရဟတ်ယာဉ် ၂ စီး လာရောက်ပစ်ခတ်ပြီး ဒီဇင်ဘာ ၂၆ တွင် ရဟတ်ယာဉ် ၃ စီးဖြင့် စစ်သည်နှင့် လက်နက်အင်အား ဖြည့်တင်းကြသည်ကို တွေ့ရကြောင်း ဒေသခံတို့က ပြောသည်။
ဒီဇင်ဘာ ၂၂ မှ ၂၉ အတွင်း သီတင်းတစ်ပတ်ကျော် တိုက်ပွဲတွင် စစ်ကောင်စီဘက်မှ ၅၇ ဦး ကျဆုံးသည်ဟု ကလေး (PDF) ၏ ထုတ်ပြန်ချက်များကို စုစည်းတွက်ချက်မှုအရ သိရသည်။
အဆိုပါ ကိန်းဂဏန်းကို Myanmar Now အနေဖြင့် သီးခြား အတည်ပြုနိုင်ခြင်း မရှိသေးပါ။
စစ်ကောင်စီက သတင်းထုတ်ပြန်ရာတွင် PDF ( ၉) ဦး သေဆုံးသည်ဟု ဖော်ပြထားသည်။ PDF ကမူ သေဆုံးသူတို့မှာ အရပ်သားများဖြစ်သည်ဟု တုံ့ပြန်ထားသည်။
တိုက်ပွဲဖြစ်ပွားရာ ဒေသမှာ လက်နက်ကိုင်တော်လှန်ရေး အားအလွန်ကောင်းသော ချင်းပြည်နယ်သို့ သွားရောက်ရန် လမ်းကြောင်းများအနက် တစ်ခုဖြစ်၍ မဟာဗျူဟာကျသော နယ်မြေဖြစ်နေသည်။
အာဏာသိမ်းစစ်ကောင်စီတပ် ချင်းပြည်နယ်တွင်လည်း အရပ်သားများကို သတ်ဖြတ်ကာ နေအိမ်များကို မီးရှို့ခဲ့သည်ဟု ဒေသခံတို့ထံမှ သိရသည်။
ချင်းဒေသမီးရှို့မှုနှင့် ပတ်သက်ပြီး နိုင်ငံတကာကလည်း အပြင်းအထန်ကန့်ကွက်နေချိန်တွင် စစ်ကောင်စီက ထိုရှို့မီးမှာ ဒေသခံ လက်နက်ကိုင်တို့၏လက်ချက်ဖြစ်သည်ဟု အကြိမ်ကြိမ် သတင်းထုတ်ပြန်နေသည်။
