By နန်းလွင်နှင်းပွင့်
ကချင် လွတ်လပ်ရေး တပ်မတော် (KIA) ယူနီဖောင်း ဝတ်ထားသူများ ကနေသည့် သီချင်းမှတ်တမ်းကို ဖုန်းအတွင်း ထည့်ထားသဖြင့် ကချင် စစ်ဘေးရှောင် ဒုက္ခသည် ၂ ဦးကို တပ်မတော် တပ်ဖွ့ဲဝင်များက ဖမ်းဆီး ရိုက်နှက်ခဲ့သည်ဟု သတင်း ရရှိသည်။
ဖမ်းဆီး ရိုက်နှက်ခံခဲ့ရသူ၂ ဦးမှာ ရှမ်းပြည်နယ် မြောက်ပိုင်း ကွတ်ခိုင်မြို့နယ် အမှတ် (၆) ရပ်ကွက် ကချင်နှစ်ခြင်း ခရစ် ယာန် အသင်းတော် (KBC 2) ဝန်းရှိ စစ်ဘေးရှောင် စခန်းတွင် နေထိုင်ကြသည့် အသက် ၄၀ အရွယ် ဦးအင်ခွန်ဇော် တောင် နှင့် အသက် ၂၀ ရှိ မောင်လဖိုင်ဇော်ဝမ်တို့ ဖြစ်သည်ဟု ဆိုသည်။
စစ်ဘေးရှောင် စခန်း တာဝန်ခံ ဒေါ်ဘောက်တောင်က“ဒီနေ့ သူတို့ နှစ်ယောက်လုံး အိပ်ယာထဲကတောင် မထနိုင်ပါဘူး။ သွေးထွက် သံယိုဖြစ်တာတော့ ဇော်တောင်တယောက်ပဲ။ ဆေးရုံသွားဖို့ ကျမတို့ ပြောတာလည်း သူတို့က ဆေးရုံမှာ မနေ ချင်ဘူး။ အဲဒါကြောင့် စခန်းမှာပဲ ဆေးကုနေပါတယ်”ဟု ပြောသည်။
၎င်းတို့ ၂ ဦးသည် ကချင်နှစ်ခြင်း ခရစ်ယာန် အသင်းတော်၏ ဘောလီဘောပြိုင်ပွဲ အတွက် ပါဝင်ရန် ရွေးချယ်ခံထားရသူ ၂ ဦး ဖြစ်ပြီး နိုဝင်ဘာလ ၂၆ ရက်က ၎င်းတို့ နေထိုင်သည့် စစ်ဘေးရှောင်စခန်းမှ မန်ပြိန်းကျေးရွာသို့ သွားရာလမ်းတွင် တပ်မ တော် တပ်ဖွဲ့ဝင်များနှင့် တွေ့ကာ စစ်ဆေး ဖမ်းဆီးခံခဲ့ရခြင်း ဖြစ်သည်။
တနှစ်တကြိမ် ကျင်းပလေ့ရှိသည့် ကချင်နှစ်ခြင်း ခရစ်ယာန်အသင်းတော်၏ ဘောလီဘော ပြိုင်ပွဲတွင် ကျေးရွာတရွာစီ မှ ဘောလီဘော ကျွမ်းကျင်သူ တဦးစီကို အသင်းတော်က ရွေးချယ်ပြီး ယှဉ်ပြိုင်ရခြင်း ဖြစ်သည်။
ဘောလီဘော ယှဉ်ပြိုင်ပွဲကို နိုဝင်ဘာလ ၂၇ ရက်တွင် ကျင်းပမည် ဖြစ်ပြီး ဦးဇော်တောင်နှင့် မော်ဇော်ဝမ်တို့မှာ နိုဝင် ဘာလ ၂၆ ရက်က အစမ်းလေ့ကျင့်ရန် မန်ပြိန်းကျေးရွာသို့ သွားခြင်း ဖြစ်သည်။
ဒေါ်ဘောက်တောင်က“ဖမ်းချုပ်ရတာက သူတို့ဖုန်းထဲမှာ ကချင်စစ်တပ် (KIA) ဝတ်စုံနဲ့ အက ကထားတဲ့ အက တပုဒ်ပါ တယ်။ အဲဒီအထဲမှာပါတာ နင်နဲ့တူတယ် ဆိုပြီး စွပ်စွဲတယ်။ ဇော်ဝမ်ကိုလည်း ဟုတ်သလား ထောက်ခံ ခိုင်းတယ်။ ပြီးတော့ မျက်စိကို ပိတ်ပြီး ဇော်တောင်ကို ရိုက်တယ်”ဟု ပြောသည်။
KIA ယူနီဖောင်းဝတ် စစ်သားများ ကနေကြသည့် သီချင်း ရုပ်သံမှတ်တမ်းမှာ ၂၀၁၇ ခုနှစ်ကတည်းက လူမှုကွန်ရက် ဖေ့စ်ဘုတ် စာမျက်နှာတွင် ပျံ့နှံ့နေခဲ့ခြင်း ဖြစ်သည်။
KIA သည် အစိုးရနှင့် အပစ်အခတ်ရပ်စဲရေး စာချုပ် ချုပ်ဆိုထားခြင်း မရှိသေးသည့် တိုင်းရင်းသား လက်နက်ကိုင် အဖွဲ့ တဖွဲ့ဖြစ်ပြီး ကချင်ပြည်နယ်နှင့် ရှမ်းပြည်နယ် မြောက်ပိုင်းတွင် တပ်မတော်နှင့် တိုက်ပွဲများ ဖြစ်ပွားလျက် ရှိသည်။
စစ်ဘေးရှောင် ဒုက္ခသည် နှစ်ဦး ဖမ်းဆီးခံရသည့် သတင်းရသဖြင့် နိုဝင်ဘာလ ၂၆ ရက် ညနေပိုင်းတွင် စခန်းကော်မတီ ဝင်များက ရပ်ရွာ အုပ်ချုပ်ရေးမှူးများကို အကူအညီတောင်းကြရာ ညနေ ၅ နာရီတွင် ပြန်လွတ်လာခြင်း ဖြစ်သည်ဟု သိရ သည်။
လက်ရှိတွင် ဦးဇော်တောင်နှင့် မောင်ဇော်ဝမ်တို့ နှစ်ဦးလုံး လမ်းမလျှောက်နိုင်ဘဲ ခြေသလုံး၊ ဦးခေါင်းနှင့် ခန္ဒာကိုယ် များ တွင် ရိုက်နှက်ခံထားရသည့် ဒဏ်ရာများ ရှိနေသည်ဟု ဒေါ်ဘောက်တောင် က ပြောသည်။
မောင်ဇော်ဝမ်၏ မိခင်မှာလည်း ၎င်း၏သား ဖမ်းဆီး ရိုက်နှက်ခံရသဖြင့် နောက်တကြိမ် သားဖြစ်သူကို အပြင်လွှတ်ရန် စိုးရိမ်ပြီး မောင်ဇော်ဝမ်၏ ကျန်းမာရေးကိုလည်း စိတ်ပူနေသည်ဟု သိရသည်။
ဧရာဝတီမှ တပ်မတော်၏ ပြောရေးဆိုခွင့် ရှိသူများကို ဖုန်းဖြင့် ဆက်သွယ်သော်လည်း မရခဲ့ပေ။
နိုဝင်ဘာလ ၂၀ ရက်ကလည်း ကွတ်ခိုင်မြို့နယ် အတွင်းရှိ ကျေးရွာများတွင် ကလေးငယ်များ၊ မီးဖွားထားသည့် မိခင် အပါ အဝင် ရွာသူရွာသား ၉ ဦးကို တပ်မတော်က ဖမ်းဆီးသွားပြီး ပလောင် (တအန်း) အမျိုးသား လွတ်မြောက်ရေး (TNLA) နှင့် ပတ်သက်မှု ရှိမရှိ မေးမြန်းခဲ့ကာ ထိုထဲမှ ၅ ဦးကို နိုဝင်ဘာလ ၂၂ ရက်တွင် ပြန်လွှတ်ပေးခဲ့သည်။
