ဇန်နဝါရီ ၆ ရက် ၂၀၂၁ ခုနှစ်
တအာင်းအမျိုးသမီးအဖွဲ့အစည်း
ဇန်နဝါရီ ၅ ရက်နေ့တွင် နမ္မတူမြို့နယ် ညောင်ဆွယ်ကျေးရွာနှင့် မိုက်ဟုန်းကျေးရွာမှာ PSLF/TNLA နှင့် RCSS/SSA တို့အကြား တိုက်ပွဲဖြစ်ပွားခဲ့မှုကြောင့် ကျေးရွာအတွင်း လက်နက်ကြီးတစ်လုံးကျခဲ့ပြီး နေအိမ် နှစ်လုံး မီးလောင်သည့်အပြင် ရွာသားတစ်ဦးကိုလည်း သေနတ်ကျည်ဆံထိမှန်၍ ပွဲချင်းပြီး သေဆုံး ခဲ့သည်ဟု သိရသည်။
ဒီဇင်ဘာလကုန်ပိုင်းမှ စ၍ နှစ်ဖက်တပ်ဖွဲ့အကြား တိုက်ပွဲတင်းမာမှုကြောင့် ညောင်ဆွယ်၊ မိုက်ဟုန်းနှင့် လုပ်လေ ကျေးရွာရှိ ဒေသခံ (၂၄၈) ဦးမှ မန်စံကျေးရွာအုပ်စု မန်ဟောင်၊ မန်ကျန်း ဘုန်းကြီးကျောင်းသို့ ထွက်ပြေး တိမ်းရှောင်နေကြသည်။
ညောင်ဆွယ်ကျေးရွာ ကျောင်းထိုင်ဆရာတော်က “တိုက်ပွဲကတော့ နံနက် ၇ နာရီ ကတည်းက စဖြစ်ခဲ့တာ၊ ပလောင်စစ်သားတွေက ရွာထဲမှာရှိတယ် ရှမ်းအဖွဲ့တွေက မိုက်ဟုန်းရွာဘက်ကနေ ပစ်လာတာ လက်နက်ကြီးက အိမ်ကိုထိသွားတာ သေနတ်သံ နဲနဲငြိမ်တဲ့အချိန်မှ မန်စံ စစ်ဘေးရှောင်အသင်းကားတွေက ရွာသားတွေကို လာကြိုပေးတာ”ဟု မိန့်ကြားခဲ့သည်။
တိုက်ပွဲဖြစ်ပွားသည့်အချိန်တွင် အသက် (၅၀)ရှိ တာအိုက်ငိုမှ အိမ်အပြင်ဘက် ထွက်ကြည့်နေစဉ် ကျည်ဆံ ထိမှန်ပြီး ပွဲချင်းသေဆုံးခဲ့သည်။ သေဆုံးနေသည့် တာအိုက်ငို၏ ရုပ်အလောင်းကို ကျေးရွာမှာ ထားခဲ့ပြီး ယနေ့အချိန်ထိ မီး မသင်္ဂြိုလ်ရသေးကြောင်း ဆရာတော်မှ ဆက်လက် မိန့်ကြားသည်။
မီးလောင်သွားတဲ့ အိမ်ရှင် ဖြစ်သူမှ “လောလောဆယ်တော့ မန်စံဘုန်းကြီးကျောင်းမှာ ရှိနေတယ်၊ အဖွားတို့ အိမ်တော့ မီးထဲအကုန်လုံးပါသွားပြီ၊ ဘာတစ်ခုမှယူလို့ မရခဲ့ဘူး၊ စောင်တစ်ထဲပဲ ယူခဲ့တာ ဘာမှမရှိတော့ဘူး လောလောဆယ် စိတ်တွေအရမ်းရှုပ်တယ် ရှေ့ဘာဆက်လုပ်ရမှန်းမသိတော့ဘူး ” ဟု ပြောသည်။
ထို့အပြင် ဟွေဟုန်း၊ ညောင်ဆွယ်၊ လုပ်လေ၊ ပန်ချင်၊ နားမတ်ကျေးရွာရှိ ဒေသခံများ စုစုပေါင်း (၆၁၂) ဦးသည် နားဆိုင်းကျေးရွာသို့ ထွက်ပြေးတိမ်းရှောင်နေရပြီး ယနေ့အချိန်ထိ နှစ်ဖက်တပ်ဖွဲ့အကြား တိုက်ပွဲ ဆက်လက် ဖြစ်ပွားနေဆဲ ဖြစ်သည်။
Photo- Credit We Zay Ya (Facebook)
