ကိုဗစ်ဒဏ်ကြောင့် ကျန်းမာရေးဝန်ထမ်း အများအပြားလိုအပ်နေချိန်တွင် ပုသိမ်ဆေးရုံအုပ်ကြီးသည် ပုသိမ်ထောင်တွင် ၅ လနီးပါး ချုပ်နှောင်ခံရပြီးနောက် ပြန်လွတ်လာသည်
ပုဒ်မ ၅၀၅-က ဖြင့် ချုပ်နှောင်အမှုရင်ဆိုင်နေရသော ပုသိမ်ဆေးရုံအုပ်ကြီး ဒေါက်တာသန်းမင်းထွဋ်ကို ယနေ့ (ဩဂုတ်၂) တွင် အမှုပိတ်သိမ်းပြီး ပုသိမ်ထောင်မှ ပြန်လွှတ်ပေးလိုက်ကြောင်း နီးစပ်သူများထံမှ သိရသည်။
“ပင်းတယမီးအိမ်ရှင် ဆရာကြီး ဒေါက်တာသန်းမင်းထွဋ်ကို ယနေ့ ၂၀၂၁ ဩဂုတ်လ ၂ ရက်နေ့ မနက် ၁၁ နာရီခန့်က ပုသိမ်မှာ အမှုပိတ်ပြီး ပြန်လည်လွတ်မြောက်လာပြီဖြစ်ကြောင်း အသိပေးအပ်ပါသည်” ဟု ၎င်း၏ ညီဖြစ်သူက ယနေ့ မွန်းလွဲပိုင်းတွင် လူမှုကွန်ရက်၌ ရေးသားထားသည်။
ပြီးခဲ့သည့် ဖေဖော်ဝါရီ ၁ ၌ စစ်တပ်က အာဏာသိမ်းပြီးနောက် ပုသိမ်ဆေးရုံအုပ်ကြီး ဒေါက်တာသန်းမင်းထွဋ်သည် ဖေဖော်ဝါရီ ၅ တွင် အာဏာဖီဆန်သည့်လှုပ်ရှားမှု CDM တွင် ပါဝင်လာသည်။
မတ် ၁၂ တွင် ရဲတပ်ဖွဲ့က ဒေါက်တာသန်းမင်းထွဋ်ကို အစည်းအဝေးရှိသည်ဟုဆိုကာ လာရောက်ခေါ်ဆောင်သွားပြီးနောက် ပုသိမ်ထောင်၌ ချုပ်နှောင်ကာ ရာဇသတ်ကြီးပုဒ်မ ၅၀၅-ကဖြင့် အမှုဖွင့်လိုက်သည်။
တရားလို ပုသိမ်မြို့နယ် ရဲတပ်ဖွဲ့မှူး ရဲမှူးတင်လှိုင်က ဒေါက်တာသန်းမင်းထွဋ်ကို “အများပြည်သူ အထိတ်တလန့်ဖြစ်စေရန် ရည်ရွယ်ပြီး ဆရာဝန်ကျင့်ဝတ်များကို ဖောက်ဖျက်၍ CDM လှုပ်ရှားမှုတွင် ပါဝင်ဆောင်ရွက်ပြီး ပြည်သူများစိတ်တွင် စိုးရိမ်အောင် ပြုလုပ်ခြင်း” ဟု ပုဒ်မ ၅၀၅-က ဖြင့် အမှုဖွင့်တိုင်တန်းခဲ့ခြင်းဖြစ်သည်။
ပင်းတယမီးအိမ်ရှင်ဆုကို ရရှိခဲ့သူ ဒေါက်တာသန်းမင်းထွဋ်သည် မြောင်းမြခရိုင်ဆေးရုံအုပ်ကြီးအဖြစ်မှ ၂၀၂၀ ဖေဖော်ဝါရီတွင် ပုသိမ်ခရိုင်ဆေးရုံအုပ်ကြီးအဖြစ် ပြောင်းရွှေ့လာသူဖြစ်သည်။
ကိုဗစ်နိုင်တင်း (Covid-19) ကပ်ရောဂါတတိယလှိုင်းကြောင့် ရောဂါကူးစက်ပျံ့ပွားမှုနှင့် သေဆုံးမှုမြင့်တက်နေသောကြောင့် ကျန်းမာရေးဝန်ထမ်းအများအပြားလိုအပ်နေချိန်တွင် ဖမ်းဆီးတရားစွဲဆိုခံထားရသော ကျန်းမာရေးဝန်ထမ်းတချို့ကို စစ်ကောင်စီက ပြန်လွှတ်ပေးနေသည်။
ဒေါက်တာသန်းမင်းထွဋ်အပါအဝင် CDM ဆရာဝန်နှင့် သူနာပြုများအပါအဝင် အခြားဌာနဆိုင်ရာဝန်ထမ်းနှင့် ရပ်ကွက်အုပ်ချုပ်ရေးမှူး စုစုပေါင်း ၂၇ ဦးကို ဩဂုတ် ၂ ရက်မတိုင်မီ အမှုမှ လွှတ်ပေးရန် ဧရာဝတီတိုင်းရဲတပ်ဖွဲ့သို့ စစ်ကောင်စီက ညွန်ကြားထားပြီး ၎င်း ၂၇ ဦးတွင် အများစုမှာ ၅၀၅-က ဖြင့် အမှုဖွင့်ခံရသူများဖြစ်သည်။
ဒေါက်တာသန်းမင်းထွဋ်ကို နေပြည်တော်ဆေးရုံသို့ ပြောင်းရွှေ့မည်ဟု သတင်းများထွက်ပေါ်နေသော်လည်း Myanmar Now အနေဖြင့် လတ်တလော ဆက်သွယ်မရသေးပေ။
ပြီးခဲ့သည့် ဇွန် ၃၀ တွင် ပုဒ်မ ၅၀၅-က ဖြင့် အချုပ်ရင်ဆိုင်နေရသူ အများစုအပါအဝင် အရပ်သား ၂၀၀၀ ကျော်ကို စစ်ကောင်စီက ပြန်လွှတ်ပေးခဲ့သည်။
သို့သော်လည်း နိုင်ငံရေးအကျဉ်းသားများစောင့်ရှောက်ရေးအသင်း (AAPP) ၏ ဇူလိုင် ၃၁ အထိ စာရင်းများအရ စစ်ကောင်စီကို အံတုဆန့်ကျင်မှုဖြင့် ဖမ်းဆီးချုပ်နှောင်ခံထားရသူ စုစုပေါင်း ၅၄၄၄ ဦး ထက်မနည်းရှိပြီး ၎င်းတို့အနက်မှ ၂၅၅ ဦးမှာ ထောင်ဒဏ်ချမှတ်ခြင်း ခံထားရသည်။
