ပဲခူးတိုင်း၊ သာယာဝတီအကျဥ်းထောင်မှာ ဇွန်လ ၁၇ ရက်နေ့က အကျဉ်းသားတချို့ရိုက်နှက်ခဲ့ရပြီး နိုင်ငံရေး အကျဥ်းသားသုံးဦး ခြေချင်းခတ်တိုက်ပိတ်ခံရတယ်လို့ အကျဥ်းထောင်နဲ့ နီးစပ်သူတွေက ပြောပါတယ်။
နိုင်ငံရေးအကျဥ်းသားတွေဖြစ်တဲ့ အဆောင် (၆) က ကိုထူးအောင်၊ စောချစ်ဝင်းထွန်းနဲ့ အဆောင် (၅) က ကိုသက်ပိုင်တို့ကတော့ ရိုက်နှက်ခံရတဲ့အပြင် ခြေချင်းခတ်ခံရပြီး တိုက်ပါ အပိတ်ခံလိုက်ရတာလို့ ဆိုပါတယ်။
အကျဥ်းသားတွေကို ထောင်အာဏာပိုင်တွေက ကိုဗစ်ဆေးထိုးရာမှာ တချို့တွေမူးလဲတာနဲ့ ဖျားနာတာတွေရှိတာကြောင့် ရောဂါအခံရှိသူတချို့က ဆေးမထိုးဖို့ ငြင်းဆိုရာကနေ အခုလို ရိုက်နှက်တိုက်ပိတ်ခံရတာလို့ အကျဥ်းထောင်နဲ့ နီးစပ်သူတွေက ပြောပါတယ်။
မြန်မာနိုင်ငံလုံးဆိုင်ရာ နိုင်ငံရေးအကျဥ်းသားကွန်ရက် (PPNM) တာဝန်ရှိသူ ကိုသိုက်ထွန်းဦးကတော့ သာယာဝတီထောင်မှာ အကျဥ်းသားတွေ ရိုက်နှက်ခံရတာ ကြားသိရပေမဲ့ ဆက်လက်စုံစမ်းနေဆဲလို့ RFA ကို ပြောပါတယ်။
“ဟုတ်ကဲ့ ဒီသတင်းကို ကျွန်တော်တို့လည်း ကြားထားပါတယ်။ အသေးစိတ်အခြေအနေကိုတော့ ကျွန်တော်တို့ ဆက်စုံစမ်းနေပါတယ်”
အကျဥ်းသားတွေ ရိုက်နှက်တိုက်ပိတ်ခံရတာနဲ့ပတ်သက်ပြီး အသေးစိတ်သိရဖို့ စစ်ကောင်စီရဲ့ အကျဥ်းဦးစီးဌာနပြောခွင့်ရသူ ဒုတိယညွှန်ကြားရေးမှူးချုပ်ရုံးကို RFA က တယ်လီဖုန်းနဲ့ အကြိမ်ကြိမ်ဆက်သွယ်ခဲ့ပေမဲ့ ဖုန်းမဖြေပါဘူး။
ဇွန် ၁၅ ရက်နေ့ကလည်း ပဲခူးတိုင်း၊ ဒိုက်ဦးအကျဥ်းထောင်မှာ နိုင်ငံရေးအကျဥ်းသူ ရှစ်ဆယ်ကျော်ကို ထောင်အာဏာပိုင်တွေ ရိုက်နှက်ခဲ့တာကြောင့် အသက်သုံးဆယ်ကျော်အရွယ် အမျိုးသမီးငါးဦး ဒဏ်ရာရခဲ့ပြီး သုံးဆယ်ကျော် တိုက်ပိတ်ခံထားရတယ်လို့ အကျဥ်းထောင်နဲ့ နီးစပ်သူတွေက ပြောပါတယ်။
