မန္တလေးတိုင်း စဥ့်ကူးမြို့နယ်ကို စစ်ကောင်စီတပ်က မတ်လ ၁၇ ရက်နေ့ ညနေမှာ လေကြောင်းတိုက်ခိုက်ခဲ့တာကြောင့် အရပ်သား သုံးဦးသေဆုံးပြီး ငါးဦး ထိခိုက်ဒဏ်ရာရခဲ့ပါတယ်။
စစ်ကောင်စီက ညနေ ၆ နာရီကျော်မှာ လက်ပံလှရွာကို လေကြောင်းတိုက်ခိုက်ခဲ့တာကြောင့် အမျိုးသမီးသုံးဦးသေဆုံးခဲ့တာလို့ ပြည်သူ့ကာကွယ်ရေးတပ်မတော်-မန္တလေး (MDY-PDF) ပြောရေးဆိုခွင့်ရှိသူ ကိုအော်စမွန်က RFA ကို ပြောပါတယ်။
“ပြည်သူ အမျိုးသမီး သုံးဦး သေဆုံးခဲ့ပြီး ထိခိုက်ဒဏ်ရာရသူ ပြည်သူ ငါးဦးရှိပါတယ်”
ထိခိုက်ဒဏ်ရာရသူတွေကို ဆေးကုပေးနေတယ်လို့ ဆိုပါတယ်။ ပြီးခဲ့တဲ့ မတ်လ ၁၄ ရက်နေ့ကလည်း လက်ပံလှရွာ ဈေးဆိုင်တန်းကို စစ်ကောင်စီတပ်ကလေကြောင်း တိုက်ခိုက်ခဲ့တာကြောင့် ကလေးခြောက်ဦးအပါအဝင် အရပ်သား ၂၇ ဦးသေဆုံးခဲ့ပါတယ်။
လေကြောင်းတိုက်ခိုက်မှုကြောင့် အရပ်သားတွေသေဆုံးဒဏ်ရာရတာနဲ့ ပတ်သက်ပြီး စစ်ကောင်စီပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းကို RFA က မေးမြန်းဖို့ ဖုန်းဆက်ခဲ့ပေမဲ့ လက်ခံဖြေဆိုတာမရှိပါဘူး။
စဥ့်ကူးမြို့နယ်ကို ၂၀၂၄ ခုနှစ် ဇူလိုင် ၁၇ ရက်နေ့မှာ MDY-PDF ဦးဆောင်တဲ့ ပူးပေါင်းတပ်က အပြီးသတ် တိုက်ခိုက်သိမ်းပိုက်ခဲ့တာပါ။ စစ်ကောင်စီကတော့ စဉ့်ကူးမြို့နယ်ကို လက်နက်ကြီးနဲ့ပစ်ခတ်တာ၊ လေကြောင်းကနေ မကြာခဏ ဗုံးကြဲတိုက်ခိုက်နေတယ်လို့ ဒေသခံတွေက ပြောပါတယ်။
RFA က ပြုစုထားတဲ့ စာရင်းတွေအရ ၂၀၂၄ ခုနှစ် တစ်နှစ်အတွင်း စစ်ကောင်စီတပ်ရဲ့ လေကြောင်းနဲ့ လက်နက်ကြီးကြောင့် နိုင်ငံတစ်ဝန်း အရပ်သား ၁,၇၆၉ ဦး သေဆုံးပြီး ၃,၇၂၀ ဦး ဒဏ်ရာရရှိခဲ့ပါတယ်။
