ယမန်နေ့ညပိုင်းက ဖမ်းဆီးခံရပြီး သေဆုံးခဲ့သူ ဦးခင်မောင်လတ်သည် ၂၀၁၅ နှင့် ၂၀၂၀ ရွေးကောက်ပွဲများတွင် NLD အမတ်များအတွက် ရွေးကောက်ပွဲကိုယ်စားလှယ်အဖြစ် လုပ်ကိုင်ခဲ့သူ ဖြစ်သည်
ရန်ကုန် ပန်းဘဲတန်းမြို့နယ် အမျိုးသားဒီမိုကရေစီအဖွဲ့ချုပ်ပါတီ (NLD) ရပ်ကျေးဥက္ကဋ္ဌကို ယမန်နေ့ (မတ်လ ၆) ညပိုင်းတွင် စစ်ကောင်စီ၏ လက်နက်ကိုင်များက ဖမ်းဆီးခေါ်ဆောင်သွားခဲ့ပြီးနောက် ယနေ့ နံနက်ပိုင်းတွင် အလောင်းလာထုတ်ရန် မိသားစုကို အကြောင်းကြားခဲ့သည်ဟု သိရသည်။
ထိုသို့ဖမ်းဆီးခံရပြီးနောက် မည်သို့သေဆုံးခဲ့သည်ကို မသိရသော်လည်း အလောင်းလာထုတ်ရန် ပန်းဘဲတန်းရဲစခန်းက မိသားစုကို အကြောင်းကြာင်းခဲ့ခြင်း ဖြစ်သည်။
ယနေ့ (မတ် ၇) နေ့လယ်ပိုင်းတွင် မိသားစုက မင်္ဂလာဒုံစစ်ဆေးရုံမှ အလောင်းပြန်ထုတ်လာပြီး ရေဝေး သုဿန်သို့ ပို့ဆောင်နေကြောင်း၊ သေဆုံးရသည့်အကြောင်းရင်းကို ယခုချိန်ထိ မသိရှိရ သေးကြောင်း မိသားစုနှင့်နီးစပ်သူ ရှေ့နေ ဦးမောင်မောင်က ပြောသည်။
အလောင်းကို စစ်ဆေးရုံက ရင်ခွဲစစ်ဆေးပြီးဖြစ်သော်လည်း သေဆုံးရသည့်အကြောင်းရင်းကို မိသားစုက မသိရှိရသေးကြောင်း ၎င်းက ပြောသည်။
အကောင်းပကတိ ရှိနေသည့် လူတစ်ဦးကို ညတွင်ဖမ်းဆီးသွားပြီး မနက်ပိုင်းတွင် အလောင်းထုတ်ယူ ခိုင်းသည်နှင့် ပတ်သက်၍ အခြေအနေမှန်ကို ရဲက သေမှုသေခင်းဖွင့်ပေးပြီး တရားရုံးက စစ်ဆေးပေး ရလိမ့်မည်ဟု ရှေ့နေဦးမောင်မောင်က ပြောသည်။
“စစ်ဆေးရုံကနေ သွားယူလာတာဖြစ်တဲ့အတွက် အဖြေမှန် ဘာရနိုင်လဲဆိုတာထက် တရားရုံးကို အားကိုးရမဲ့ အခြေအနေဖြစ်နေတယ်။ ဆေးစာကနေ ဘယ်လိုထွက်လာမလဲဆိုတာ အဖြစ်မှန်လည်း ရေးနိုင်သလို သူတို့ (စစ်တပ်) ရေးချင်တာလည်း ရေးနိုင်တယ်” ဟု ၎င်းက ဆိုသည်။
စစ်ကောင်စီ လက်နက်ကိုင်များ၏ ဖမ်းဆီးခံရပြီးနောက် သေဆုံးခဲ့ရသူ NLD ရပ်ကျေးဥက္ကဋ္ဌ ဦးခင်မောင်လတ်ကို အစ္စလာမ်ဘာသာရေးထုံးတမ်းအတိုင်း ရေဝေးမွတ်စလင်သုဿန်၌ ယနေ့ ညနေ ပိုင်းတွင် သင်္ဂြိုလ်မည်ဟု သိရသည်။
ဦးခင်မောင်လတ်သည် ၂၀၁၅ ရွေးကောက်ပွဲတွင် NLD မှ ပြည်သူ့လွှတ်တော်ကိုယ်စားလှယ် ဦးနေဖူးဗဆွေ၏ ရွေးကောက်ပွဲ ကိုယ်စားလှယ်အဖြစ်လည်းကောင်း၊ ၂၀၂၀ ရွေးကောက်ပွဲတွင် ပန်းဘဲတန်းကိုယ်စားလှယ် ဦးစည်သူမောင်၏ ရွေးကောက်ပွဲကိုယ်စားလှယ်အဖြစ်လည်းကောင်း လုပ်ကိုင်ခဲ့သူဖြစ်သည်။
“သူ့နေအိမ်နဲ့ အခြားပန်းဘဲတန်းမြို့နယ် EC တွေရဲ့နေအိမ်တွေကို ဝင်ရောက်ရာမှာ အကြမ်းဖက် ရိုက်နှက် ဖျက်ဆီးမှုတွေလည်း ရှိခဲ့တယ်လို့ သိရပါတယ်” ဟု ရွေးကောက်ခံအမတ် ဦးစည်သူမောင်က လူမှုကွန်ရက်တွင် ရေးသားထားသည်။
ပြီးခဲ့သည့် မတ် ၅ ရက်ကလည်း မကွေးတိုင်းဒေသကြီး ပွင့်ဖြူမြို့နယ်၊ ကျောင်းကုန်းကြီးရွာ၊ အမျိုးသားဒီမိုကရေစီအဖွဲ့ချုပ် (NLD) ဥက္ကဋ္ဌနှင့် ကလေးတစ်ဦး ဓားဖြင့်ခုတ်ခံရပြီး သေဆုံးခဲ့သည်။
စစ်အာဏာသိမ်းပြီး တစ်ကျော်အချိန်အတွင်း NLD ပါတီဝင်များ ထပ်မံဖမ်းဆီးရလျက်ရှိသည့် နည်းတူ ၅၀၅ (က) (ခ) စသော ပုဒ်မများဖြင့် တရားစွဲဆိုမှုများလည်း ရှိနေသည်။
