ဖြိုးသီဟချို/Myanmar Now
ရခိုင်လက်နက်ကိုင်အဖွဲ့ AA နှင့် မြန်မာ့တပ်မတော်တို့အကြား ဖြစ်ပွားနေသည့် တိုက်ပွဲများ ရပ်တန့်ပေးရန်၊ အရပ်သားများကို ပစ်မှတ်ထားခြင်းများမပြုလုပ်ရန်၊ စစ်ကြောရေးစခန်းတွင် သေဆုံးခဲ့ရသူများအတွက် တရားမျှတမှုကို ဖော်ဆောင်ပေးရန် ယနေ့ နေ့လယ်ပိုင်းတွင် စစ်တွေမြို့ ဦးဥတ္တမပန်းခြံ၌ ဒေသခံ တက်ကြွလှုပ်ရှားသူများက ဆန္ဒပြ တောင်းဆိုခဲ့ကြသည်။
အဖြူရောင်စာရွက်ပေါ်တွင် အနီရောင်ဆေးသားဖြင့် ရေးသားထားသည့် “စစ်ကြောရေးကြောင့် သေဆုံးခဲ့ရသည့် အရပ်သားပြည်သူများအတွက် တရားမျှတမှုကို အလိုရှိသည်” “ ရခိုင်တွေမှာလည်း အသက်နဲ့ပါ ” “ စစ်ပွဲများ ချက်ခြင်း ရပ်တန့်ပြီး ငြိမ်းချမ်းရေး ဖော်ဆောင်ကြပါ” စသည့် စာတမ်းများ ကိုင်ဆောင်ထားသည့် ရခိုင်လူငယ်များက ဆန္ဒပြတောင်းဆိုခဲ့ကြသည်။“ဆန္ဒပြတဲ့ပုံစံမျိုးတော့ မဟုတ်ဘူးပေါ့နော်။
ရခိုင်မှာဖြစ်နေတဲ့ စစ်ပွဲတွေကြောင့် သေဆုံးသွားတဲ့သူတွေ အများကြီးရှိတယ်။ဒဏ်ရာရတဲ့သူတွေ အများကြီးှရှိတယ်။ ဖမ်းဆီးခံထားရတဲ့သူတွေ အများကြီးရှိတယ်။ ရခိုင်မှာရှိတဲ့လူငယ်တွေက ပေါင်းစပ်ပြီးတော့ သက်ဆိုင်တဲ့ သူတွေမြင်အောင် Performance (သရုပ်ဖော်)တစ်ခု ပြခြင်းဖြစ်ပါတယ်” ဟု ယင်းတောင်းဆိုပွဲတွင် ပါဝင်သည့် ကိုသန်းလှက ပြောသည်။
ရခိုင်တိုင်းရင်းသားမျိုးနွယ်များအစည်းအရုံး(RNC)မှ အတွင်းရေးမှူး ကိုဇော်ဇော်ထွန်းက ရခိုင်ပြည်နယ်တွင် ဖြစ်ပွားနေသည့် စစ်ပွဲများကြောင့် ရခိုင်ဒေသခံ ၆၀ ကျော် သေဆုံးခဲ့ပြီး၊ ဒဏ်ရာရသူ ၁၈၀ ကျော်နှင့် ဖမ်းဆီးခံထားရသူ ၂၂၀ ကျော်ခန့် ရှိနေပြီဖြစ်သည်ဟု ၎င်းတို့ ကောက်ယူထားသည့် အချက်အလက်များပေါ် မူတည်ပြီး ပြောဆိုသည်။တပ်မတော်က ပြီးခဲ့သည့် ဒီဇင်ဘာလက စတင်ဖြစ်ပွားခဲ့သည့် တိုက်ပွဲများတွင် AA နှင့်ဆက်နွယ်သည်ဟု ယူဆပြီး ဖမ်းဆီးခဲ့သူ ၉၀ ကျော်ရှိပြီး၊ စစ်ဆေးဆဲ ၃၆ ဦး၊ အမှုဖွင့်အရေးယူထားသူ ၄၅ ဦး၊ ပြစ်ဒဏ်ချမှတ်ခံရသူ ၃ ဦးရှိသည်ဟု ဇွန်လ ၂၂ ရက်နေ့က ပြုလုပ်သည့် သတင်းစာရှင်းလင်းပွဲတွင် ထုတ်ပြန်ထားသည်။
ဓာတ်ပုံ – မင်းဘာရှည်
