ယခုအခါ စစ်ကောင်စီ ခေါင်းဆောင်များသည် ကျေးလက်ဒေသမှ ကြီးထွားလာနေသော လက်နက်က်ိုင်ခုခံမှုနှင့် ပြည်သူ့ကာကွယ်ရေးတပ် (PDF) လှုပ်ရှားမှုကို အာရုံစ်ိုက်နေကြောင်း နေပြည်တော်ရှိ စစ်ဖက်လုံခြုံရေးရာ အသိုက်အဝန်းနှင့် နီးစပ်သည့် သတင်းရင်းမြစ်များက ပြောသည်။ ပြည်သူ့ကာကွယ်ရေးတပ်များနှင့် ရွာသားများကို “ရှင်းလင်းရန်” အမိန့်ကို ယခုလအတွင်း ထုတ်ပြန်ခဲ့ကြောင်း သိရသည်။
ထိုကိစ္စကို သိရှိသော သတင်းရင်းမြစ်များ၏ အဆိုအရ အောက်တိုဘာလ ၁၃ ရက်နေ့တွင် ဒု ဗိုလ်ချုပ်မှူးကြီး စိုးဝင်းက PDFs များကို အမြစ်ဖြတ် ချေမှုန်းရန် သူ၏တပ်မှူးများနှင့် တပ်ဖွဲ့များအားလုံးကို အမိန့်ထုတ်ပြန်ကြောင်း သိရသည်။
ထိုသို့ အမြစ်ဖြတ် ချေမှုန်းရန် အမိန့်နှင့်အတူ စိုးဝင်းက ရွာသားများနှင့် PDF များ ဆက်သွယ်ခြင်းကို တားမြစ်သည့် အမိန့်နှင့် ထိုအမိန့်ကို မလိုက်နာပါက ပြင်းထန်စွာ ဒဏ်ခတ်ရန်လည်း အမိန့်ပေးခဲ့သည်။
ခြေလျင်တပ်များ၏ အကြီးအကဲနှင့် အာဏာသိမ်း ဒုခေါင်းဆောင် ဖြစ်သော စိုးဝင်းသည် PDF များကို ချက်ခြင်း ရှာဖွေ တိုက်ခိုက်ရန် အမိန့်ပေးခဲ့ပြီး ကျေးရွားများတွင် ပုန်းအောင်းနေသူများ အားလုံးကို ဖမ်းဆီးရန်လည်း ပြောသည်။
ယခုအခါ စစ်ခေါင်းဆောင်များသည် တိုင်းရင်းသားဒေသများတွင် ၎င်းတို့ ယခင်က ကျင့်သုံးခဲ့သည့် ဖြတ် ၄ ဖြတ် သေနင်္ဂဗျူဟာကို ကျင့်သုံးနေပြီး PDF များ ရိက္ခာ၊ ရန်ပုံငွေ၊ ထောက်လှမ်းရေးသတင်းနှင့် လူသစ် မရရှိအောင် ပိတ်ဆို့နေသည်။
PDF အများအပြားသည် ပြည်တွင်းပြည်ပရှိ မြန်မာနိုင်ငံသားများထံမှ ရန်ပုံငွေကို မှီခိုနေရသည်။
အရပ်သား အမျိုးသား ညီညွတ်ရေးအစိုးရ (NUG)က အာဏာသိမ်း စစ်ကောင်စီကို စစ်ကြေညာလိုက်သည့် အချိန်မှစတင်ပြီး စစ်ကောင်စီတပ်များသည် နိုင်ငံတဝှမ်းမှ PDF များ၏ ပိုမိုများပြားလာသော တိုက်ခိုက်မှုများကို ခံနေရသည်။
လွန်ခဲ့သော လများအတွင်းက မြန်မာစစ်တပ်သည် စစ်ကိုင်းတိုင်း၊ ချင်းပြည်နယ်နှင့် ကယားပြည်နယ်များတွင် လုပ်သေနတ်များ ကိုင်ဆောင်ထားသည့် PDF တပ်များနှင့် တိုက်ခိုက်ရာတွင် အကြီးအကျယ် အထိနာခဲ့ရသည်။
စစ်ကောင်စီသည် ၎င်းတို့ ရင်ဆိုင်ရန် ပြင်ဆင်မထားသည့် လက်နက်ကိုင်အုံကြွမှု ပုံစံသစ်ကို ရင်ဆိုင်နေရကြောင်းနှင့် ကြီးထွားလာနေသော ခုခံပုန်ကန်မှုကို ထိန်းချုပ်ရန် စွမ်းရည်မရှိကြောင်း သုတေသီများပြောသည်။
စက်တင်ဘာလမှ စတင်ပြီး စစ်ကောင်စီသည် အရပ်သားခုခံရေး တပ်များကို ရှင်းလင်းသည့် စစ်ဆင်ရေးများ ပြုလုပ်ရန်အတွက် န်ိုင်ငံမှ မတည်ငြိမ်ဆုံး ဒေသများသို့ တပ်ကူအနည်းဆုံး တပ်ရင်း ၄ ရင်း (စစ်သား ၃၀၀၀ ခန့်) ကို စေလွှတ်ခဲ့ကြောင်း ဒေသခံလက်နက်ကိုင်တပ်များ၏ အဆိုအရ သိရသည်။
မတ်လနှင့် ဧပြီလအတွင်းက ရန်ကုန်၊ မန္တလေးနှင့် ပဲခူးတို့တွင် ဆန္ဒပြပွဲများဖြစ်ပေါ်သောအခါ ထိုစစ်ကောင်စီ ဆန့်ကျင်ရေး ဆန္ဒပြသမားများကို တွေ့ရာနေရာတွင် ရှင်းလင်းရန် မြေပြင်မှ စစ်ကောင်စီတပ်များကို ညွှန်ကြားခဲ့ကြောင်း ဧရာဝတီသတင်းဌာနက သိရသည့် နေပြည်တော်မှ အဆင့်မြင့်အရာရှိများက ထုတ်ပြန်သည့် ဌာနတွင်းအမိန့်စာများအရ သိရသည်။
“သူတို့ကို ရင်ဆိုင်တွေ့ရင် ရှင်းလင်းပစ်ပါ။ ဆူပူသူတွေက ငြိမ်းချမ်းစွာ ဆန္ဒပြရာကနေ လက်နက်ကိုင်အကြမ်းဖက်တဲ့ အဆင့်ရောက်လာပြီ” ဟု စစ်ကောင်စီ သုံးနေကျ စကားများဖြင့် ဧပြီလ ၁၁ ရက်နေ့က ထုတ်ပြန်သည့် ထိုအမိန့်တွင် ဖေါ်ပြထားသည်။
ထိုအမိန့်ကို ဒုဗိုလ်ချုပ်မှူးကြီး စိုးဝင်းကပဲ ထုတ်ပြန်ခဲ့ပြီး သူသည် နိုင်ငံတဝှမ်းမှ အထူးစစ်ဆင်ရေးအဖွဲ့များနှင့် ညှိနှိုင်းပြီး စစ်ကောင်စီတပ်များကို စီမံရာတွင် အရေးပါသော ခေါင်းဆောင်တဦးဖြစ်လာနေသည်။
