မဇ္ဈိမ၊ဩဂုတ်-၁၇
အာဏာသိမ်း အကြမ်းဖက် လက်နက်ကိုင်အဖွဲ့ရဲ့ ကိုဗစ်အကြောင်းပြ သွားလာခွင့် ကန့်သတ်ထားတာဟာ လူထုကို အခက်အခဲ အကြပ်အတည်းတွေ ဖြစ်စေတယ်လို့ မန္တလေးမြို့ခံ သမိုင်းသုတေသီ ဦးအောင်ကျော်မိုး(ပန်းပျိုးလက်)ကမဇ္ဈိမကိုပြောပါတယ်။
“အခုက ပေးတဲ့အချိန်ကတိုတယ်။ဘာလုပ်စားကြမလဲ။စဥ္းစားလုပ်လို့ ပြောရအောင်ကလည်း စဥ္းစားမယ့်ကောင်တွေမဟုတ်ဘူး။မစဥ်းစားလို့ ဒီအခြေအနေဖြစ်နေတာလေ။”လို့ ဦးအောင်ကျော်မိုး(ပန်းပျိုးလက်)ပြောပါတယ်။
အခုဆိုရင် မန္တလေးမြို့တွင်းကို အလုပ်လာလုပ်တဲ့သူတွေ စျေးရောင်း စျေးဝယ်ပြုတဲ့တွေလည်း အလုပ်မသွားရတာ စျေးရောင်း စျေးဝယ် မလုပ်ရတာတွေကြောင့် စားဝတ်နေရေးပါခက်လာတယ်လို့ ဆိုကြပါတယ်။
“ကျွန်မတို့က ပုသိမ်ကြီးဘက်က စျေးလာရောင်းရတာ အခု ၉နာရီဆိုတော့ စျေးဗန်းရွက် ပြန်ရုံပဲ။ရောက်ပြန်ပဲ။ကလေးတွေနဲ့ ဘာသွားစားမလဲ။”လို့ ကုန်စိမ်းသည် မသိတာအေးကပြောပါတယ်။
“ကျွန်တော်တို့အဖွဲ့က ပန်းရံလုပ်သားတွေ အသွားက ပြဿနာမရှိပေမယ့် အပြန်က ပြဿနာဗျာ။၅နာရီအလုပ်သိမ်းတယ်။တောင်ပြုန်းအထိပြန်ရမှာ ၅နာရီခွဲကိုပဲ သူတို့ပိတ်စစ်နေတယ်။မနေ့ က ဒဏ်ငွေ ၅၀၀၀ ရိုက်တယ်။လုပ်အားခက ၈၀၀၀ရတယ်။”လို့ တောင်းပြန်းရွာက ကိုအပုလေးက ပြောပါတယ်။
သွားလာခွင့်ကဒ်ပါလည်း အချို့နေရာတွေမှာ အကြောင်းအမျိုးမျိုးပြ ဒဏ်ငွေရိုက် ဖမ်းဆီးခေါ်ဆောင်တာတွေလည်း ရှိတယ်လို့ မျက် မြင်တွေ့ခဲ့တဲ့သူတွေကဆိုပါတယ်။
ဩဂုတ် ၁၅ရက်ကလည်း ၆၂လမ်း၊၁၁၂လမ်းနဲ့၁၁၂(A)လမ်းကြား၊သစ်တောရုံအနီးမှာ နယ်ကျော်ကဒ်စစ်ရင်း ဖမ်းဆီးထားသူတွေကို အချုပ်ကားနဲ့တင်ခေါ်သွားတာတွေ မြို့နယ်အဝင် အထွက် စစ်ဆေးရေးဂိတ်တွေမှာ ဒဏ်မဆောင်နိုင်တဲ့သူတွေ အချိန်ကြာမြင့်စွာ စောင့်ခိုင်းတာတွေလည်း လုပ်နေတယ်လို့သိရပါတယ်။
“စား ဝတ်နေရေး အခက်အခဲဖြစ်နေတဲ့သူတွေကို ကျွန်တော်တို့အဖွဲ့က နေ့စဥ် ထမင်းဗူးနေတာ နယ်ကျော်ကဒ်လည်းပါတယ်။ချက်တာ ပြုတ်တာနဲ့ဆိုတော့ ၁၀နာရီလောက် မှ ဝေမယ့်နေရာကို သွားနိုင်တာလေ။အခု ၉နာရီကျော်လို့ မသွားရဘူးဆိုပြီး ရစ်တယ်။ကျွန်တော်တို့ အတော်အခက်အခဲဖြစ်တယ်။ကျွန်တော်တို့ လာပေးမှ စားရမယ့်သူတွေ အများကြီးဗျ။”လို့ စားဝတ်နေရေး အခက်အခဲဖြစ်နေသူတွေ ထမင်းဗူးနေ့စဥ်လှူနေတဲ့ ပရဟိလူငယ်တစ်ဦးကပြောပါတယ်။
အဲဒီလို ထမင်း၊ဟင်းလူနေတဲ့ထဲကတစ်ဦးဖြစ်တဲ့ မန္တလေးက နာမည်ကြီး စတီဗင် ဇော်ကြီးကလည်း အသွားအလာတွေ ခက်ခဲလာတာကြောင့် ကိုယ်တိုင် သွားရောက် မလှူနိုင်တော့ပဲ လှူရမယ့်နေရာကသူတစ်ဦးကို ချိတ်ဆက် လှူဒါန်းပေးနေရတယ်လို့ သူရဲ့ လူမှုကွန်ယက်စာမျက်နှာမှာ ရေးသားထားပါတယ်။
“အဲဒီကောင်တွေက ကဒ်စစ်တာမဟုတ်ဘူးဗျာ။ကားထဲပါရှာတယ်။ဆိုင်ကယ်တွေလည်း ဟိုလှန် ဒီလှန်စစ်တာပဲ။လက်နက်ကိုင်ပြီး စစ်နေတာ ခြိမ်းခြောက်တာပဲ။”လို့ အစစ်အဆေး ခံခဲ့ရသူ တစ်ဦးကပြောပါတယ်။
“အဓိက ကျွန်တော့်အမြင်ပါ။ဆန္ဒပြတာတွေ မရှိအောင်ရယ်။ရဲစခန်းတွေ အုပ်ချုပ်ရေးမှူးရုံးတွေ မကြာခဏ ဖေါက်ခွဲ ခံနေရတော့ ကြောက်တာလည်း ပါမှာပေါ့။ဒါကြောင့် ဒီလို စစ်နေတာလို့ မြင်တယ်။”လို့ မန္တလေးမြို့ခံတစ်ဦးကပြောပါတယ်။
မန္တလေးမြို့မှာ ဩဂုတ် ၁၆ ရက်ကနေ၂၉ ရက်အထိ နေအိမ်ပြင်ပ စျေးဝယ်ထွက်ခွင့်ကို နံနက် ၄ နာရီကနေ ၉ နာရီအထိနဲ့ညနေ ၃ နာရီခွဲကနေ ၆နာရီခွဲအထိ ကန့်သတ်ထားပြီး စျေးဝယ်ချိန်ပြင်ပဖြစ်တဲ့ မနက် ၉ နာရီကနေ ညနေ ၃ နာရီခွဲအတွင်း ကျန်းမာရေး၊ နာရေးကိစ္စမှအပ အပြင်ထွက်ခွင့်မပြုကြောင်းနဲ့စိစစ်တွေ့ရှိပါက ဥပဒေနှင့်အညီ ဖမ်းဆီးသွားမယ်လို့ အာဏာသိမ်း အကြမ်းဖက် လက်နက်ကိုင်အဖွဲ့က ထုတ်ပြန်ထားပါတယ်။
