■စစ်တွေမြို့က ကိုရိုနာဗိုင်းရပ်စ်ကူးစက်ရောဂါ စောင့်ကြည့်လူနာတွေရဲ့ ဆေးစစ်ချက်နမူနာကို ရန်ကုန်ကို သယ်လာတဲ့ WHO ကမ္ဘာ့ကျန်းမာရေးအဖွဲ့ယာဉ်တစီး ရခိုင်ပြည်နယ် မင်းပြားမြို့နယ်မှာ ပစ်ခတ်ခံရလို့ ဝန်ထမ်းတဦး သေဆုံးရတဲ့သတင်းကြောင့် ဝမ်းနည်းတုန်လှုပ်ရတယ်လို့ နိုင်ငံတကာလူသားချင်းစာနာမှုဆိုင်ရာ ၁၆ ဖွဲ့က မနေ့က ကြေညာချက် ထုတ်ပြန်လိုက်ပါတယ်။
ဒီအခြေအနေတွေကြောင့် လက်နက်ကိုင် တိုက်ခိုက်နေတာ ချက်ချင်းရပ်ဖို့ တိုက်တွန်းလိုက်ပါတယ်။ ယာဉ်မောင်း ဦးပြည့်စုံဝင်းမောင် ကွယ်လွန်သွားတဲ့အတွက် မိသားစုနဲ့ လုပ်ဖော်ကိုင်ဖက်တွေကို ဝမ်းနည်းကြောင်း ပြောကြားလိုပြီး ထိခိုက်ဒဏ်ရာရသွားတဲ့ ကျန်းမာရေးနဲ့ အားကစားဝန်ကြီးဌာနက တာဝန်ရှိပုဂ္ဂိုလ် အမြန်ကျန်းမာလာစေဖို့ ဆုမွန်ကောင်းပို့သပါတယ်လို့ ဖော်ပြပါတယ်။
ဧပြီ ၂၀ ရက်က ဖြစ်ပွားတဲ့ ဒီဖြစ်ရပ်ဟာ မြန်မာနိုင်ငံက လက်နက်ကိုင်တိုက်ခိုက်နေသူတွေ လက်နက်စွန့်လွှတ်ဖို့ အရေးတကြီး လိုအပ်တာနဲ့ တကမ္ဘာလုံး အပစ်ရပ်ဖို့ ကုလသမဂ္ဂ အတွင်းရေးမှူးချုပ်က တိုက်တွန်းတာကို အလေးထားဖို့ ပြသလိုက်တာပါပဲလို့လည်း ကြေညာချက်မှာပါရှိပါတယ်။
ကုလသမဂ္ဂ၊ အစိုးရမဟုတ်တဲ့ အဖွဲ့အစည်းတွေနဲ့ မြန်မာအရပ်ဘက်အဖွဲ့အစည်းတွေအပါအဝင် လူသားချင်းစာနာမှုဆိုင်ရာ ဝန်ထမ်းတွေအားလုံး ရခိုင်ပြည်နယ်နဲ့ တခြားနေရာတွေကို လွတ်လွတ်လပ်လပ် သွားခွင့်ပေးဖို့လည်း တိုက်တွန်းထားပါတယ်။ ဒါမှသာ ဒေသခံတွေဆီရောက်နိုင်ပြီး ကိုရိုနာဗိုင်းရပ်စ် ကူးစက်မှုတုံ့ပြန်ရေးအစီအစဉ်တွေကို ပံ့ပိုးနိုင်မယ်လို့ ဖော်ပြပါတယ်။
ကြေညာချက်ထုတ်တဲ့ ၁၆ ဖွဲ့ထဲမှာ CARE International , Oxfam , Save the Children, International Rescue Committee, World Vision Myanmar တို့ပါဝင်ပါတယ်။
