မြန်မာနိုင်ငံတွင် အာဏာသိမ်း စစ်တပ်၏ အကြမ်းဖက်ဖိနှိပ်မှုများကို အဆုံးသတ်သွားသည်အထိ လုပ်ဆောင်ရန်အတွက် နိုင်ငံတကာ အသိုင်းအဝိုင်းမှ အတူတကွ စုပေါင်း၍သော်လည်းကောင်း၊ တနိုင်ငံချင်းစီအနေဖြင့်သော်လည်းကောင်း ကူညီဆောင်ရွက်ပေးကြရန် ကုလသမဂ္ဂအထွေထွေအတွင်းရေးမှူးချုပ် António Guterres က တိုက်တွန်းလိုက်သည်။
ကုလသမဂ္ဂအထွေထွေအတွင်းရေးမှူးချုပ်၏ ပြောခွင့်ရပုဂ္ဂိုလ် Stéphane Dujarric မှ ထုတ်ပြန်သော မြန်မာနိုင်ငံနှင့် ပတ်သက်၍ ထုတ်ပြန်ချက်တွင် “ကုလသမဂ္ဂအထွေထွေအတွင်းရေးမှူးချုပ်သည် မြန်မာစစ်တပ်ကြောင့် နိုင်ငံအတွင်း အကြမ်းဖက်များ မြင့်တက်ဖြစ်ပွားနေခြင်းအတွက် များစွာတုန်လှုပ်စိတ်ပျက်မိပါသည်” ဟု ဖော်ပြပါရှိသည်။
ထို့အတူ ဆန္ဒပြသူများအား သတ်ဖြတ်ခြင်း၊ တရားလက်လွတ်ဖမ်းဆီးခြင်းနှင့် ဖမ်းဆီးထိန်းသိမ်း ထားသူများကို ညှင်းပန်းနှိပ်စက်ခြင်းများသည် အခြေခံလူ့အခွင့်အရေးများကို ချိုးဖောက်ခြင်းဖြစ်ပြီး ကုလသမဂ္ဂ လုံခြုံရေးကောင်စီမှ ထိန်းထိန်း သိမ်းသိမ်းဆောင်ရွက်ကြရန်၊ ဆွေးနွေးမှုများ ပြုလုပ်ရန်နှင့် မြန်မာနိုင်ငံအား ဒီမိုကရေစီလမ်းကြောင်းသို့ ပြန်တင်ပေးရန် တိုက်တွန်းချက်များကို ပြောင်ပြောင်တင်းတင်း ဆန့်ကျင်ဖီဆန်နေခြင်းဖြစ်ကြောင်းလည်း ထောက်ပြထားသည်။
မြန်မာနိုင်ငံတွင် ဖြစ်ပွားနေသည့် အခြေအနေများ တည်ငြိမ်သွားအောင် ဆောင်ရွက်ရန်နှင့် ဆွေးနွေးမှုများ ပြုလုပ်ရန်၊ ဒီမိုကရေစီလမ်းကြောင်းသို့ ပြန်သွားရန်လိုအပ်သည်များကို ပြင်ဆင်လုပ်ဆောင်ရန် အရေးကြီးသော အစိတ်အပိုင်းတခုအဖြစ် အတွင်းရေးမှူးချုပ်၏ အထူးကိုယ်စားလှယ်အားနိုင်ငံသို့ လာရောက်ခွင့်ပေးရန်ကိုလည်း အတွင်းရေးမှူးချုပ်က မြန်မာစစ်တပ်ကို တိုက်တွန်းလိုက်သည်။
ထို့အတူ ကုလသမဂ္ဂအထွေထွေအတွင်းရေးမှူးချုပ်သည် မြန်မာပြည်သူများ၊ ၎င်းတို့၏ ဒီမိုကရေစီအား ပြင်းပြစွာ လိုလားတောင့်တမှုများနှင့်အတူ ဆက်လက်ရပ်တည်သွားမည်ဖြစ်ကြောင်းလည်း ဖော်ပြထားသည်။
မြန်မာနိုင်ငံထဲမှာ ဖေဖော်ဝါရီလ ၁ ရက်နေ့က လူထုရွေးကောက်တင်မြောက်ထားသည့် အရပ်သား အစိုးရထံကနေ စစ်တပ်က အဓမ္မ အာဏာသိမ်းယူခဲ့သည်။ ထိုကဲ့သို့ အာဏာသိမ်းလုပ်ရပ်အပေါ် မကျေနပ်၍ ဒီမိုကရေစီလိုလားကြောင်း ဆန္ဒပြသူများကို စစ်တပ်နှင့် ရဲတပ်ဖွဲ့က စစ်မြေပြင်သဖွယ် ပစ်ခတ်နှိမ်နင်းမှုများ ဆက်တိုက်ပြုလုပ်နေလျှက်ရှိသည်။
ထိုကဲ့သို့ အကြမ်းဖက် ပစ်ခတ်သတ်ဖြတ်မှုများကြောင့် သေဆုံးသူ အရေ အတွက်မှာ အနည်းဆုံး ၁၈၂ ယောက် ထိရှိနေပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ နိုင်ငံတော် သမ္မတ ဦးဝင်းမြင့် အပါအဝင် ဖမ်းဆီးခံထားရသူ ၁၉၀၀ နီးပါး ရှိနေပြီဖြစ်ကြောင်း နိုင်ငံရေး အကျဉ်းသားများ ကူညီစောင့်ရှောက်ရေး အသင်း (AAPP) က မတ်လ ၁၆ ရက်နေ့တွင် ထုတ်ပြန်ထားသည်။
