သက်ငယ်မုဒိမ်းမှု ပပျောက်ရေးအတွက် တောင်ကြီးမြို့တွင် ဇူလိုင် ၆ ရက် (ယနေ့) နံနက်ပိုင်းက လူတစ်ရာကျော် ဆန္ဒဖော်ထုတ်ခဲ့ကြောင်း သတင်း ရရှိသည်။
တောင်ကြီးမြို့ရှိ လူငယ်များ နှင့် အရပ်ဘက်အဖွဲ့အစည်းများမှ ဦးဆောင်၍ အဆိုပါ ဆန္ဒဖော်ထုတ်ပွဲကို ပြုလုပ်ခဲ့ပြီး ဗိုလ်ချုပ်အောင်ဆန်း ပန်းခြံ စုရပ်မှ စတင်ထွက်ရှိကာ မြို့မဈေးမှ တဆင့် ဗိုလ်ချုပ်အောင်ဆန်းလမ်းမကြီး တစ်လျောက် ချီတက်လမ်းလျှောက် လာကြပြီး တောင်ကြီးမြို့ စူဌာမုနိ လောကချမ်းသာ စေတီတော်တွင် စုဝေးကာ ဆုတောင်းခဲ့ကြောင်း သိရသည်။
နေပြည်တော် တွင် ဖြစ်ပွားခဲ့သော သက်ငယ်မုဒိန်းမှုကို အမှုမှန်ပေါ်ပေါက်စေရေး နှင့် သက်ငယ်မုဒိမ်းမှုများကို ထိရောက်ပြင်းထန်သော သေဒဏ်ပေးရေး တို့ကို တောင်းဆိုခဲ့ကြောင်း သိရသည်။
