အောက်တိုဘာ ၁၆ ။ ။ ပြည်တွင်းစစ်ပွဲများ၊ နိုင်ငံရေးတက်ကြွလှုပ်ရှားမှုများ၊ လယ်ယာမြေသိမ်းဆည်းမှုများကြောင့် လူနေမှုဘဝများထိ ခိုက်ခဲ့ရပြီး နစ်နာခဲ့သူများကို သက်ဆိုင်ရာအစိုးရမှ ပြန်လည်ကုစားပေးနိုင်ရန် စစ်တမ်းများကောက်ယူကာ အစီ ရင်ခံစာတစ်စောင်ပြုစုခဲ့ကြောင်း ပြန်လည်ကုစားပေးလျော်မှုစီမံအဖွဲ့ဝင် ဦးဟန်ကြီး ကပြောသည်။
“လူ့အခွင့်အရေးချိုးဖောက်ခံခဲ့ရတဲ့အတွက် သူတို့ဘဝတွေထိခိုက်ခဲ့ရတယ်။ နစ်နာခဲ့ရတယ်ဆိုတော့ အဲဒါအ တွက် အစိုးရအနေနဲ့သူတို့ဘဝတွေအပေါ် ဘယ်လိုမျိုးပြန်လည်ဆောင်ရွက်ပေးစေချင်လည်းဆိုတဲ့ အသံကို ထွက်လာအောင် ကျွန်တော်တို့က ဆောင်ရွက်ပေးတာဖြစ်သလို အဲဒီဟာတွေအတိုင်း အစိုးရက အကောင်အ ထည်ဖော်ဆောင်ရွက်ပေးမယ်ဆိုရင် နစ်နာခဲ့ရသူတွေရဲ့ဘဝပြန်လည်တည်ဆောက်ဖို့အတွက် အများကြီး ကောင်းသွားမယ်” ဟု ဦးဟန်ကြီး ကပြောသည်။
အောက်တိုဘာ ၁၆ရက်က ရန်ကုန်မြို့ ပန်းဆိုးတန်းလမ်းရှိ KAFE IN TOWN “ဥပက္ခာမပြုကောင်းသော ဘဝများ” အစီရင်ခံစာမိတ်ဆက်ပွဲ အခမ်းအနားကို ပြုလုပ်ခဲ့သည်။
ယင်းအစီရင်ခံစာသည် ၁၉၇၀ ခုနှစ်မှ ၂၀၁၇ခုနှစ်အကြား ပြည်နယ်နှင့် တိုင်းဒေသကြီး ၁၁ခုမှ လူ့အခွင့်အရေး ချိုးဖောက်ခံရမှုများကြောင့် နစ်နာခံစားခဲ့ရသူ ၁၇၀ ကို တွေ့ဆုံမေးမြန်းမှုများအား အခြေခံ၍ အစီရင်ခံစာပြုစု ထားခြင်း ဖြစ်ကြောင်း သိရသည်။
မြန်မာနိုင်ငံတွင် နှစ်ပေါင်း ၇၀ခန့်ကြာမြင့်နေပြီဖြစ်သည့် ပြည်တွင်းစစ်ဒဏ်ခံစားခဲ့ရသူများ၊ နိုင်ငံရေးအကျဉ်း သားဟောင်းများနှင့် မြေယာသိမ်းဆည်းခံရသူများကို တွေ့ဆုံမေးမြန်းခဲ့ခြင်းဖြစ်သည်။
၁၉၈၈ခုနှစ်တွင် ကျောင်းသားများဦးဆောင်ပြီး ဆန့်ကျင်ဆန္ဒပြခဲ့ရာတွင် ဖိနှိပ်ခြေမှုန်းခံခဲ့ရသူများ၊ ၁၉၉၁ခုနှစ်က ဧရာဝတီတိုင်း ဘိုကလေးတွင်ပြုလုပ်သည့် စစ်ဆင်ရေး၊ ကချင်နှင့်ရှမ်းပြည်မြောက်ပိုင်းတွင် ဖြစ်ပွားနေသည့် စစ် ပွဲများကို ကြုံတွေ့ခံစားရသူ အများစုကို မေးမြန်းမှုများပြုလုပ်ခဲခြင်းဖြစ်ကြောင်း သိရသည်။
“မေးမြန်တဲ့အခါမှာ အများဆုံးဖြေကြားတာကတော့ ဒီအဖြစ်အပျက်တွေကို အလားတူပြန်လည် မဖြစ်အောင် အာမခံပေးနိုင်တဲ့ တစ်စုံတစ်ရာမူဝါဒတွေထွက်ဖို့ သဘောထားဆန္ဒပေးကြတယ်။ နောက်ထပ်တစ်ခါမခံစားချင် တော့ဘူး။ နောက်ထပ်တစ်ခါ ဒီဟာတွေကိုမဖြစ်စေချင်တော့ဘူးဆိုတဲ့ သဘောထားဆန္ဒက အများဆုံးတွေ့ရ တယ်” ဟု မွန်ပြည် လူ့အခွင့်အရေးဖောင်ဒေးရှင်းမှ နိုင်အဲမွန် ကပြောသည်။
လူအခွင့်ရေးချိုးဖောက်ခံရသူများက အစိုးရဆောင်ရွက်ပေးသည့် ပြန်လည်ကုစားပေးလျော်မှုကို လိုလာကြပြီး နစ်နာခဲ့မှုများအတွက် တရားမျှတမှုကို ရှာဖွေပေးရန်ထိုက်တန်သည်ဟု လူ့အခွင့်အရေးမှတ်တမ်းကွန်ရက် (မြန်မာနိုင်ငံ)နှင့် အခြားအရပ်ဖက်အဖွဲ့အစည်းများစုဖွဲ့ထားသည့် ပြန်လည်ကုစားပေးလျော်မှုအလုပ်အဖွဲ့မှ ယခု အစီရင်ခံစာတွင် ဖော်ပြထားသည်။
