(ရန်ကုန်) — ရှမ်းပြည်နယ်မြောက်ပိုင်း နမ္မတူမြို့နယ်အတွင်း တိုင်းရင်းသားလက်နက်ကိုင် အဖွဲ့နှစ်ခုကြား စစ်ရေး တင်းမာမှု ဆက်ဖြစ်နေသောကြောင့် မန်စံနှင့် မိုင်းမုကျေးရွာအုပ်စုတို့မှ စစ်ဘေးရှောင်များက နေရပ်ပြန်ရန် စိုးရိမ်နေကြဆဲဖြစ်သည်။
ပန်ကွတ်ကျေးရွာအနီးတွင် တအန်းလွတ်မြောက်ရေးတပ်မတော် (TNLA) နှင့် ရှမ်းပြည်ပြန်လည်ထူထောင်ရေး ကောင်စီ/ရှမ်းပြည်တပ်မတော် (RCSS/SSA) တို့အကြား သြဂုတ် ၅ ရက်နေ့ တိုက်ပွဲဖြစ်ပွားပြီး နောက်ပိုင်း ထိုဒေသတွင် နှစ်ဘက် စစ်အင်အား ဖြည့်တင်းထားကြသည်ဟု ဒေသခံတို့က ပြောသည်။
ဒေသတွင်း ဘုန်းကြီးကျောင်းများတွင် စစ်ဘေးရှောင် ၈ဝဝ ဝန်းကျင်ခန့် ခိုလှုံနေကြကြောင်း၊ ၎င်းတို့ထဲတွင် ကျောင်းသူကျောင်းသား ၂ဝဝ ခန့် ပါဝင်ကြောင်း ဒေသခံကျောင်းဆရာတစ်ဦးကပြောသည်။
“ကလေးတွေကျောင်းတက်ရမယ့် အချိ်န်လေ။ ဒီလိုအချိန်ဖြစ်တော့ ကလေးတွေလည်း ပညာကောင်းကောင်း မသင်ကြရဘူး” ဟု ကျောင်းဆရာက ပြောသည်။
သီးနှံစိုက်ပျိုးချိန်ဖြစ်သော်လည်း လုပ်ငန်းများကိုလည်း ပစ်ထားရကြောင်း၊ ရေရှည်တွင် စားရေးသောက်ရေး ခက်ခဲမည်ကို စိုးရိမ်ကြောင်း မန်စံကျေးရွာရောက် စစ်ရှောင်တစ်ဦးဖြစ်သူ အိုက်လျန်းက ပြောသည်။
“ပြောင်းတွေ ပေါင်းရှင်းရမှာလည်း မရှင်းနိုင်သေးဘူး။ သူတို့က ဒီလိုဖြစ်နေတော့ ကျွန်တော်တို့ ဘာလုပ်စားရမလဲ” ဟု ပန်ဟတ်ကျေးရွာသား အိုက်လျန်းက ပြောသည်။
TNLA စွပ်စွဲချက်
ပြီးခဲ့သည့်လအတွင်း တိုက်ပွဲ ၅ ကြိမ်မှ ၇ ကြိမ်အထိ ဖြစ်ပွားခဲ့ကြောင်း နှစ်ဘက် ထုတ်ပြန်ချက်များအရ သိရသည်။
တိုက်ပွဲများဖြစ်ပွားရခြင်းမှာ RCSS/SSA တပ်ဖွဲ့များက ၂ဝ၁၅ ခုနှစ် တစ်နိုင်ငံလုံးအပစ်ရပ်စာချုပ်တွင် လက်မှတ်ရေးထိုးပြီးနောက်ပိုင်း နယ်မြေ ကျူးကျော် ဝင်ရောက်လာခြင်းကြောင့်ဖြစ်ကြောင်း TNLA က စွပ်စွဲသည်။
တိုက်ပွဲဖြစ်ပွားရာ အနီးတွင် မန်စံကျေးရွာအုပ်စု ပန်ကွတ်၊ ပန်ဆော့ကျေးရွာနှင့် ပန်လုံကျေးရွာအုပ်စု ပန်ဟတ်၊ မန်ဆာ၊နမ့်ဆီလင်း၊နောင်ငင်း၊ နားဟုတ်စသည့်ကျေးရွာများရှိနေကြောင်း၊ အဆိုပါကျေးရွာများအနီးသို့ တပ်မတော်၊ SSPP/SSA ဟု ထင်ရှားသည့် ရှမ်းပြည်တပ်မတော်တို့လည်း ရောက်နေကြောင်း TNLA ပြောခွင့်ရ ဗိုလ်မှူးတာအိုက်ကျော်ထံမှ သိရသည်။
“အဖွဲ့တွေက သုံးလေးဖွဲ့လောက်ရှိနေတော့ ဘယ်လိုဖြစ်လာမယ် ဆိုတာ ပြောလို့ မရသေးဘူး၊ စစ်ရေးအခြေအနေ တင်းမာနေတယ်လို့ပဲ ပြောလို့ရမယ် ” ဟု ဗိ်ုလ်မှူးတာအိုက်ကျော်က ပြောသည်။
RCSS/SSA ပြောခွင့်ရ ဒုဗိုလ်မှူးကြီးစိုင်းဦးက လတ်တလောအခြေအနေများနှင့် ပတ်သက်ပြီး အသေးစိတ် ရှင်းပြရန် အဆင်သင့် မဖြစ်သေးဟု ပြောသည်။
