တာဝန်ဝတ္တရားဆောင်ရွက်နေချိန် အလိုအလျှောက် အပြင်းအထန်နာကျင်စေမှုနဲ့ နန်းမိုဟွမ်ကို ရာဇသတ်ကြီး ဥပဒေ ပုဒ်မ ၃၃၃ နဲ့ PSLF/TNLA ဗဟိုတရားရုံးက အောက်တိုဘာ ၅ ရက်နေ့က ထောင်ဒဏ် ၃ နှစ်ချမှတ်လိုက်ပါတယ်။
နန်းမိုဟွမ်ဟာ အကောက်ခွန်ဝန်ထမ်းတွေကို အပြင်းအထန်ထိခိုက်သေဆုံတဲ့အထိ ဝတ္တရားနှောင့်ယှက်ခဲ့မှုရှိကြောင်း အမှုဖွင့်တိုင်ကြားချက်ကြောင့် ဖမ်းဆီးအရေးယူခဲ့တာလို့ တီအန်အယ်လ်အေက ပြန်ကြားရေးတာဝန်ခံ မိုင်းအိုက်ကျော်က ပြောပါတယ်။
“ပြီးခဲ့တဲ့ ၅ ရက်နေ့က ပုဒ်မ ၃၃၃ နဲ့ ထောင်ဒဏ် ၃ နှစ်ချမှတ်လိုက်တာဖြစ်တယ်။ ကျန်တဲ့ အသေးစိတ်ကိုတော့ ကျနော်မသိဘူး။ ”
နန်းမိုဟွမ်ကို မိသားစုဝင်နဲ့အများပြည်သူရှေ့မှာ စီရင်ချက်ချမှတ်မယ်လို့ တီအန်အယ်အေ က ထုတ်ပြန်ထားပေမယ့် အခုလို ထောင်ဒဏ်စီရင်လိုက်တာကို ဘာမှမသိရသေးကြောင်း နန်းမိုဟွမ်ရဲ့ ခင်ပွန်း စိုင်းစောဆွေက ပြောပါတယ်။
“အခုလောလောဆယ်တော့ ကျနော်ဘာမှမသိရသေးဘူး။ အိမ်ကလူတွေနဲ့လည်း အဆက်အသွယ်မရသေးဘူးဖြစ်နေတယ်။ ဒီပန်ဆန်းသွားတဲ့အဖွဲ့တွေ ပြန်လာရင်တော့ သိရမှာပေါ့။ အခုက ကျနော်ဘာမှမသိရသေးဘူး။”
နန်းမိုဟွမ်ကို တီအန်အယ်အေ ထိန်းချုပ်ဒေသမှာပဲ ထိန်းသိမ်းထားတယ်လို့ မိုင်အိုက်ကျော်က ပြောပါတယ်။
တီအန်အယ်လ်အေ တပ်ဖွဲ့ဝင် ၅ ဦးဟာ ပြီးခဲ့တဲ့ သြဂုတ် ၁၇ ရက် မနက်ပိုင်းက နမ်းခမ်းမြို့ ဟိုနောင်ရပ်ကွက်ရှိ အိမ်ဆောက်ပစ္စည်းရောင်းဝယ်ရေး ဆိုင်တဆိုင်ကို ဝင်ရောက် လာပြီး ဆိုင်ရှင်အမျိုးသမီး နန်းမိုဟွမ် (အသက် ၃၇ နှစ်) ကို ဖမ်းဆီးခေါ်ဆောင်သွားခဲ့တာပါ။
တီအန်အယ်လ်အေက ဖမ်းဆီးထားတဲ့ နန်းမိုဟွမ်ဟာ အပြစ်မရှိတဲ့အတွက် မိသားစုဝင်တွေက ဆန္ဒပြတောင်းဆိုခဲ့ကြသလို နိုင်ငံရေးပါတီတွေနဲ့ လူမှုအဖွဲ့အစည်းတွေက လည်း သူ့ကိုပြန်လွှတ်ပေးဖို့ တောင်းဆိုခဲ့ပါတယ်။
ဒါ့အပြင် နန်းမိုဟွန်ကို အမြန်ဆုံးပြန်လွှတ်ပေးဖို့နဲ့ ပြည်သူလူထုရဲ့ အသက်အိုးအိမ်စည်း စိမ်ကိုထိပါးပြီး တရားဥပဒေစိုးမိုးရေးကို ထိခိုက်စေတဲ့ မည်သည့်လုပ်ရပ်ကိုမဆို ပြန်ထန်စွာရှုတ်ချကြောင်း အမျိုးသားပြည်လည်သင့်မြတ်ရေးနှင့် ငြိမ်းချမ်းရေး ဗဟိုဌာနက စက်တင်ဘာလ ၁၀ ရက်နေ့မှာ ထုတ်ပြန် တောင်းဆိုခဲ့ပါတယ်။
