ရှမ်းပြည်နယ်မြောက်ပိုင်းမှာ ရှမ်းလက်နက်ကိုင်အဖွဲ့နှစ်ဖွဲ့ကြားဖြစ်တဲ့ တိုက်ပွဲအတွင်း ဒေသခံ ရွာသားတချို့ သေဆုံး ဒဏ်ရာရခဲ့ပါတယ်။ ဒဏ်ရာရသူတွေဟာ လားရှိုးဆေးရုံမှာ တက်ရောက် ဆေးကုသမှု ခံယူနေပါတယ်။ ပြီးခဲ့တဲ့ ရက် ပိုင်းမှာ အစိုးရတပ်က ဖမ်းသွားတဲ့ စစ်ပြေးဒုက္ခသည် ငါးဦး ပြန်လွတ်လာပေမယ့် ဆက်ပြီး အဖမ်းခံ ထားရသူတွေ ရှိနေဆဲပါ။ ဒီအခြေအနေတွေကို စုစည်းပြီး ဗွီအိုအေ ထိုင်းအခြေစိုက် သတင်းထောက် နိုင်ကွန်းအိန်က သတင်းပေးပို့ ထားပါတယ်။
ရှမ်းပြည်နယ်မြောက်ပိုင်း သီပေါမြို့နယ် စယ်ခန်ကျေးရွာအုပ်စု နားလော့ကျေးရွာအတွင်း တောင်ပိုင်း ရှမ်းပြည်တပ်မတော် RCSS နဲ့ မြောက်ပိုင်းရှမ်းပြည်တပ်မတော် SSPP/SSA တို့အကြား တိုက်ပွဲ ကြောင့် နားလော့ရွာသားတွေ သေဆုံးဒဏ်ရာရခဲ့ တယ်လို့ စယ်ခန်ကျေးရွာအုပ်စု အုပ်ချုပ်ရေး အဖွဲ့ဝင်တဦးက ဗွီအိုအေကိုအခုလို ပြော ပါတယ်။
“မနက်တုန်းကတော့ ဝင်လာတိုက်တာကတော့ RCSS လို့ပြောတာပဲ။ ရှမ်းစစ်သား (SSPP) ရွာထဲမှာ ရှိနေတော့ သူကရွာထဲဝင်တိုက်တယ်ဗျ။ သေဆုံးမှုကျတော့ရှိတာ ရွာကလူကတော့ သေသွားတာ (၃) ယောက်။ ဒဏ်ရာ ရတာ (၄) ယောက်ပေါ့။ အားလုံး (၇) ယောက်ပေါ့ဗျာ။ ဒဏ်ရာရတဲ့သူတွေ ဆေးရုံရာက်နေပြီ။”
ဒီတိုက်ပွဲနဲ့ပတ်သက်လို့ တောင်ပိုင်းရှမ်းပြည်တပ်မတော် RCSS ပြောခွင့်ရ ဗိုလ်မှူးကြီးစိုင်းဦး ကလည်း ဗွီအိုအေကို အခုလို ပြောပါတယ်။
“(၅) နာရီခွဲလောက်မှာဖြစ်တယ်။ မိနစ် (၂၀) ကြာတယ်လို့ပြောတယ်။ SSPP နဲ့ဖြစ်တာလို့။ ပြည်သူတွေ ထိတယ်လို့တော့ ပြောတယ်။ အရပ်သား (၃) ယောက်ဒဏ်ရာရတယ်။ နှစ်ဦး သေတယ်လို့သိရတယ်ဗျ။”
လက်နက်ကိုင်တပ်ဖွဲ့အချင်းချင်း တိုက်ပွဲအတွင်း အရပ်သားတွေ ထိခိုက်သေဆုံးမှုဖြစ်စဉ်အပေါ် ရှုတ်ချကြောင်း သီပေါမြို့နယ် ပြည်နယ်လွှတ်တော်ကိုယ်စားလှယ် နန်းစမ်းစမ်းအေးက ပြောပါတယ်။
“ဘယ်လက်နက်ကိုင်မဆိုပေါ့နော်- ပြည်သူလူထုကိုထိခိုက်လာရင် ရှုတ်ချတယ်။ လက်နက်ကိုင် အချင်းချင်းဖြစ်ချင် ရင်လည်း ရွာထဲပေးမတက်နဲ့။ သီးသီးသန့်သန့် ဖြစ်ချင်သလိုဖြစ်လို့ရတယ်။ ပြည်သူလူထုကိုလာထိရင်တော့ ကျမအနေနဲ့ ကန့်ကွက်ရှုတ်ချတယ်ပေါ့နော်။”
ဒါ့အပြင် ဒေသအတွင်းစစ်ရေးပဋိပက္ခကြောင့် ဒေသခံရွာသားတွေကို လက်နက်ကိုင်အဖွဲ့အစည်းတွေက ဖမ်းဆီးတာတွေလည်း ဆက်ရှိနေဆဲပါ။
ပြီးခဲ့တဲ့အင်္ဂါနေ့တုန်းက မြန်မာ့တပ်မတော်ကနေဖမ်းဆီးသွားတဲ့ ကွတ်ခိုင်မြို့နယ် ပန်ကူစစ်ရှောင်စခန်းက မီး ဖွားပြီးစ အမျိုးသမီးနဲ့ ရက်သားကလေးငယ်အပါအဝင် လူ ၅ ဦးကို ဒေသခံစစ်တပ်က စစ်ဆေးမေးမြန်းပြီး ညပိုင်းမှာ ပြန်လွှတ်ပေးလိုက်တယ်လို့ စစ်ရှောင်စခန်းတာဝန်ခံ ဦးသိန်းအောင်ကပြောပါတယ်။
“မနေ့ညကပြန်လွတ်လာပြီ။ (၉) နာရီပတ်ဝန်းကျင်လောက်မှအိမ်ကိုရောက်တယ်။ သူတို့အားလုံးလွတ်ခဲ့ပြီ။ သူတို့ ရဲ့ယောကျာ်းအကြောင်းတွေပေါ့။ TNLA ကိစ္စတွေပေါ့။ အဲဒါတွေပြန်မေးမြန်းကြတာပေါ့။ နှိပ်စက်တာတော့ မနှိပ် စက်ပါဘူးတဲ့။ ရိုးရိုးသားသားလေးပဲ ခေါ်သွားတယ်တဲ့။ ဟိုမှာရောက်တော့လည်း သူတို့က ကောင်းကောင်းမွန်မွန် လေး ပြုစုခဲ့ပါတယ်တဲ့။”
အဲဒီနေ့တုန်းကပဲ တအာင်းပလောင် TNLA တပ်ဖွဲ့ကနေ ကွတ်ခိုင်ဗျူဟာရုံးက တပ်မတော်အရာရှိတဦးကို လက်နက်နဲ့တကွ ဖမ်းဆီးခဲ့တာနဲ့ ဆက်စပ်ပြီး မန်ပန်ရွာအုပ်ချုပ်ရေးမှူးနဲ့ အမျိုးသမီးတဦးကို မသင်္ကာမှုနဲ့ ဆက်လက် ဖမ်းဆီးစစ်ဆေးနေဆဲလို့ ဦးသိန်းအောင်ကပြောပါတယ်။
“လွတ်တော့မလွတ်သေးဘူး။ ရုံးမှာရှိသေးတယ်လို့ ပြောတယ်။ အကိုကအုပ်ချုပ်ရေးမှူးလေ။ သူတို့ မောင်နှမနှစ် ယောက် အဲဒီနှစ်ယောက်ကတော့မလွတ်သေးဘူး။ ကောင်မလေးကြောင့်လည်း TNLA က စစ်တပ်အဖွဲ့ကို ဖမ်းသွားတာပဲလို့ ပြောကြတာပဲ။ သူတို့ကနေ စွပ်စွဲတာပဲ။”
ရှမ်းပြည်နယ်မြောက်ပိုင်းမှာ မြန်မာ့တပ်မတော်နဲ့တိုင်းရင်းသားလက်နက်ကိုင်အဖွဲ့တွေကြား စစ်ရေး တင်းမာနေ ဆဲ ဖြစ်သလို တိုင်းရင်းသားလက်နက်ကိုင်အဖွဲ့ အချင်းချင်းကြားမှာလည်း နယ်မြေအငြင်းပွါးမှုပြဿနာကြောင့် လက်နက်ကိုင်ပဋိပက္ခတွေ အရင်ကထက် ပိုများလာပါတယ်။
ဒီစစ်ရေးပဋိပက္ခတွေကြားမှာ ညပ်နေတဲ့ ဒေသခံတွေမှာတော့ တိုက်ပွဲတွေကနေလွတ်အောင် အိုးအိမ်စွန်ခွါ ထွက် ပြေးရတာ၊ သေဆုံး ဒဏ်ရာရတာနဲ့ စားဝတ်နေရေး လုပ်ငန်းကိုင်ငန်းတွေ ထိခိုက်နေကြရပါတယ်။
