မိုးသည်းထန်စွာ ရွာသွန်းမှုကြောင့် မကွေးတိုင်း၊ ဂန့်ဂေါမြို့နယ်တွင် မြစ်သာမြစ်ရေ မြင့်တက်လာပြီး စစ်ဘေးရှောင် နေသည့် ဒေသခံ ပြည်သူများ ရေဘေးပါ ထပ်မံ တိမ်းရှောင်နေရကြောင်း ဒေသခံသတင်းရင်းမြစ်များထံမှ သိရသည်။
စစ်ကောင်စီက ရွာအတွင်း မကြာခဏ ဝင်ရောက်စီနင်းပြီး နေအိမ်များ မီးရှို့ခံရသည့် နှမ်းခါးရွာတွင် ဒေသခံပြည်သူ ထောင်နှင့်ချီကာ မြစ်သာမြစ် တဖက်ကမ်းတွင် စစ်ဘေးရှောင်နေရခြင်း ဖြစ်ပြီး မြစ်ရေ မြင့်တက်လာမှုကြောင့် ထပ်မံ ရှောင်တိမ်းနေရခြင်း ဖြစ်ကြောင်း ဒေသခံများ၏ ပြောပြချက်အရ သိရသည်။
မိုးသည်ထန်စွာ ရွာသွန်းမှုကြောင့် မြစ်သာမြစ်ရေမြင့်တက်နေပြီး မြစ်သာတမံရေပိုလွှဲမှလည်း အမြင့် ၅ ပေထက် မနည်း ရေလျှံကျနေကြောင်း သိရသည်။
နှမ်းခါးရွာ ဒေသခံတဦးက “မြစ်သာမြစ်ရိုး တလျှောက်ရှောင်နေရတာ အဓိကက နှမ်းခါးကပဲများမှာ မြစ်ရဲ့ အနောက်ဖက် ကပ်လျက်မှာ တည်ရှိတာကိုး။ မြစ်ရဲ့ တဖက်ကမ်းမှာ ရှောင်တာ စစ်ကောင်စီက ရွာထဲကို ဝင်ပြီဆိုရင် မြစ်ရဲ့ ဟိုဘက်ကမ်းကို ရှောင်ရတာ အဲဒီမှာက ကျွန်းလို ဖြစ်နေတော့ အဲဒီမှာ တဲလိုထိုးနေတာ အဲဒီထိပါ ရေရောက်နေလို့ ထပ်ရှောင်ရတာ” ဟု ပြောသည်။
စစ်ဘေးရော ရေဘေးပါရှောင်နေရသည့် ဒေသခံများ အနေဖြင့် စားနပ်ရိက္ခာနှင့် ဆေးဝါးလိုအပ်ချက်များ ရှိနေကြောင်း ဆိုသည်။
မြစ်ရေမြင့်တက်လာမှုကြောင့် မြစ်သာမြစ်ရိုးတလျှောက်ရှိ ကျေးရွာများတွင် တံတားများ နှစ်မြုပ်ပြီး လူနေအိမ်များလည်း ဘေးလွတ်ရာသို့ ရွှေ့ပြောင်းထားရကြောင်း သိရသည်။
အောက်တိုဘာ ၂၂ ရက်နေ့မှ ၂၄ ရက်နေ့အထိ မကွေးတိုင်း၊ မန္တလေး၊ စစ်ကိုင်း၊ ပဲခူး နှင့် ရန်ကုန်တိုင်းတို့တွင် နေရာကွက်ကျား မိုးထစ်ချုန်းရွာနိုင်ကြောင်း အမျိုးသားညီညွတ်ရေး အစိုးရ လက်အောက်ရှိ လူသားချင်း စာနာထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနက သတိပေးထုတ်ပြန်ထားသည်။
