နန်းဆိုင်နွမ်။ ။ Honest Information
ခန္ဓာကိုယ်တခုလုံး တလကျော်ကြာထိ ညိုမဲနေတဲ့ ဒဏ်ရာဒဏ်ချက်တွေဟာ မပျက်ပြယ်သေးသလို ဒဏ်ရာကြောင့် မိခင်လည်း ဆုံးရှုံးခဲ့ရပါတယ်။
လွန်ခဲ့တဲ့ အောက်တိုဘာ ၁၇ရက် နေ့လည်အချိန်တွင် မိုးကုတ်မြို့နေ အသက် ၅၃ နှစ်အရွယ် ဒေါ်ခင်မြင့်ဌေး ကို တအာင်း အမျိုးသားလွတ်မြောက်ရေး တပ်မတော် ( TNLA )မှ ဖမ်းဆီး ရိုက်နှက်စစ်ဆေးကာ ပြန်ပေးဆွဲ ငွေကျပ်သိန်း ၆၅၀ တောင်းဆိုခဲ့ပါတယ်။
ထိုငွေကျပ်သိန်း (၆၅၀) မပေးဆောင်နိုင်တဲ့အတွက် TNLA တပ်သား (၂) ဦးမှ ဒေါ်ခင်မြင့်ဌေးကို ဝါးပြားတုတ်ဖြင့် ရိုက်နှက်ခဲ့ပါတယ်။
သူမဟာ သား၊သမီး ၂ဦး ၊ တူ၊တူမ (၃)ဦးနဲ့ မိခင် အမေအိုကို ရှာဖွေကျွေးမွေးနေကာ မိန်းမသားတဦး လည်းဖြစ်တဲ့ အလျောက် TNLA မှတောင်းတဲ့ ငွေကျပ်သိန်း ၆၅၀ လက်ထဲတွင် မရှိပေ။
တချိန်က ကျောင်းဆရာမ တဦးဖြစ်ခဲ့ပြီး၊ ဝန်ထမ်းလစာဖြင့်မလောက်ငှတာကြောင့် ကျောက်မျက်ရတနာ အနည်းအကျဉ်းရောင်းခြင်းပြုလုပ်ခဲ့သော်လည်း ကံမကောင်းမှုကြောင့် လူလိမ်လည်ခံခဲ့ရကာ နောက်ဆုံး အရင်းအနှီးနည်းတဲ့ ချဲ(၃လုံး) ကို ရောင်းပြီး ကလေး(၅)ဦးနဲ့ အမေအို ကို ရှာကျွေးနေသူတဦးဖြစ်ပါတယ်။
“ငွေကြေး သိန်း ၆၅၀ တောင်းတယ်။ အန်တီ အဆင်မပြေဘူး။ ဒီ ကိုဗစ်ကာလမှာ ဒီလောက်ငွေက ဘယ်လို အဆင်ပြေမလဲ။ အဲ့ဒါနဲ့ အန်တီကို စရိုက်တယ်။ တုတ်တွေလည်းကျိုးတယ်။ အန်တီအရမ်းနာပြီ မရိုက်ပါနဲ့တော့ ထိုင်ကန်တော့ တောင်းပန်ပြီးမှသူတို့ရပ်ပေးတယ်” လို့ ဒေါ်ခင်မြင့်ဌေး ဝမ်းနည်းစွာဖြင့် ပြန်လည်ပြောပြပါတယ်။
ထိုညတည ဒေါ်ခင်မြင့်ဌေး တယောက် ရိုက်နှက်ခံထားတဲ့ ဒဏ်ရာနဲ့ ဖျာကြမ်းပေါ်လှဲအိပ်လို့မရအောင် နာကျင်ခံစားခဲ့ရပြီး၊ တညလုံးထထိုင်ခဲ့ရကာ အနားယူအိပ်စက်တဲ့အိမ်ရှင်က ဆေးလာလိမ်းပေးရတဲ့အဆင့်ဖြစ်ခဲ့ပါတယ်။
ဒေါ်ခင်မြင့်ဌေးဟာ ချဲ(နှစ်လုံးရောင်းချ)တဲ့အမှုဖြင့် TNLAက ခေတ္တ ခေါ်ယူစစ်ဆေးရန် အောက်တိုဘာ (၁၇)ရက်မှ မိုးကုတ်မြို့နယ် မှ သျှမ်းပြည် မြောက်ပိုင်းကျောက်မဲမြို့နယ်အထိ ခေါ်ဆောင်သွားခဲ့ပါတယ်။
ထိုသို့ခေါ်ဆောင်သွားစဉ် တွင်လည်း မိုးရာသီဖြစ်တဲ့အလျောက် သူမဟာ ဆိုင်ကယ်တတန်၊ ခြေလျင်တတန်ဖြင့် လိုက်သွားခဲ့ရပြီး မိုးရေကြားနာရီပေါင်းများစွာ လမ်းလျှောက်ခဲ့ရပါတယ်။
“ အဲ့အချိန်က မိုးကလည်းရွာ ကြောက်ကလည်းကြောက် ချမ်းကလည်းချမ်း၊ ပေးတဲ့မိုးကာကလည်းမလုံ၊ ခေါင်းကို ကြွပ်ကြွပ်အိတ် စွပ်ပြီး လမ်းလျှောက်ရ၊ ဆိုင်ကယ်စီးတော့လည်း ဆိုင်ကယ်မှောက်။ ဗွက်ထဲချော်လဲ၊ အန်တီ ခြေညိုးလည်းခုထိ ခေါက်ပြီး အဆစ်ကျိုးသွားတယ်” လို့ သူမ ကြုံခဲ့ရတဲ့ အဖြစ်အပျက်ကို ပြန်ပြောပြနေခြင်းဖြစ်ပါတယ်။
နေ့စဉ် ရက်ဆက် ညကြီးမိုးချုပ်ထိ ဒေါ်ခင်မြင့်ဌေး တယောက် TNLA တပ်သားတွေနဲ့ သွားလာနေရသလို ဘယ်နေရာရောက်ကာ မည်သည့်နေရာ အိပ်စက်အနားယူရမှာလည်း မသိရသလို ညအိပ်စက် အနားယူတဲ့နေအိမ်ရောက်တော့လည်း တပ်သားတွေနဲ့ တပြေးညီ အိပ်စက်ရတဲ့အတွက် စိုးရိမ်မှုကြောင့် အိပ်မပျော်တဲ့ရက်တွေလည်းရှိခဲ့ကြောင်း သူမက ကဆိုပါတယ်။
“ ဖမ်းပြီး မရိုက်ခင်တုန်းကတော့ မိုးမြန်မြန်လင်းဖို့ ဆုတောင်းရတယ်။ ရိုက်ခံရပြီးနောက်တော့ မိုးမလင်းဖို့ ညတိုင်းဆုတောင်းနေရတယ်။ မိုးလင်းရင် ထပ်ရိုက်ခံရမှာစိုးတယ်လေ” လို့ ဒေါ်ခင်ဌေးမြင့် ကပြောပါတယ်။
ဒါ့အပြင် TNLA မှ တောင်းထားတဲ့ ငွေပမာဏကို မပေးဆောင်နိုင်တဲ့အတွက် တပ်သား တဦး က “ ဘယ်နေ့ပေးမလဲ။ ငါအခုတောင် ပစ်သတ်ချင်နေတာ ဆိုပြီး” ခြိမ်းခြောက်မှုတွေကိုလည်း ပြောဆိုခံခဲ့ရသူဖြစ်ပါတယ်။
သူမအနေနဲ့ TNLA တပ်သားတွေ ပစ်သတ်မှာ ကို ကြောက်ပြီး “ ဒီချိန် ပစ်လိုက်ရင် ဘုန်းကြီးတောင် သရဏံဂုဏ်တင်ရမှာ မဟုတ်ဘူး။ ကံတရား ပဲဆိုပြီး သရဏံဂုဏ် ၃ပါး ရွက်ပြီး ဆက်လျှောက် နေရတယ်” လို့ ထိုနေ့ဖြစ်ပျက်တာကို ပြောပြပါတယ်။
TNLA မှ ခြိမ်းခြောက်ပြီး ခေါ်သွားသည့်ည တွင် သူမ အနေဖြင့် နေရပ်ရှိ ဆွေမျိုးမိဘ သား၊သမီးနဲ့ ပြန်တွေ့ရန် ၁၀ ရာခိုင်နှုန်းသာ ရှိတော့တယ်လို့ ထင်ခဲ့ကြောင်း ဒေါ်ခင်မြင့်ဌေး က ဆိုပါတယ်။
သို့သော် သူမဟာ TNLAနဲ့ ကျပ်သိန်း ၃၀၀ နဲ့ ညှိနှိုင်းကာ အောက်တိုဘာ ၂၇ ရက်တွင် နေအိမ်သို့ ပြန်ရောက်ရှိလာခဲ့ပါတယ်။
“ နောက်ဆုံး အန်တီ ကျပ်သိန်း ၃၀၀ နဲ့ညှိခဲ့ရတယ်။ အဲ့မတိုင်ခင်ကလည်း သားက ကျပ်သိန်း ၄၀ ကို TNLA တပ်သား တွေကို ပေးခဲ့သေးတယ်။ အိမ်ကိုပေါင်တာက ကျပ်သိန်း ၁၅၀၊ နောက် သူငယ်ချင်းတွေဆီ ချေးငှားပြီး သားက အန်တီကို လာကယ်ထုတ်ခဲ့ရတယ်။ စုစုပေါင်း ကျပ်သိန်း ၃၄၀ ပေးခဲ့ရတယ်။ အခုတော့ အကြွေးတွေတင်၊ အမေလည်း အသက်ဆုံးရပြီ” လို့ ဒေါ်ခင်မြင့်ဌေး က ထပ်လောင်းပြောပါတယ်။
သူမ ရဲ့ သား ငွေကျပ် သိန်း ၃၀၀ ကို မရှာဖွေနိုင်ခဲ့ရင် အသက်ရှင်နိုင်မှာ မဟုတ်ကြောင်းလည်း စိတ်အားငယ်စွာဖြင့် ပြောလာပါတယ်။
ထိုညှိနှိုင်းမှုဖြင့်နေအိမ်ကို ပြန်ရောက်လာခဲ့သော်လည်း တပ်သားရိုက်နှက်တဲ့ဒဏ်ရာကို ဖုံးဖိနေခဲ့ပေမယ့် မိခင်အို ဟာ ဒေါ်ခင်မြင့်ဌေး ရဲ့ ညိုမဲနေတဲ့ဒဏ်ရာကိုမြင်ပြီး စိတ်မကောင်းစွာဖြင့် စိတ်ဒဏ်ရာဖြင့် အသက်ဆုံးရှုံးခဲ့ရပါတယ်။
“ အန်တီ အမေ မမြင်အောင် ဖုံးဖိနေခဲ့တယ်။ တရက်တော့ အမေက အန်တီ ဒဏ်ရာမြင်ပြီး စိတ်မကောင်းတွေဖြစ်။ အစာရေစာမစားဘဲ အားပျက်ပြီး ဒီဇင်ဘာ ၄ရက်နေ့က ဆုံးသွားတယ်”လို့ တုန်ရီနေတဲ့ အသံဖြင့် သူမပြောပါတယ်။
TNLAမှ ပြောရေးဆိုခွင့်ရှိသူ ဗိုလ်မှူးမိုင်းအိုက်ကျော် က ဒေါ်ခင်မြင့်ဌေး ဟာ မူးယစ်ဆေးဝါးနဲ့ လောင်းကစားပြုလုပ်သူ၊ တရားမဝင် စီးပွားရေးလုပ်ကိုင်မှုကြောင့် ဖမ်းဆီးရခြင်းဖြစ်တယ်လို့ BBC Burmese ဝက်ဆိုက် စာမျက်နှာတွင် ရေးသားထားသည်။
“ အန်တီ ချဲရောင်းတာ။ မူးယစ်ဆေးဝါး နဲ့လောင်းကစားလို့သူတို့က ထုတ်ပြန်တာ အန်တီက မဟုတ်ဘူး ခံပြင်းတယ်။ သူတို့အပြစ်လွှတ်အောင်လို့ အဲ့လို လုပ်တာ။ အသင်း၊ အဖွဲ့အစည်းပိုင်း က လူကြီးဖြစ်နေတာ အမှန်ကို အမှန်တိုင်းချပြရမယ်။ မိန်းမတန်မဲ့ သားသမီးနဲ့အမေအိုကို ချဲတခုနဲ့ ကျွေးခဲ့တယ်”လို့ ဒေါ်ခင်မြင့်ဌေး က ဆိုပါတယ်။
ခေတ်အဆက်ဆက် အနေဖြင့် မြန်မာ့တပ်မတော် မှ လူ့အခွင့်အရေး၊ အမျိုးသမီးအခွင့်အရေး ချိုးဖောက်မှုကို အစဉ်အဆက် ပြောဆိုခဲ့ရာ ယခုနောက်ပိုင်း တိုင်းရင်းသားလက်နက်ကိုင် တပ်ဖွဲ့တွေ ဟာ လူ့အခွင့်အရေး ချိုးဖောက်မှု ပိုများလာတာကို တွေ့မြင်ရပါတယ်။
Hi သတင်းဌာနကနေ စောင့်ကြည့်သုံးသပ်မိတဲ့ အနေအထားအရ ၂၀၂၀ တနှစ်ထဲမှာတောင် ရှမ်းမြောက်က အမျိုးသမီး( ၆ ) ဦးထက် မနည်းဟာဆိုရင် တိုင်းရင်းသားလက်နက်ကိုင် တပ်ဖွဲ့ဝင်အချို့ရဲ့ ဖမ်းဆီးခြင်း၊ ရိုက်နှက်နှိပ်စက်ခြင်းနှင့် လိင်ပိုင်းဆိုင်ရာ စော်ကားခြင်းတို့ကို တွေ့ ကြုံခံစားခဲ့ကြရပါတယ်။ အဲ့ဒီထဲမှာ တအာင်း အမျိုးသားလွတ်မြောက်ရေး တပ်မတော် ( TNLA )မှ ဖမ်းဆီး ရိုက်နှက်စစ်ဆေးတာ ၄ ကြိမ်အထိရှိခဲ့ပါတယ်။
အဆိုပါအရေအတွက်ဟာ သတင်းဌာနများ လက်လှမ်းမှီသလောက်ကိုသာ ရေးသားကြတဲ့ သတင်းများအပေါ်အခြေခံတွက်ချက်ထားတဲ့ စာရင်းဖြစ်ပြီး အမှန်တကယ် ဖြစ်ပွားခဲ့တဲ့အရေအတွက်တွေဟာ ဒီထက်ပိုများကောင်းများနိုင်ပါတယ်။
တိုင်းရင်းသားလက်နက်ကိုင်တပ်ဖွဲ့တွေရဲ့ အဓိက ရပ်တည်ချက်ဟာ တန်းတူညီမျှရေး၊ ကိုယ်ပိုင်ပြဌာန်းခွင့်ရရှိရေးဆိုတဲ့ အရေးကြီးဦးတည်ချက်တွေ လုပ်ဆောင်နေတာဖြစ်တဲ့အတွက် လက်ရှိ လူ့အခွင့်အရေး ချိုးဖောက်မှုတွေ များလာပါက နဂို ရပ်တည်ချက်တွေ ကို ထိခိုက်သွားနိုင်ကြောင်း၊ တိုင်းရင်းသားလက်နက်ကိုင်တွေအနေနဲ့ သတိထားရန်လိုအပ်ကြောင်း လူ့အခွင့်အရေး တက်ကြွလှုပ်ရှားသူများက ထောက်ပြ ပြောဆိုလိုက်ပါတယ်။
“ အစိုးရ ကို နိုင်ငံတကာရဲ့ လုပ်ထုံးလုပ်နည်းနဲ့ ချုပ်ကိုင်လို့ရပေမယ့် လက်နက်ကိုင် တပ်ဖွဲ့တွေက နိုင်ငံတကာ လက်မှတ်ထိုးထားတာ မဟုတ်တဲ့အတွက် ချုပ်ကိုင်ဖို့ ခက်ပါတယ်။ ဒါပေမယ့် လက်နက်ကိုင် တပ်ဖွဲ့အတွင်းမှာ လူ့အခွင့်အရေး ကိစ္စကို လေးစားလိုက်နာဖို့ ဆိုတဲ့အကြောင်း နောက်တခါ ဒီလိုလုပ်ဆောင်မှုတွေရှိပါက အဖွဲ့အစည်း ဂုဏ်သိက္ခာနဲ့ နိုင်ငံတကာ နဲ့ ပြည်သူလူထု ထောက်ခံချက်ကို ထိခိုက်နိုင်တယ်” လို့ လူ့အခွင့်အရေး ပညာပေးမှုပြုလုပ်နေတဲ့ Equality Myanmar မှ အမှုဆောင်ဒါရိုက်တာ ဦးအောင်မျိုးမင်းက ပြောဆိုပါတယ်။
မူးယစ်ဆေးဝါးဟာ ရာဇာဝတ်မှုဖြစ်ပြီး မူးယစ်ဆေးဝါး ကာကွယ်တားဆီးလုပ်ဆောင်ခြင်းက အလွန်အရေးကြီး လုပ်ဆောင်သင့်တဲ့လုပ်ငန်းတရပ်ဖြစ်ကြောင်း၊ သို့သော် မူးယစ်ဆေးဝါး တိုက်ဖျက်ရေးဆိုတဲ့ခေါင်းစဉ်ဖြင့် အပြစ်ရှိသူကို လိုအပ်တာထက် ပိုပြီး အပြစ်ပေးခြင်း၊ ဂုဏ်သိက္ခာထိခိုက်အောင်နှိပ်စက်ညှင်းပန်းခြင်း ၊ အတင်းအကျပ် ဝန်ခံခိုင်းခြင်း မပြုလုပ်သင့်ကြောင်းလည်း ဦးအောင်မျိုးမင်း က ဆိုပါတယ်။
“အမျိုးသမီးတွေဖြစ်ရင် ပိုပြီးသတိထားရပါတယ်။ သူတို့ရဲ့ စိတ်ပိုင်းဆိုင်ရာ ရုပ်ပိုင်းဆိုင်ရာ လိင်ပိုင်းဆိုင်ရာ အရ ထိခိုက်မှုမဖြစ်အောင် ပိုပြီး တာဝန်ထမ်းဆောင်ရပါမယ်” လို့ ဦးအောင်မျိုးမင်း က မှတ်ချက်ပြုလိုက်ပါတယ်။
ထိုင်း-မြန်မာ နယ်စပ် နေစဉ်ကာလတွင် တိုက်ရိုက်တွေ့ဆုံ ပြီး ပြောဆိုနိုင်ခဲ့သော်လည်း ယခုကာလမှာ လက်နက်ကိုင်တချို့နဲ့ တိုက်ရိုက်တွေ့ဆုံရန် ခက်ခဲကြောင်း၊ တရားမဝင်အသင်း တွေ့ဆုံမှု ကလည်းအန္တရာယ်ရှိ နေသေးကြောင်း ဦးအောင်မျိုးမင်းက ထောက်ပြပြောဆိုလိုက်ပါတယ်။
ဂျနီဗာကွန်ဗင်းရှင်း အရ စစ်ပွဲနဲ့တိုက်ရိုက် မသက်ဆိုင်တဲ့ ပြည်သူတွေကို ဓားစားခံမလုပ်ရန်၊ အကြမ်းဖက်မှု၊ ဖမ်းဆီးသတ်ဖြတ်မှု မပြုလုပ်ရန်ပါရှိပြီး၊ ထိုအရာကို လက်နက်ကိုင် အဖွဲ့ အားလုံး လိုက်နာရန် ရည်ညွန်းထားကြောင်း ကျား၊မ ရေးရာ တန်းတူညီမျှရေးကွန်ရက် (Gender Equality Network)မှ မမေစံပယ်ဖြူက ပြောပါတယ်။
“လက်နက်နဲ့ အာဏာကို အလွှဲသုံးစားလုပ်တဲ့အကျင့်က ကျမတို့နိုင်ငံမှာ အမြစ်စွဲနေတာ။ အရင်တုန်းက စစ်တပ်က အုပ်ချုပ်ခဲ့စဉ်ကလည်း မြင်တွေ့ခဲ့ရတာဆိုတော့ ဘယ်လက်နက်ကိုင်မဆို မကွာခြားဘူး။ မထူးဘူး” လို့ မမေစံပယ်ဖြူ က ထောက်ပြပြောဆိုလိုက်ပါတယ်။
နိုင်ငံတကာရဲ့ စံချိန်စံညွန်းကို ချိုးဖောက်ပါက အစိုးရ တပ်မတော်ဖြစ်ရင် နိုင်ငံတကာက အပြစ်ပေးအရေးယူနိုင်တဲ့ အားပိုကောင်းကြောင်း၊ ဒါပေမယ့် တိုင်းရင်းသားလက်နက်ကိုင် တပ်ဖွဲ့ဟာ နာမည်၊ ဂုဏ်သိက္ခာနဲ့ တည်ထောင်ထားပြီး ပြည်သူ့ ထောက်ခံမှုနဲ့ လက်နက်ကိုင် တော်လှန်နေတဲ့တပ်ဖွဲ့ ဆိုတာကို မမေ့ရန်လိုအပ်ကြောင်း မမေစံပယ်ဖြူ က ပြောပါတယ်။
အမျိုးသမီးတွေကို မည့်သည့် ခေါင်းစဉ်အောက်မှ ရိုက်နှက်တာ၊ အနိုင်ကျင့်တာ အကြမ်းဖက်စရာအကြောင်းမရှိကြောင်းလည်း မမေစံပယ်ဖြူက ထောက်ပြ ပြောဆိုလိုက်ပါတယ်။
“ ကာမပိုင်လင်ဖြစ်လို့ သူတရားဝင်ယူထားတဲ့မိန်းမကို ရိုက်ခွင့်မရှိသလို၊ လက်နက်ကိုင် ဘယ်လိုခေါင်းစဉ်အောက် လူတဖက်သားကို ရိုက်စရာ အနိုင်ကျင့်စရာ အကြမ်းဖက်စရာအကြောင်းကို မရှိတာ။ ကျမတို့က တောထဲ ဥပဒေနဲ့နေတာမဟုတ်ဘူး။ ဘာအကြောင်းပြချက်နဲ့ မှ ဘယ်သူပဲဖြစ်ဖြစ် အကြမ်းဖက် အနိုင်ကျင့်စရာအကြောင်းမရှိဘူး” မမေစံပယ်ဖြူ က ပြောပါတယ်။
လက်နက်ကိုင်တပ်ဖွဲ့အနေနဲ့လောင်းကစား၊ မူးယစ်ဆေးဝါး လုပ်ဆောင်တဲ့အတွက် သွန်သင်လိုက်ခြင်းဖြစ်တယ်လို့ အကြောင်းပြ ပြောဆိုပြုလုပ်ခြင်းဟာ အာဏာရှင် အပြုအမူဖြစ်ကြောင်းလည်း လူ့အခွင့်အရေး တက်ကြွလှုပ်ရှားသူများက ဝေဖန်ပြောဆိုလိုက်ပါတယ်။
ကုလသမဂ္ဂ လုံခြုံရေးကောင်စီ ဆုံးဖြတ်ချက် အမှတ် (၁၃၂၅) အရ အမျိုးသမီး တွေနဲ့ မိန်းကလေးငယ်တွေရဲ့ အခွင့်အရေးတွေနဲ့ အကာအကွယ်ပေးထားတဲ့ နိုင်ငံတကာဥပဒေ ကို အပြည့်အဝ လိုက်နာရန် လက်နက်ကိုင်ပဋိပက္ခ တွင်ပါဝင်ပတ်သက်နေတဲ့ အုပ်စုတွေ အားလုံးကို တောင်းဆိုထားပါတယ်။
အထူးသဖြင့် အရပ်သားတွေဖြစ်တဲ့ အမျိုးသမီးတွေနဲ့ မိန်းကလေးငယ်တွေ ကို အကာအကွယ်ပေးထားတဲ့ ၁၉၄၉ ခုနစ် ဂျနီဗာသဘောတူစာချုပ်မှာ ပါဝင်ပါတယ်။
၁၃၂၅ ကို လက်နက်ကိုင် တပ်ဖွဲ့တိုင်း လိုက်နာရန် ကတိကဝတ် ဖြစ်ပေမယ့် လက်ရှိ အချိန်ထိ မြန်မာနိုင်ငံရှိ လက်နက်ကိုင် တပ်ဖွဲ့တွေက အလေးထားလိုက်နာကျင့်သုံးမှု အားနည်းနေဆဲပါ။
TNLA ရိုက်ထားတဲ့ ဒဏ်ရာကို ဖုံးကွယ်ပြီး မျိုးသိပ်နေခဲ့ပေမယ့် သူမကို မူးယစ်ဆေးဝါး ရောင်းချမှုသတင်းကြောင့် သူမ သိက္ခာ၊ကိုယ်ကျင့်တရားကို ထိခိုက်လာကြောင်း ဒေါ်ခင်မြင့်ဌေး က ပြောပါတယ်။
“ အန်တီ ဘဝ အရမ်းနစ်နာခဲ့တယ်။ မရှိရှိတာ ချေးပြီး ပေးခဲ့တယ်။ ဒဏ်ရာရခဲ့တယ်။ အမေလည်းဆုံးရတယ်။ အမျိုးသမီးကိုလုပ်တာ လူမဆန်မှုတွေကို အန်တီ မကျေနပ်ဘူး”လို့ ဒေါ်ခင်မြင့်ဌေး စိတ်အားငယ်စွာဖြင့်ပြောပါတယ်။
တော်လှန်ရေး လက်နက်ကိုင် တပ်ဖွဲ့အနေနဲ့ ယခုကဲ့သို့ ပြုမူမှုကို ရှုတ်ချကြောင်းလည်း သူမက ပြောပါတယ်။
“ပြည်သူတွေအပေါ် မတရားငွေညစ်တယ် မတရားလုပ်တယ်။ အနာတရလုပ်တယ်ဆိုတာက ဒါကတော့ လုံးဝလက်မခံနိုင်စရာပဲ။ တခြားလက်နက်ကိုင်လည်း ဒီလောက်ဆိုးရွားတာ မကြားဖူးဘူး” လို့ ဒေါ်ခင်မြင့်ဌေး က ပြောပါတယ်။
ယခုအချိန်ထိ TNLA မှ ရိုက်နှက်ထားတဲ့ ညိုမဲ ဒဏ်ရာတွေ ကြောင့် ဆေးဆက်ကုနေရပြီး၊ လမ်းလျှောက်တိုင်း လှုပ်ရှားတိုင်း နာကျင်ခံစားနေရဆဲဖြစ်ပြီး၊ ဒဏ်ရာကြောင့် မိခင်သေဆုံးခဲ့ရတာခဲ့တဲ့အတွက် စိတ်မကောင်းကြောင်း သူမက ပြောဆိုပါတယ်။
လက်ရှိမှာတော့ ဒေါ်ခင်မြင့်ဌေးဟာ TNLAရဲ့ ဖမ်းဆီး ချုပ်နှောင် ရိုက်နှက်မှုအောက်က လွှတ်မြောက်လာခဲ့ပေမယ့် မိခင်ကတော့ ထိုစိတ်ဒဏ်ရာနဲ့ သေဆုံးခဲ့ပြီး၊ ဒေါ်ခင်မြင့်ဌေးတို့ မိသားစုဟာ TNLAကို ပေးရန် ချေးငှားခဲ့တဲ့ငွေအတွက် ပြန်ဆပ်ရန် တွေးပူနေရပြန်ပါတယ်။
