စစ်အာဏာသိမ်းထားတာကို ဆန့်ကျင်တဲ့ ဆန္ဒပြပွဲတွေဟာ နေ့ခင်းဖက်မှာသာမကပဲ ပုဒ်မ(၁၄၄) အမိန့်ထုတ်ထားတဲ့ ညဘက်အချိန်မှာပါ ရန်ကုန်ရဲ့ မြို့နယ်တချို့မှာ စတင်လုပ်ဆောင်လာနေတဲ့ အကြောင်း ကိုဉာဏ်ဝင်းအောင်က ပြောပြမှာပါ။
“ သပိတ် သပိတ် မှောက် .. မှောက် ၊ ဒီမိုကရေစီရရှိရေး တို့အရေး.. တို့အရေး ၊ စစ်အာဏာရှင်စနစ် ကျဆုံးရေး .. တို့ အရေး တို့အရေး ..”
အခုကြားနေရတဲ့ အသံတွေက ညမထွက်ရအမိန့် 144 ထုတ်ထားချိန်မှာ တာမွေမြို့နယ် ရပ်ကွက်တချို့က လမ်းမတန်းဘေး ဝဲယာမှာရှိတဲ့ တိုက်ခန်းတွေပေါ်ကနေ ည ၉ နာရီကျော် ၁၀ နာရီကြားဝန်းကျင် ကြွေးကြော် ဆန္ဒပြနေကြတာဖြစ်ပါတယ်။
မြန်မာပြည်သူတွေဟာ နေ့ခင်းဖက် အန္တရာယ်တွေကြားမှာ ပင်ပန်းကြီးစွာ ဆန္ဒပြကြသလို ၊ ည ၈ နာရီ ရောက်တိုင်းလည်း သံပုံးတီးဆန္ဒပြသူ အတော်များများ ရှိနေတဲ့ကြားက ခုလိုညဘက် ဟစ်ကြွေးဆန္ဒပြတာတွေကို တနင်္ဂနွေ ၊ တနင်္လာညတွေမှာ စလုပ်လာကြတယ်လို့ ဗဟန်းမြို့ခံတဦးက ရှင်းပြပါတယ်။
“ကျနော်တို့ ဗဟန်းနဲ့ တာမွေက နယ်စပ်ချင်းလည်း ကပ်နေတယ်လေ။ အဲဒီတော့ ကျနော်တို့နဲ့ ကပ်နေတဲ့ တာမွေဘက်အခြမ်းမှာ၁၄၄ ထုတ်ပြန်ထားတဲ့ အခြေအနေမှာပါ ။ အခုညဘက်တွေကနေပေါ့နော် တိုက်ပေါ်မှာ အသံတွေနဲ့ တိုက် တတိုက်ကနေ အော်လိုက်တယ်ဆိုရင် ကြွေးကြော်သံတွေပေါ့ အော်ကြတာပေါ့။ ဆိုတော့ ခုက နေ့ခင်းတင်မဟုတ်တော့ဘူးပေါ့ ၊ ညပိုင်းတွေမှာပါ အာဏာရှင် စစ်အစိုးရရဲ့ အမိန့်တွေကို မနာခံတော့ဘူးဆိုတဲ့ပုံစံမျိုးနဲ့ ဆန္ဒပြနေကြတာပေါ့နော်၊ ဆန္ဒဖော်ထုတ်နေကြတာပေါ့နော်။ ဆန္ဒဖော်ထုတ်နေကြတာကတော့ ဘယ်သူကမှ တားဆီးတယ် အရေးယူတယ်ဆိုတာမျိုး တစုံတရာကတော့ အခုအချိန်အထိ မတွေ့ရသေးဘူး။”
ပြီးခဲ့တဲ့ ရက်ပိုင်းအတွင်း လမ်းမပေါ်ထွက် ဆန္ဒပြသူတွေကို စစ်တပ်နဲ့ရဲ လုံခြုံရေးတွေ ပစ်ခတ်ရာက အနည်းဆုံးလူ ၃၀ ဝန်းကျင် သေဆုံးခဲ့တာပါ။ ဒါကြောင့် ထိခိုက်ကျဆုံးမှု နည်းရအောင် ပြည်သူတွေဘက်က နည်းလမ်းပြောင်းသုံးလာပုံ ရတယ်လို့ ဗဟန်းမြို့ခံက သုံးသပ်ပါတယ်။
“ကျနော်တို့ဘက်က ဆန္ဒပြတဲ့အခါမှာ အခုဒီလို လူတွေ ထိခိုက်ဒဏ်ရာရတာတွေ မဖြစ်အောင် ၊ ဆုံးရှုံးနစ်နာမှုတွေ မဖြစ်အောင် ပေါ့နော် ဒီဟာကို ဦးဆောင်ပေးနေတဲ့ လူတွေရဲ့ ညွှန်ကြားချက်တွေလည်း ရှိတယ်ပေါ့လေ။ အဲဒီအခါကျတော့ လူတွေက ထိခိုက်မှုတွေနည်းအောင်ဆိုပြီးတော့ နေ့ခင်းနေ့လည်ဆိုရင်လည်း လမ်းတွေထိပ်မှာပေါ့နော် ထိုင်ပြီးတော့ အုပ်စုလိုက် အုပ်စုလိုက် အဲဒီလို ဆန္ဒပြနေကြတာပေါ့နော်။ အဲဒီတော့ ကြည့်ရတာကတော့ မနက်ဖြန်လောက်ကနေစပြီးတော့ သိပ်ထွက်ကြမယ့် ပုံစံတော့ မတွေ့ရဘူးပေါ့နော်။ နေလည်ဘက်မှာလည်း မိမိသက်ဆိုင်ရာ လမ်းတွေထိပ်တွေမှာ ဆန္ဒပြမယ့် ပုံစံမျိုးတွေတော့ တွေ့နေရတယ်။ အဓိကတော့ ဆန္ဒပြပြည်သူလူထုဘက်က ထိခိုက်နစ်နာမှုတွေ မရှိအောင် အဲလို ပုံစံပြောင်းလာတဲ့ သဘောပါပဲ။”
ဆန္ဒပြပွဲတွေဟာ အရှိန်ကျသွားဦးမှာ မဟုတ်သေးဘူးဆိုတာ Gen-Z လို့ခေါ်တဲ့ မျိုးဆက်သစ်တွေရဲ့ စိတ်အင်အားနဲ့ လှုပ်ရှားမှုတွေကို မြင်နေရတယ်လို့ ဗဟန်းမြို့ခံက ရှုမြင်ပါတယ်။
“တဖက်နဲ့တဖက် အခုလိုဖြစ်နေကြတဲ့အချိန်မှာ လူထုဘက်ကလည်း အလျှော့ပေးမယ့် အခြေအနေမျိုးကို လုံးလုံးကြီး မတွေ့ရသေးဘူးပေါေ့နာ်။ တဖက်ကလည်း သူတို့ရဲ့ အရေးယူဆောင်ရွက်မှုကို ဘယ်လောက်အတိုင်းအတာအထိ ဆက်လုပ်ဦးမလဲဆိုတာတော့ နည်းနည်းအချိန်တော့ ယူကြရဦးမယ်ထင်တယ်။ အဲဒီတော့ လူထုဘက်ကတော့ ဒီတပွဲမှာတော့ စစ်အာဏာရှင်စနစ်ကို အမြစ်ပြုတ်အောင် တိုက်မယ်ဆိုတဲ့ ရည်ရွယ်ချက်ကတော့ တနိုင်ငံလုံး အတိုင်းအတာနဲ့ ရှိနေတယ်ပေါေ့နာ်။ အဲဒီတော့ ဆန္ဒပြမှုတွေကတော့ တော်တော်နဲ့ ပြီးနိုင်ဦးမှာ မဟုတ်ဘူး ပေါ့နော်။ ကျနော်တို့ ဟိုတုန်းက ၈၈ တုန်းက အခြေအနေတွေနဲ့ အရမ်းကို ကွာခြားသွားပြီပေါ့နော် ။ ဒီတပွဲမှာတော့ Gen-Z တွေက ပွဲသိမ်း အောင်ပွဲခံမယ်လို့ ကျနော်ယူဆတယ်။ စစ်အာဏာရှင်စနစ်ကို အမြစ်ဖြုတ်နိုင်မယ်လို့ ကျနော်တို့ကတော့ အဲဒီလို ယူဆနေတယ်။”
ညမထွက်ရအမိန့် ထုတ်ထားတဲ့ချိန်အတွင်း ရန်ကုန်မြို့နဲ့အခြားမြို့ကြီးတွေမှာ စစ်တပ်နဲ့ရဲ့က ညဖက် ကင်းလှည့်နေတာပါ။ ဒါပေမယ့်လည်း ရန်ကုန် မြို့နယ်အတော်များများက ရပ်ကွက်တွေမှာတော့ ပြည်သူ့လွှတ်တော် ကိုယ်စားပြုကော်မတီ CRPH ရဲ့လမ်းညွှန်ချက်အတိုင်း ကြားကာလ ပြည်သူ့အုပ်ချုပ်ရေးအဖွဲ့တွေ ဖွဲ့စည်းထားကြပြီး ကိုယ့်ရပ်ကွက်ကို ကင်းစောင့်နေကြရတယ်လို့ မြို့ခံတွေက ပြောပါတယ်။
